ايماقتار • 26 قاڭتار، 2021

بايعابىلدا سۋ مۇناراسى قۇلاپ قالدى

103 رەت كورسەتىلدى

قوستاناي وبلىسىنىڭ امانگەلدى اۋدانىنا قاراستى بايعابىل اۋىلىندا سۋ مۇناراسى قۇلاپ قالدى، دەپ حابارلايدى Egemen.kz

وسىدان 6 جىل بۇرىن «اقبۇلاق» باعدارلاماسى بويىنشا جالپى قۇنى 176،5 ملن تەڭگە قارجىعا 4 جارىم شاقىرىم جەردەن قۇبىر تارتىلىپ، اۋىلعا اۋىز سۋ تاراتاتىن بيىك سۋ مۇناراسى ورناتىلعان بولاتىن. تۇششى سۋ تورابى جەتى جىلعا جەتپەي بەلىنەن مايىرىلىپ، جۋان باسىن جەرگە ءيىپ، قار جاستانىپ قالدى. اۋىلعا سۋ قۇبىرىن تۋرتۋ جۇمىستارىن «GSM Capital Group» جانە  «سترويتەل–2003» دەپ اتالاتىن ەكى سەرىكتەستىك ورىنداعان.

اۋىل اكىمى اسحات زەينولدين 24-ءشى قاڭتار كۇنى قۇلاعان قۇبىر تۋرالى ء تيىستى مەكەمەلەرگە حابار جىبەرگەن.

– ارينە، وكىنىشتى جاعداي. بىراق الەۋمەتتىك جەلىگە تاراپ كەتكەن «قۇبىر قيراپ، اۋىل اۋىز سۋسىز قالادى» دەگەن اقپارات شىندىققا جاناسپايدى. اۋىلعا اۋىز سۋ ۋاقىت كەستەسى بويىنشا بەرىلىپ وتىر. ازىرگە تۇرعىندار بۇرىنعىداي تاۋلىك بويى سۋ الا المايدى. قۇلاعان مۇنارانىڭ جاعدايى ارنايى ساراپتامادان سوڭ بەلگىلى بولادى. ءتيىستى مەكەمەلەرگە، مەردىگەر ۇيىمعا حابارلاستىق. وبلىستان ماماندار شاقىرتىلدى. اپاتتىڭ ناقتى سەبەبىن سول كىسىلەر ايتادى. ەڭ باستىسى، قازىر اۋىل اۋىز سۋسىز وتىرعان جوق، – دەدى اۋىل اكىمى.

        

سوڭعى جاڭالىقتار

ۇقساس جاڭالىقتار