راۋشان بايباتجانوۆا جەتى جىلدان بەرى قوستانايداعى «سارىارقااۆتوپروم» سەرىكتەستىگىندە اۆتوكولىك شاناعىن سىرلاۋشى, ارلەۋشى بولىپ جۇمىس ىستەپ كەلەدى. راۋشاننىڭ كۇندەلىكتى مىندەتى – سىرلاۋ تسەحىنان جاڭا شىققان كولىكتەردىڭ سىرتقى قاباتىن تەگىستەپ, ايناداي ەتىپ جىلتىراتۋ.
– كوپشىلىگى ارلەۋ جۇمىستارى كولىك شاناعىنىڭ سىرتىن جىلتىراتىپ, بوياۋىن اشۋ ءۇشىن عانا جاسالادى دەپ تۇسىنەدى. نەگىزىندە, شاناققا جۇققان سىر مەن لاك قاباتىندا جاي كوزگە كورىنە قويمايتىن كەدىر-بۇدىر كوپ بولادى. مەن وسىلاردى ابدەن تەگىستەپ, اۆتوكولىك شاناعىن ۇزاققا دەيىن سىرى كەتپەيتىندەي ەتىپ جىلتىراتىپ شىعارامىن, – دەدى شاناق ارلەۋشى.
راۋشان «سارىارقااۆتوپروم» سەرىكتەستىگىنە العاش كەلگەن جىلى سىرلاۋ تسەحىندا ءۇش-ءتورت-اق قىز-كەلىنشەك بار ەدى. كاسىپورىن باسشىلىعى وتاندىق كولىكتەردى سىرلاپ, ارلەۋ بارىسىندا ەرلەردەن گورى ايەلدەرگە كوبىرەك سەنىم ارتاتىن بولسا كەرەك, قازىر ولاردىڭ سانى جيىرماعا جەتى. مۇندا نەبارى بەس-اق ەر ادام جۇمىس ىستەيدى. تسەح بريگاداسى ءبىر اۋىسىمدا 18 كولىك شاناعىن ارلەپ شىعارادى.
– ەڭبەكاقىمىز جامان ەمەس, زاۋىتتا تەگىن تاماقتانامىز. مۇنىڭ سىرتىندا, جۇمىسقا قىزمەتتىك اۆتوبۋسپەن كەلەمىز. ۇيگە دە وسى اۆتوبۋسپەن قايتامىز. سىرلاۋ تسەحىنداعى جۇمىسىمىز دا قىزىق. ادەتتە جاي ادامعا جاڭا سىرلانعان اۆتوكولىكتىڭ سىرتى ءمىنسىز ءارى تەپ-تەگىس بولىپ كورىنۋى مۇمكىن. ال مەن سىرت ادامدار بايقاي بەرمەيتىن نازىك كەمشىلىكتەردى كورىپ قويا بەرەمىن. شاناقتىڭ سىرتقى تەگىستىگىن ساۋساقپەن سەزىنە ءبىلۋ كەرەك. اۆتوكولىك تە ايەل سياقتى, ەكەۋى دە سۇلۋلىقپەن ۇيلەسىپ تۇرادى, – دەدى راۋشان.
ءوز كاسىبىنىڭ حاس شەبەرى ءارى اياۋلى انا راۋشان بايباتجانوۆا تاياۋدا قوستاناي وبلىسىنىڭ ىسكەر ايەلدەر قاۋىمداستىعى ۇيىمداستىرعان بايقاۋدىڭ جەڭىمپازى اتاندى.
قوستاناي وبلىسى
