قوستانايداعى «Antikor Ortalygy» الاڭىندا وتكەن جىلدىڭ جۇمىس ناتيجەلەرىن قورىتىندىلاعان سىبايلاس جەمقورلىققا قارسى كۇرەس قىزمەتىنىڭ باسشىسى قۋانىش بەكباسوۆ وبلىس تۇرعىندارىنىڭ باسىم كوپشىلىگى بۇگىندە وزدەرىنىڭ كەز كەلگەن جەكە ماسەلەسىن ەشبىر تامىر-تانىسسىز نەمەسە الىس-بەرىسسىز, زاڭ جولىمەن شەشۋگە بولاتىنىن جاقسى بىلەتىنىن ايتتى.
قوعامدىق ىندەتتى جويۋدىڭ ەڭ ءتيىمدى جولى – وعان قارسى ىمىراسىز كۇرەس جۇرگىزۋ. جەڭ ۇشىنان جالعاسقان سىبايلاس جەمقورلىق ادەتتە تامىرىن تەرەڭگە جاسىرىپ, اسا قۇپيا تۇردە جاسالاتىندىقتان, مۇنداي قىلمىستاردى اشۋ اسا قيىنعا سوعىپ جاتاتىنى بەلگىلى. بۇل جولدا سىبايلاس جەمقورلىققا قارسى ءىس-قيمىل اگەنتتىگى قىزمەتكەرلەرىنىڭ ءتۇرلى شىم-شىتىرىققا بويلاپ, كۇن-ءتۇن دەمەي قاجىر-قۋاتى مەن بىلىك-ءبىلىمىن سارقىپ تىنىمسىز تەر توگۋىنە تۋرا كەلەدى. ماسەلەن, بىلتىر ولار تاباندى تۇردە جۇرگىزگەن كۇرەس شارالارىنىڭ ناتيجەسىندە وبلىستا 62 شەنەۋنىككە قاتىستى 90 قىلمىستىق ءىس تىركەلگەن. ونىڭ 68-ءى – جەمقورلىق قىلمىستىڭ اۋىر, ال بىرەۋى اسا اۋىر تۇرىنە جاتادى. اتالعان قىلمىستاردى تەرگەۋ ناتيجەسىندە جەمقورلاردىڭ مەملەكەت قازىناسىنا 716,7 ملن تەڭگە شىعىن كەلتىرگەنى اشكەرەلەنىپ, ونىڭ 93%-ى, ياعني 663,9 ملن تەڭگە ءوندىرىلىپ الىنعان.
قۋانىش بەكباسوۆتىڭ ايتۋىنشا, بۇگىندە سىبايلاس جەمقورلىققا قارسى ءىس-قيمىل دەپارتامەنتى جازالاۋ تاجىريبەسىنەن گورى قىلمىستىڭ الدىن الۋ شارالارىن كۇشەيتىپ, جەمقورلىقتىڭ سەبەپتەرىمەن كۇرەسۋگە دەن قويىپ وتىر.
– ايماقتا باس بوستاندىعىنان ايىرۋ جازاسى وتكەن جىلدارمەن سالىستىرعاندا ەكى ەسە ازايدى. سونىمەن قاتار سىبايلاس جەمقورلىق دەڭگەيى دە ەكى ەسە كەمىدى, – دەدى دەپارتامەنت باسشىسى.
سىبايلاس جەمقورلىقتى تەك قانا زاڭ كۇشىمەن جازالاۋ ارقىلى عانا تۇبەگەيلى جويۋ مۇمكىن ەمەس. كوپشىلىك ورتانى قاۋىپتى ىندەتتەن ارشىپ, قۇلان-تازا ايىقتىرۋ ءۇشىن جالپىعا قوزعاۋ سالىپ, سىبايلاس جەمقورلىقتى قابىلداي المايتىن قوعامدىق سانا قالىپتاستىرۋ ماڭىزدى. قوستاناي وبلىسىندا بۇل باعىتتا دا ايتارلىقتاي ىلگەرىلەۋ بار. مىسالى, 2020 جىلى جەرگىلىكتى قوعامدىق ۇيىمداردىڭ كۇشىمەن سىبايلاس جەمقورلىققا قارسى 27 تالداۋ, مونيتورينگ شارالارى جۇرگىزىلىپ, ناتيجەسىندە مەملەكەتتىك قىزمەت سالاسىندا جەمقورلىق تاۋەكەلىن تۋىنداتاتىن 250-دەن استام جاعداي انىقتالدى. قوعامدىق ۇيىمداردىڭ وبلىستاعى سىبايلاس جەمقورلىققا قارسى ساياساتتى جۇزەگە اسىرۋعا اتسالىسۋ بەلسەندىلىگى جىلدان-جىلعا ارتىپ كەلە جاتقانىن اتاپ ءوتۋ كەرەك. ماسەلەن, وبلىستا جۇزەگە اسىرىلىپ جاتقان جالپى قۇنى 360 ملرد تەڭگەلىك 47 ينۆەست-جوبانى مەملەكەتتىك ورگاندار تاراپىنان بولۋى مۇمكىن زاڭسىز ىقپالدى ارەكەتتەردەن قورعاۋ شارالارىنا دەپارتامەنت قوعامدىق ۇيىمداردى دا قاتىستىرىپ وتىر.
«حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋ اياسىندا بۇگىندە قوستاناي وبلىسىنىڭ قالالىق, اۋداندىق اكىمدىكتەرى تولىق اشىق قىزمەت كورسەتۋ مودەلىنە كوشكەن. بۇل ۇلگى وبلىس تۇرعىندارىنىڭ مەملەكەتتىك قىزمەتتەردى ء«بىر تەرەزە» قاعيداتى بويىنشا جەدەل ءارى ەشبىر كەدەرگىسىز الۋىن قامتاماسىز ەتەتىن ءارى جەمقورلىق تاۋەكەلىنە ورىن بەرمەيتىن ءتيىمدى تەتىكتەردىڭ ءبىرى سانالادى.
سونىمەن قاتار مەملەكەتتىك ورگاندار قىزمەتىنىڭ اشىقتىعىن قامتاماسىز ەتۋ جانە مەملەكەتتىك مەكەمەلەرگە دەگەن تۇرعىندار سەنىمىن ارتتىرۋ ماقساتىندا وبلىستاعى 64 مەكەمە مەملەكەتتىك قىزمەت كورسەتۋدىڭ «OpenSpace» فورماتىنا كوشىرىلدى. ايماقتا 600-گە جۋىق وزىنە-ءوزى قىزمەت كورسەتۋ بۇرىشتارى اشىلىپ, ونىڭ 130-ى اۋىلدىق وكرۋگتەرگە ورنالاستىرىلدى. مەملەكەتتىك قىزمەت كورسەتۋدىڭ سەرۆيستىك مودەلىنە كوشۋ ۇدەرىسى بيىل دا جالعاساتىن بولادى.
تاعى ءبىر توقتالا كەتەتىن جايت, ايماقتا اشىق بيۋدجەتتەردىڭ ينتەراكتيۆتى كارتاسى جوباسىن ەنگىزۋ ماسەلەسى تابىستى جۇزەگە اسىرىلا باستادى. مىسالى, 2020 جىلى وبلىستاعى 984 مەملەكەتتىك ورگان ينتەراكتيۆتى كارتا پورتالىنا تىركەلگەن. بۇل پورتالدا بىلتىر جەرگىلىكتى مەمورگاندار مەن مەكەمەلەردىڭ جالپى كولەمى 420 ملرد تەڭگە بولاتىن 4192 بيۋدجەتتىك باعدارلاماسى جاريالانعان.
ق.بەكباسوۆتىڭ ايتۋىنشا, سىبايلاس جەمقورلىق دەڭگەيىنىڭ تومەندەۋىنە وبلىستا وسى باعىتتا ءتيىمدى جۇزەگە اسىرىلىپ جاتقان كەشەندى شارالار مەن ءوڭىر تۇرعىندارىنىڭ قۇقىقتىق ساۋاتىنىڭ جەتىلە تۇسكەندىگى جانە سىبايلاس جەمقورلىققا بەيجاي قاراي المايتىن ىزگى قوعامنىڭ قالىپتاسا باستاۋى تىكەلەي ىقپال ەتىپ وتىر.
قوستاناي وبلىسى
