الايدا, ايماقتاعى كارانتين شەكتەۋىنىڭ كۇشەيتىلگەنىنە قاراماستان سانيتارلىق تالاپتاردى ورەسكەل بۇزعان قوعامدىق قىزمەت كورسەتۋ ورىندارى ازاماي وتىر. مىسالى, تالدىقورعان قالاسىندا كارانتين شەكتەۋىنە پىسقىرماي, جۇمىسىن جالعاستىرىپ كەلگەن شاعىن جانە ورتا بيزنەس ورىندارىنا قاتىستى 8 وقيعا تىركەلىپتى. ونىڭ ىشىندە 2 قوعامدىق تاماقتانۋ ورىنى جانە 6 مونشا بار. تەكسەرۋ بارىسىندا بۇل ورىنداردا سانيتارلىق تالاپتاردىڭ ساقتالماعانى انىقتالعان. سونداي-اق قاپشاعاي قالاسىنداعى كازينولاردىڭ اراسىندا دا كارانتين شەكتەۋلەرىنە باعىنباي وتىرعاندار بار ەكەن. قالالىق پوليتسيا باسقارماسى ارنايى رەيد جۇرگىزىپ, وسىنداعى ويىنحانالاردىڭ ءبىرىنىڭ جاسىرىن جۇمىس ىستەپ تۇرعانىن انىقتاعان.
- قاپشاعاي قالاسىنىڭ پوليتسيا قىزمەتكەرلەرى كوروناۆيرۋس تارالۋىنىڭ الدىن الۋ ماقساتىندا ەنگىزىلگەن كارانتين شەكتەۋلەرىنە قاراماستان زاڭسىز جۇمىس ىستەگەن كازينونى انىقتاپ, ايىپپۇل سالدى. باس سانيتار دارىگەردىڭ قاۋلىسىنا سايكەس, ەلىمىزدەگى ويىنحانالاردىڭ جۇمىسىنا تىيىم سالىنعان. الايدا قالادا ءبىر كازينونىڭ قۇپيا جاعدايدا جۇمىس ىستەگەنى انىقتالدى. تەكسەرۋ كەزىندە كازينودا 60 ادام وتىردى. اتالعان دەرەك بويىنشا جينالعان فوتو, بەينەماتەريالدار شارا قابىلداۋ ءۇشىن ءتيىستى ورگانعا جىبەرىلدى, - دەيدى قاپشاعاي قالالىق پوليتسيا ءبولىمىنىڭ وكىلى.
ەندى كازينو يەسى كارانتين تالاپتارىن بۇزعانى ءۇشىن 900 مىڭ تەڭگە كولەمىندە ايىپپۇل تولەۋى ءتيىس.
