كەشە ەلورداداعى قازاق ۇلتتىق ونەر ۋنيۆەرسيتەتىنىڭ «شابىت» شىعارماشىلىق سارايىندا ءبىلىم جانە عىلىم سالاسى بويىنشا مەملەكەتتىك جانە ۆەدومستۆولىق ماراپاتتاردى تاپسىرۋ ءراسىمى ءوتتى.
كەشە ەلورداداعى قازاق ۇلتتىق ونەر ۋنيۆەرسيتەتىنىڭ «شابىت» شىعارماشىلىق سارايىندا ءبىلىم جانە عىلىم سالاسى بويىنشا مەملەكەتتىك جانە ۆەدومستۆولىق ماراپاتتاردى تاپسىرۋ ءراسىمى ءوتتى.
ماراپاتتاۋ راسىمىندە ءسوز العان ءبىلىم جانە عىلىم ءمينيسترى اسلان ءسارىنجىپوۆ ەلباسىنىڭ باستاماسىمەن قولعا الىنعان ءبىلىم سالاسىنداعى جوبالار قازاقستاندىق ءبىلىمنىڭ جۇيەلى دامۋىنا اسەر ەتكەنىن باياندادى. «پرەزيدەنتتىڭ «بولاشاق» باعدارلاماسى – ونىڭ ايقىن ءدالەلى. بۇگىنگى كۇنى نازارباەۆ زياتكەرلىك مەكتەپتەرى وڭىرلەردەگى يننوۆاتسيالاردىڭ رەسۋرستىق ورتالىقتارى بولىپ تابىلادى. ولار ءوز ءتاجىريبەلەرىن ەلىمىزدىڭ مەكتەپتەرىنە تاراتۋدا.
تەحنيكالىق جانە كاسىپتىك ءبىلىم بەرۋ جۇيەسىندە «كاسىپقور» حولدينگى» الەمدەگى الدىڭعى قاتارلى تاجىريبەلەردى ەنگىزەتىن جۇيەلى وپەراتور رەتىندە جۇمىس ىستەيدى» – دەگەن مينيستر عىلىمنىڭ باستى مىندەتى – عىلىمي زەرتتەۋلەردىڭ تيىمدىلىگى مەن ساپاسىن ارتتىرۋ ەكەنىن اتاپ ءوتتى. ول جوعارى ءبىلىم بەرۋ جۇيەسىندە جاڭا, بىرەگەي الەمدىك دەڭگەيدەگى جوبا – نازارباەۆ ۋنيۆەرسيتەتىنىڭ قۇرىلىپ, تابىستى دامۋىنا كۋا بولىپ وتىرعانىمىزدى, ۋنيۆەرسيتەتتىڭ ەلىمىزدەگى باسقا دا الدىڭعى قاتارلى جوعارى وقۋ ورىندارىن دامىتۋ ءۇشىن ءبىلىم, عىلىم جانە يننوۆاتسيانى سينتەزدەۋگە باعىتتالعان «بولاشاق مودەلى» ەكەنىن دە باياندادى.
«بۇگىندە مەكتەپكە دەيىنگى, ورتا, كاسىپتىك جانە جوعارى ءبىلىم, عىلىم جانە جاستار ساياساتى جاڭا باعىت الدى. ودان ءارى دامۋدىڭ نەگىزگى جولدارى انىقتالدى. الداعى ءۇش جىلعا ارنالعان ءبىلىم بەرۋدى دامىتۋدىڭ نەگىزگى باسىمدىقتارى ۇكىمەت تاراپىنان قولداۋ تاپتى» دەگەن مينيستر ءبىلىم جانە عىلىم سالاسى بويىنشا بيىلعى ماراپاتتاۋلارعا لايىق بولعان وتانداستارىمىزعا ناگرادالارىن تاپسىردى.
سونىمەن, بيىل ءبىلىم ءجانە عىلىم سالاسى بويىنشا «پاراسات» وردەنىمەن ت.رىسقۇلوۆ اتىنداعى قازاق ەكونوميكالىق ۋنيۆەرسيتەتىنىڭ پروفەسسورى كەڭەس بەرداليەۆ, ق.ساتباەۆ اتىنداعى قازاق ۇلتتىق تەحنيكالىق ۋنيۆەرسيتەتىنىڭ كافەدرا مەڭگەرۋشىسى بايان راقىشەۆ ماراپاتتالدى. II دارەجەلى «دوستىق» وردەنىن قازاق ۇلتتىق ونەر ۋنيۆەرسيتەتىنىڭ كافەدرا مەڭگەرۋشىسى, بەلگىلى ءانشى قايرات بايبوسىنوۆ يەلەندى. ءال-فارابي اتىنداعى قۇۋ پروفەسسورى اجار جۇبانوۆا, اباي اتىنداعى قۇپۋ پروفەسسورى نينا يشمۇحامەدوۆا, «ۇلتتىق عىلىمي مەديتسينالىق ورتالىعى» اق بالالار كارديوحيرۋرگيا ءبولىمىنىڭ باسشىسى دميتري گوربۋنوۆ, ت.رىسقۇلوۆ اتىنداعى قازاق ەكونوميكالىق ۋنيۆەرسيتەتىنىڭ رەكتورى سەرىك سۆياتوۆ, «پاراسات» ۇلتتىق عىلىمي-تەحنولوگيالىق حولدينگى باسقارما توراعاسىنىڭ ورىنباسارى ءلاززات مىلتىقباەۆانىڭ وڭىرلەرىنە «قۇرمەت» وردەنى تاعىلدى. سونداي-اق, ءبىلىم جانە عىلىم سالاسى بويىنشا بىرقاتار پروفەسسورلار مەن وقىتۋشىلار «ەرەن ەڭبەگى ءۇشىن» مەدالىمەن, «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعىمەن, قازاقستان رەسپۋبليكاسىنىڭ قۇرمەت گراموتاسىمەن, قازاقستان حالقى اسسامبلەياسىنىڭ قوعامدىق «بىرلىك» التىن مەدالىمەن ماراپاتتالدى.
ايگۇل سەيىلوۆا,
«ەگەمەن قازاقستان».
