بىلتىر تامىز-قىركۇيەك ايلارىنىڭ باسىندا ەلىمىزدىڭ ۆەتەرينارلىق باقىلاۋ جانە قاداعالاۋ كوميتەتى رەسەي فەدەراتسياسىنىڭ كەيبىر ايماقتارىنان قازاقستان اۋماعىنا ءتىرى قۇس پەن قۇس شارۋاشىلىعى ونىمدەرىن الىپ كەلۋگە جانە ولاردىڭ ترانزيتىنە ۋاقىتشا شەكتەۋ ەنگىزگەن ەدى. بىراق سالالىق مينيسترلىك تاراپىنان جۇرگىزىلگەن جەدەل شارالارعا قاراماستان جوعارى پاتوگەندى قۇس تۇماۋى ەلىمىزدىڭ 8 وڭىرىنە جابايى قۇستاردىڭ قونىس اۋدارۋى سالدارىنان تاراعان بولاتىن.
ەپيزووتياعا قارسى ءىس-شارالاردىڭ اياقتالۋىنا وراي جانە قۇستار ءولىم-ءجىتىمىنىڭ جاڭا جاعدايلارى تىركەلمەگەندىكتەن قازىر وسى وڭىرلەردە كارانتين الىنىپ تاستالدى.
اۋرۋ وشاقتارىن وقشاۋلاۋ جانە جويۋعا بايلانىستى ءىس-شارالار بارىسىندا 1,9 ملن قۇس جويىلدى, ونىڭ 97%-ى 4 قۇس فابريكاسىنا تيەسىلى.
2020 جىلدىڭ جەلتوقسانىندا ۆەتەرينارلىق باقىلاۋ جانە قاداعالاۋ كوميتەتىنىڭ «رەسپۋبليكالىق ەپيزووتياعا قارسى وترياد» كاسىپورنى ورتاشا ايلىق نارىق قۇنى بويىنشا ىندەتتىڭ كەسىرىنەن شىعىنعا ۇشىراعان قۇس يەلەرىنە وتەماقى تولەۋ جۇمىستارىن جۇرگىزدى.
ۆەتەرينارلىق-سانيتارلىق قاعيدالارعا سايكەس, تاركىلەنگەن جانە جويىلعان قۇستاردىڭ قۇنىن وتەۋ «جوعارى پاتوگەندى قۇس تۇماۋى» ىندەتىنەن ولگەنىن راستايتىن قۇجاتتار نەگىزىندە اتقارىلدى. قۇجات بولماعان جاعدايدا تولەم جۇرگىزىلمەيتىنىن ەسكەرتتى ۆەدومستۆو وكىلدەرى.
«بارلىق ۇسىنىلعان قۇجات بويىنشا تولەم تولىق كولەمدە جۇرگىزىلدى. اتاپ ايتقاندا, جەكە قوسالقى شارۋاشىلىقتارعا 94 470 باس ءۇشىن 295,3 ملن تەڭگە تولەندى. «اگروينتەرپتيتسا» جشس-نا 433 066 قۇس ءۇشىن 445,9 ملن تەڭگە بەرىلدى», دەلىنگەن تاراتىلعان اقپاراتتا.
قۇزىرلى ورگاننىڭ مالىمەتىنە سۇيەنسەك, بۇگىندە ۆەتەرينارلىق باقىلاۋ جانە قاداعالاۋ كوميتەتىنىڭ «رەسپۋبليكالىق ەپيزووتياعا قارسى وترياد» كاسىپورنىندا تولەنبەگەن قارىز قالعان جوق.
