مەملەكەت باسشىسى قاسىم-جومارت توقاەۆ ءوزىنىڭ قازاقستان حالقىنا جولداۋىندا: «بالالار ءۇشىن قاتەرلى بۇگىنگىدەي اۋمالى-توكپەلى زاماندا ولاردىڭ كۇش-جىگەرى مەن قىزىعۋشىلىعىن دۇرىس ارناعا باعىتتاۋ اسا ماڭىزدى. بالالار مەملەكەتىمىزدىڭ بولاشاعى ەمەس پە؟!» دەپ اتاپ وتكەن بولاتىن. بۇل ۇندەۋ ەلىمىزدىڭ بارلىق مادەني وشاقتارىنىڭ شىعارماشىلىق ىزدەنىستەر اۋقىمىن بارىنشا سانتاراپتاندىرعانى راس. وسى تۇرعىدا «استانا وپەرا» تەاترىنىڭ دا ەلوردانىڭ رۋحاني-مادەني ومىرىندەگى بەلسەندى اعارتۋشىلىق قىزمەتىن اتاپ وتكەن ءجون. ونىڭ ايقىن ايعاعى – تەاتر رەپەرتۋارىنداعى بالالار مەن جاسوسپىرىمدەرگە ارنالعان ءتۇرلى جوبالار مەن كونتسەرتتەر.
«تەاتر ساباعىن» وتكىزۋ ءۇشىن باس شاھار اكىمدىگى وقۋشىلاردى ۇيىمداستىرۋ جانە وزگە دە ماڭىزدى ماسەلەلەردى ءوز موينىنا الدى.
– بۇل جوبا مەكتەپ قابىرعاسىنان باستاپ وقۋشىلاردىڭ بويىنا مادەنيەتكە دەگەن ماحاببات پەن ادامي-رۋحاني قۇندىلىقتاردى ءسىڭىرىپ قانا قويماي, سونداي-اق ولاردىڭ شىعارماشىلىق قابىلەتتەرى مەن دارىندارىن اشۋعا مۇمكىندىك بەرەدى, – دەگەن قالا باسشىسى التاي كولگىنوۆ تەاترمەن بىرلەسە جۇزەگە اسىراتىن ءىس-شارانىڭ ماڭىزدىلىعىن اتاپ ءوتتى.
ال جوبا جەتەكشىسى مادەنيەت قايراتكەرى, ەلىمىزگە تانىمال مۋزىكاتانۋشى مارجان جاكەنوۆا بولسا: «وكىنىشكە قاراي, كارانتين جاعدايىندا بالالار ءتۇرلى گادجەتتەردى اناعۇرلىم كوپ پايدالانادى, تەلەديداردى كوپ كورەدى, كومپيۋتەرلىك ويىندار وينايدى. سوندىقتان وپەرا جانە بالەت ارتىستەرىمىز بەن وركەستر مۋزىكانتتارىنىڭ شەبەرلىگى, ءسان-سالتاناتى جاراسقان تاماشا تەاترىمىز بالانى جاڭا اتموسفەراعا بولەپ, وعان اسقاق ونەر الەمىنىڭ ەسىگىن اشادى دەپ ۇمىتتەنەمىز. ءبىزدىڭ مىندەتىمىز – بولاشاقتاعى كورەرمەندەرىمىزدى, وپەرا جانە بالەت ونەرىن سۇيەر قاۋىمدى مەكتەپ جاسىنان باستاپ قالىپتاستىرۋ», دەپ اتالعان جوبا تۋرالى ءوز پىكىرىمەن ءبولىسىپ, اسىرەسە كارانتين جاعدايىندا مادەني جوبالاردىڭ بالالار مەن جاسوسپىرىمدەر تاربيەسىندەگى ماڭىزىنا كەڭىنەن توقتالدى.
– «تەاتر ساباعىن» تەك جوعارى سىنىپ وقۋشىلارى, ياعني بوزبالالار مەن بويجەتكەندەر ءۇشىن وتكىزۋ تۋرالى شەشىم قابىلداندى. ولاردىڭ كەيبىرەۋى, ارينە, تەاتردا بولعان, الايدا ونەر ورداسىنا كەلۋدىڭ ءاربىر ءساتى – بۇل ءاردايىم مەيرام ەمەس پە! تەاتردا ەشقاشان بولىپ كورمەگەن, جاي عانا جانىنان ءوتىپ بارا جاتىپ, بۇل قولجەتىمسىز دەپ ويلاعان بالالار دا بار. شىن مانىندە, تەاتردىڭ ەسىگى بالالار ءۇشىن دە, ەرەسەكتەر ءۇشىن دە ايقارا اشىق, – دەپ ءسوزىن جالعاستىردى مۋزىكاتانۋشى.
بالالار ءۇشىن العاشقى تەاتر قوڭىراۋى 30 قاڭتاردا سوعىلادى. جاس كورەرمەندەر نازارىنا الەمدىك حورەوگرافيا جاۋھارى ل.مينكۋستىڭ «بايادەركا» بالەتى دايىندالدى. ءىس-شارا باعدارلاماسىنا سايكەس وقۋشىلار تەاترعا سپەكتاكلدىڭ باستالۋىنا دەيىن 2 ساعات بۇرىن كەلەدى. ولاردىڭ نازارىنا سلايدتاردى قولدانۋ ارقىلى تارتىمدى تۇردە 15 مينۋتتىق ءدارىس ازىرلەندى. تاجىريبەلى مۋزىكاتانۋشىلار بالەتتىڭ مازمۇنى, كومپوزيتورى, حورەوگرافى قويىلىم تۋرالى, سونداي-اق بالالاردىڭ بۇل كۇنى ساحنادان كورەتىن سوليستەر تۋرالى قىزىقتى اقپاراتتى اڭگىمەلەپ بەرەدى.
تەاتر ساباعىنا 30 وقۋشى كەلەدى. ولار ون ادامنان ءۇش توپقا بولىنەدى. تەاتر بويىنشا بالالاردى ساحنا سىرتى الەمىنە ساياحات جاساتۋ ءۇشىن ارنايى بەكىتىلگەن ەكسكۋرسيا جەتەكشىلەرىنىڭ جول باستاۋىمەن تۇزىلەتىن تۇششىمدى اقپاراتقا تولى ءۇش باعدار ازىرلەندى.
– بالالار قويىلىمدى جاساۋدىڭ ارتىندا قانشاما ادامنىڭ تۇرعانىن كورەدى. ءبىز گريم جاساۋ بولمەلەرىنە باس سۇعامىز, ولار ارتىستەرگە قالاي گريم جاسايتىنىن, قانداي جاساندى شاشتاردىڭ بولاتىنىن كورەدى. ودان كەيىن كوستيۋمەرلىك تسەحقا كىرەمىز. وندا بالالار بالەت پاچكاسىن ۇستاپ كورىپ, ونىڭ قانشالىقتى جەڭىل ەكەنىنە كوز جەتكىزە الادى. جەڭىل بالەت كوستيۋمدەرى مەن مىسال رەتىندە XVIII عاسىردىڭ ايبىندى وپەرا كيىمدەرى اراسىنداعى ايىرماشىلىقتى كورەدى. اياق كيىم تسەحىندا بالالار ناعىز بالەت پۋانتالارىن قولمەن ۇستاپ كورە الادى. ولارعا بۋتافور جانە رەكۆيزيت تسەحتارى دا قىزىقتى بولاتىنى ءسوزسىز. بۇل جەردە جاس كورەرمەندەر بۋتافوريانىڭ نە ەكەندىگىن جانە دەكوراتسيالاردىڭ قالاي جاسالاتىنىن بىلەتىن بولادى. ەكسكۋرسيا كەزىندە بارلىق قاۋىپسىزدىك شارالارى ساقتالادى – بالالار باستارىنا كاسكا كيەدى. سونداي-اق ولاردىڭ باعدارىنا مۋزىكالىق كىتاپحانا, دايىندىق زالدارى مەن تاعى دا باسقا قىزىقتى جوبالار ۇسىنىلاتىن بولادى, – دەپ ءسوزىن تۇيىندەدى جوبا جەتەكشىسى مارجان جاكەنوۆا.
وسى ورايدا تەاتردا بەتپەردە تاعىپ ءجۇرۋ, قولدى تازارتىپ, زارارسىزداندىرۋ, كورەرمەن زالىنا الەۋمەتتىك اراقاشىقتىقتى ەسكەرىپ وتىرعىزۋ سياقتى سانيتاريالىق نورمالاردىڭ تولىقتاي ساقتالاتىندىعىن اتاپ ءوتۋ ماڭىزدى. ال «تەاتر ساباعىنان» وقۋشىلاردىڭ تەڭدەسسىز رۋحاني اسەر الاتىندىعىنا سەنەمىز.
