اۋەسقوي ونەرتاپقىش ءتول تەحنيكاسىن جازدا باقشا جۇمىستارىنا, قىستا قوراداعى مالعا ءشوپ تاسۋ, قي شىعارۋ, اۋلانىڭ قارىن كۇرەۋ سياقتى ءۇي شارۋاسىنا پايدالانادى.
– اۋەلى ينتەرنەتتى اقتارىپ وتىرىپ, قولدان قۇراستىرىلعان تەحنيكالار تۋرالى كوپتەگەن بەينەماتەريالداردى ءسۇزىپ شىقتىم, نەشە ءتۇرلى فورۋمدارعا قاتىستىم. ودان كەيىن تراكتور ەسكيزدەرىنىڭ بىرنەشە ۇلگىسىن جاساپ كوردىم. اقىرى بىرەۋىنە توقتاپ, قۇراستىرۋ جۇمىستارىن باستادىم. باسىندا قيىن بولدى, ءبىر بولشەكتى ورناتىپ بىتكەن سوڭ, وعان ەكىنشىسى سايكەس كەلمەي قالادى. ونى قايتادان شەشىپ, كەيبىرەۋىن وزگەرتىڭكىرەپ, قىرىپ, جونىپ, قيىپ, قايتا كيگىزۋگە تۋرا كەلدى, – دەيدى ونەرتاپقىش.
تراكتور قۋاتى 15 اتتىڭ كۇشىنە تەڭ شاعىن عانا بەنزين قوزعالتقىشىمەن قوزعالادى. جىلدامدىق اۋىستىرعىش قورابى 412-ءنشى «موسكۆيچتەن», ال ءرۋلدى باسقارۋ بەلدەمەسى «Volkswagen Golf II» كولىگىنەن الىنىپتى. شاعىن تراكتوردىڭ الدىڭعى دوڭعالاعى – جەڭىل كولىكتىكى, ال ارتىندا بيداي سەبەتىن ارنايى تەحنيكانىڭ ەسكى دوڭعالاعى تۇر.
ءۇي شارۋاسىنا قولايلى امبەباپ تەحنيكانىڭ فاركوپى, وعان تىركەيتىن ارباسى دا بار. ونىمەن 800 كيلوعا دەيىن جۇك تاسۋعا بولادى. قاجەت بولعان جاعدايدا اربانى شەشىپ, ونىڭ ورنىنا كۇرەك تىركەلەدى. بۇل جاعدايدا تراكتور شاعىن بۋلدوزەردىڭ شارۋاسىن اتقارادى. تىركەمە كۇرەك قي كۇرەۋگە نەمەسە قار تازالاۋعا ىڭعايلى. الەكساندر تراكتورىن كوكتەمدە جەر جىرتىپ, توپىراق قوپسىتۋعا دا پايدالانادى.
اۋىل تۇرمىسىنا قولايلى امبەباپ تراكتوردىڭ باگىنە 7 ليتر جانارماي سىيادى, بىراق وسىنىڭ ءوزى تراكتوردى بىرنەشە ساعات بويى توقتاۋسىز جۇمىسقا جەگۋگە جەتىپ جاتىر. ونەرتاپقىش تەحنيكاسىن قۇراستىرىپ شىققانشا, ساتىپ العان بولشەكتەرى, تەمىر جونۋشىنىڭ ەڭبەكاقىسى بار – بارلىعى 700 مىڭ تەڭگە شىعىنداپتى.
قوستاناي وبلىسى
