ۋەين 1961 جىلدىڭ 26 قاڭتارىندا كانادانىڭ ونتاريو شتاتىنا قاراستى برانفورد قالاسىندا تۋدى. 1978-1999 جىلدار ارالىعىندا «ەدمونتون ويلەرز», «لوس-اندجەلەس كينگز», «سەنت-لۋيس بليۋز» جانە «نيۋ-يورك رەيندجەرەس» كلۋبارى ساپىندا ونەر كورسەتكەن ول كوپتەگەن تولاعاي تابىستار مەن رەكوردتىق كورسەتكىشكە قول جەتكىزدى. اتاپ ايتساق, كانادا كۋبوگىن – ءۇش, ستەنلي كۋبوگىن – ءتورت رەت ۇتتى. ۇلتتىق حوككەي ليگاسىنىڭ ەڭ قۇندى ويىنشىسى اتاعىن توعىز رەت يەلەنسە, ەڭ مەرگەن شابۋىلشىعا تيەسىلى ارنايى سىيلىقتى 10 مارتە ولجالادى. ءتۇرلى سايىستاردا 61 رەكوردتى جاڭارتتى. «جۇلدىزدار ماتچىندا» التى مارتە ونەر كورسەتىپ, 14 گولدىڭ اۆتورى اتاندى. بۇل دا رەكورد! ۇحل-دا بارلىعى 1487 رەت مۇز ايدىنىنا شىعىپ, 894 گول سوقتى. تاعى 1 963 رەت ناتيجەلى پاس بەردى.
كەزىندە الەمنىڭ ەڭ ۇزدىك حوككەيشىسىنىڭ ءبىرى سانالعان مارك مەسسەنىڭ ءوزى ايتۋلى ازاماتتى «ەندى گرەتتسكيدەي ويىنشىنىمەن قايتا قاۋىشۋىمىز نەعايبىل. ول ءجۇز ەمەس, مىڭ جىلدا ءبىر قايتالاناتىن كەرەمەت قۇبىلىس!» دەپ باعالاعان ەدى.
1999 جىلى 38 جاستاعى ۋەين گرەتتسكي ۇلكەن سپورتتان قول ۇزگەننەن كەيىن ونىڭ ەسىمى حوككەي داڭقى زالىنا التىن ارىپتەرمەن جازىلدى. 2006-2009 جىلدار ارالىعىندا داڭقتى ويىنشى «فينيكس كويوتيس» كلۋبىن جاتتىقتىردى. قازىرگى كەزدە گرەتتسكي بيزنەستىڭ بەل ورتاسىندا ءجۇر.
