قازىرگى تاڭدا وبلىستىق مەملەكەتتىك ءارحيۆتىڭ الدىندا تۇرعان ماڭىزدى مىندەتتىڭ ءبىرى – شەتەلدە, اسىرەسە رەسەيدىڭ ءار ايماعىندا جاتقان ءوڭىر تاريحىنا قاتىستى قۇجاتتاردىڭ كوشىرمەلەرىن الىپ, ولكە تاريحىنىڭ تولىققاندى دەرەكتىك قورىن قالىپتاستىرۋ. اقپاراتتاندىرۋ, مەملەكەتتىك قىزمەت كورسەتۋ جانە ارحيۆ باسقارماسىنىڭ باسشىسى ازامات قاشيەۆتىڭ ايتۋىنشا, وبلىستا بۇل ماقساتتا بىرقاتار شارۋا تىندىرىلعان.
«ارحيۆ – 2025» جوباسىن جۇزەگە اسىرۋ بارىسىندا ءبىزدىڭ ماماندار 2019 جىلدىڭ قازان ايىندا تاتارستان رەسپۋبليكاسىنىڭ ارحيۆتەرىنەن قازاقستاننىڭ, ونىڭ ىشىندە تىكەلەي قوستاناي وبلىسىنىڭ تاريحىنا قاتىستى 51 قۇجات تاۋىپ اكەلدى. ونىڭ بارىنە عىلىمي-تەحنيكالىق وڭدەۋ جۇرگىزىلىپ, بىلتىر مەملەكەتتىك ساقتاۋعا جىبەرىلدى. بۇل قۇجاتتار بۇگىندە وبلىستىق ءارحيۆتىڭ وقۋ زالىندا تۇر, – دەدى ا.قاشيەۆ. – اسىرەسە, قۇجاتتاردىڭ ساپالى ساقتالۋىن قامتاماسىز ەتۋ ماڭىزدى. بۇل ماقساتتا بىلتىر ارحيۆ مەكەمەلەرىندە ساقتاۋلى تۇرعان 146 مىڭ كونە قۇجات قالپىنا كەلتىرىلىپ, ونى قايتا تۇپتەۋ, دەزينفەكتسيالاۋ جۇمىستارى جۇرگىزىلدى.
«تسيفرلى قازاقستان» باعدارلاماسى اياسىندا وبلىستاعى 21 مەملەكەتتىك ارحيۆتە, سونداي-اق, وبلىستىق باسقارمالار, قالالىق جانە اۋداندىق اكىمدىكتەر, ولاردىڭ بولىمدەرى مەن ءماسليحاتتارى سياقتى 300-گە جۋىق مەكەمەدە «بىرىڭعاي ەلەكتروندى ارحيۆ قۇجاتتارى» دەپ اتالاتىن اقپاراتتىق جۇيە ەنگىزىلگەن.
بۇگىنگى تاڭداعى باستى مىندەت – ارحيۆ قۇجاتتارىنىڭ تسيفرلى كوشىرمەسىن جاساۋدى جەدەلدەتۋ. بۇل قۇجاتتاردىڭ ساقتالۋ ساپاسىن ارتتىرىپ, ىزدەگەن ادامنىڭ تەز تابۋىنا جول اشپاق.
بۇگىنگە دەيىن مەملەكەتتىك ساقتاۋعا الىنعان 10 مىڭنان استام فوتوسۋرەت, قاعاز تۇرىندە ساقتاۋلى تۇرعان 33 مىڭنىڭ ۇستىندەگى قۇجات سكانەردەن وتكىزىلدى. 2020 جىلدىڭ ناۋرىز ايىنان باستاپ وبلىستاعى 523 مەكەمەدە 59 مىڭعا جۋىق قۇجات ەلەكتروندى تۇرگە كوشىرىلدى, – دەدى باسقارما باسشىسى.
مەملەكەتتىك قىزمەت كورسەتۋ ساپاسىن ارتتىرۋ بۇگىنگى تاڭدا بارلىق مەملەكەتتىك ورگانداردىڭ الدىندا تۇرعان ماڭىزدى مىندەتتىڭ ءبىرى ەكەنى داۋسىز. بۇگىندە مەملەكەتتىك قىزمەت تۇرلەرىنىڭ باسىم بولىگىن وبلىس تۇرعىندارى ەلەكتروندى تۇردە الىپ وتىر. شەكتەۋ شارالارى شيرىققالى ەلەكتروندى قىزمەتكە دەگەن سۇرانىس تا ارتتى.
وبلىستىق ارحيۆ تۇرعىندارعا ولاردىڭ جۇمىس ءوتىلىن, قانداي دا ءبىر ءبىلىم مەكەمەسىندە وقىعانىن, ماراپاتتالعانىن, العان ەڭبەكاقىسىنىڭ مولشەرىن, مۇراگەرلىككە قۇقىلى ەكەنىن راستايتىن ارحيۆ انىقتامالارى مەن ارحيۆ قۇجاتتارىنىڭ كوشىرمەلەرىن بەرۋ سياقتى مەملەكەتتىك قىزمەت تۇرلەرىن كورسەتەدى. اۆتوماتتاندىرۋ جانە وڭتايلاندىرۋ شارالارىنىڭ ناتيجەسىندە اتالعان قىزمەت تۇرلەرىن تۇرعىندار مەملەكەتتىك كورپوراتسيا مەن «ەلەكتروندى پورتال» ارقىلى الۋعا قول جەتكىزىپ وتىر. ماسەلەن, وبلىستاعى ارحيۆ مەكەمەلەرى بىلتىر 35 مىڭ مەملەكەتتىك قىزمەت كورسەتسە, ونىڭ 71%-ى ەلەكتروندى تۇردە جۇزەگە اسىرىلعان. 2019 جىلى بۇل كورسەتكىشتىڭ نەبارى 7 پايىز بولعانىن ايتا كەتكەن ءجون.
وبلىستا سوڭعى 17 جىلدىڭ ىشىندە ءتۇرلى سالالار مەن تاقىرىپتار قامتىلعان 67 تاريحي-دەرەكتەمەلىك قۇجاتتار جيناعى جارىق كورگەن. بۇل جيناقتار وبلىس اۋماعىنداعى مەكەمەلەر مەن كاسىپورىنداردىڭ تاريحىن, سونداي-اق توبىل توپىراعىندا تۋىپ-وسكەن نەمەسە وسى وڭىردە قىزمەت ەتكەن قايراتكەر تۇلعالاردىڭ ءومىرى مەن ەڭبەك تاريحىن زەرتتەۋشىلەر ءۇشىن تاپتىرماس دەرەك كوزى بولىپ سانالادى.
قوستاناي وبلىسى
