قوعام • 21 قاڭتار، 2021

ءتارتىپ ساقشىسىنا كۇش قولدانعان ازامات 5 جىلعا سوتتالدى

28 رەت كورسەتىلدى

اقمولا وبلىسىندا بيلىك وكىلىنىڭ زاڭدى تالاپتارىنا باعىنباي، كولىگىمەن پوليتسيا قىزمەتكەرىن سوعىپ، كۇش قولدانعان ازامات 5 جىلعا باس بوستاندىعىنان ايىرىلدى، – دەپ حابارلايدى Egemen.kz Polisia.kz. سايتىنا سىلتەمە جاساپ.

ەستەرىڭىزگە سالا كەتەيىك، 2020 جىلدىڭ 14 اقپانىندا ساعات 15:00-دە “ەكاتەرينبۋرگ-الماتى” اۆتوجولىنىڭ 917 شاقىرىمىندا ورنالاسقان  جاقسى اۋدانى جاقسى كەنتىنىڭ ماڭىندا “قاۋىپسىز جول” جەدەل-الدىن الۋ ءىس-شاراسىن وتكىزۋ بارىسىندا اقمولا وبلىسى پد پپب 4-ۆزۆودىنىڭ ينسپەكتورلارى “Chevrolet Aveo” ماركالى اۆتوكولىگىن توقتاتقان. كولىك تىزگىنىندە وتىرعان جاقسى كەنتىنىڭ 24 جاستاعى تۇرعىنى بولىپ شىقتى.

كەيىن بەلگىلى بولعانداي، ەر ادام جاقسى اۋداندىق سوتىنىڭ ۇكىمىمەن الكوگولدىك جانە ەسىرتكىلىك ماساڭ كۇيدە كولىك جۇرگىزگەنى ءۇشىن كولىك باسقارۋ قۇقىعىنان ءۇش رەت ايىرىلعان.

پوليتسيا قىزمەتكەرلەرى اكىمشىلىك قۇقىق بۇزۋشىلىقتىڭ جولىن كەسۋ جانە ادامداردىڭ ءومىرى مەن دەنساۋلىعىنا تىكەلەي قاۋىپتىڭ الدىن الۋ ءۇشىن قۇقىق بۇزۋشىنى جاقسى اۋدانىنىڭ پوليتسيا ءبولىمىنىڭ عيماراتىنا جەتكىزدى.

پوليتسيا ءبولىمىنىڭ عيماراتىندا پوليتسيا قىزمەتكەرى ەر ادامعا قاتىستى كولىك كۇرالىن باسقارۋ قۇقىعىنان ايىرىلعان ادامنىڭ كولىك باسقارۋ دەرەگى بويىنشا اكىمشىلىك قۇقىق بۇزۋشىلىق تۋرالى حاتتاما تولتىرعان.

حاتتاما تولتىرۋ بارىسىندا “Chevrolet Aveo” ماركالى اۆتوكولىگىنىڭ ارشالى اۋىلىنىڭ 40 جاستاعى تۇرعىنىنا تيەسىلى ەكەنى انىقتالدى. سونداي-اق، ونىڭ كولىگىن اپكەسىنە سەنىپ تاپسىرعانى بەلگىلى بولدى.

ەر ادامنىڭ بۇرىن كولىك قۇرالىن باسقارۋ قۇقىعىنان ايىرىلعاندىعىن، ءاۆتوموبيلدىڭ مەنشىك يەسى ەمەس ەكەنىن جانە وزىمەن بىرگە كولىك قۇرالىنا ارنالعان تىركەۋ جانە زاڭنامادا بەلگىلەنگەن وزگە دە قۇجاتتارى جوق ەكەنىن ەسكەرە وتىرىپ، ءتارتىپ ساقشىلارى قر اقبتك-ءنىڭ 785-بابىنىڭ، 796-بابىنىڭ، 797-بابى ءبىرىنشى بولىگىنىڭ 1) تارماقشاسىنىڭ تالاپتارىن باسشىلىققا الا وتىرىپ، اكىمشىلىك قۇقىق بۇزۋشىلىق تۋرالى ءىس بويىنشا ءىس جۇرگىزۋدى قامتاماسىز ەتۋ شارالارىن قابىلداپ، ونى كولىك قۇرالىن باسقارۋدان شەتتەتۋ تۋرالى  حاتتاما تولتىردى.

ودان كەيىن پوليتسەيلەر ۋاقىتشا ساقتاۋ ءۇشىن ارنايى تۇراققا ورنالاستىرۋ ماقساتىندا “Chevrolet Aveo” اۆتوكولىگىن الۋ اكتىسىن تولتىرا باستاعان.

قاسكۇنەم وسى ساتتە “Chevrolet Aveo” اۆتوكولىگىنىڭ كىلتىن الىپ، پوليتسيا ءبولىمىنىڭ عيماراتىنان كوشەگە شىعىپ، عيمارات الدىندا تۇرعان اۆتوكولىكتىڭ رولىنە وتىرعان.

كولىككە قاراي جۇگىرگەن پوليتسيا قىزمەتكەرى جۇرگىزۋشىنىڭ ەسىگىن اشۋعا تىرىسقان، الايدا ەسىك ىشىنەن ق ۇلىپتالعاندىقتان، اشا الماعان.

قۇقىق بۇزۋشىنى توقتاتۋ جانە ونىڭ كولىك باسقارۋىنا جول بەرمەۋ ءۇشىن پوليتسيا قىزمەتكەرى كولىكتىڭ الدىنا شىققان. ەر ادام پوليتسيا ينسپەكتورىن اينالىپ ءوتۋ جانە توقتاتۋ بويىنشا ارەكەت جاساماي، كولىگىمەن پوليتسيا قىزمەتكەرىن قاعىپ، دەنە جاراقاتىن كەلتىرگەن. سوققى سالدارىنان پوليتسيا قىزمەتكەرى اۆتوكولىكتىڭ كاپوتىنا قۇلاعان.

وسىلايشا، قاسكۇنەم پوليتسيا قىزمەتكەرلەرىنىڭ زاڭدى تالاپتارىنا  باعىنباي، قارسىلىق كورسەتكەن. ولارعا قارسى بىلاپىت سوزدەر ايتقان. ساراپتاما ناتيجەلەرى بويىنشا ونىڭ ماريحۋانا تۇتىنعانى انىقتالدى.

ەڭ قىزىعى، قۇقىق بۇزۋشى بولىپ جاتقاننىڭ ءبارىن ۇيالى تەلەفونىنىڭ كامەراسىنا ءتۇسىرىپ وتىرعان. ونىڭ ۇستىنە، ول ءتىپتى ۇستاۋ كەزىندە دە ءتۇسىرۋدى توقتاتپاعان.

اتالعان فاكت بويىنشا سوت شەشىمىمەن 24 جاستاعى ازامات قر قك-ءنىڭ 380-بابى (بيلىك وكiلiنە قاتىستى كۇش قولدانۋ)،  378-بابى (بيلىك وكىلىن قورلاۋ) بويىنشا كىنالى دەپ تانىلىپ، بەس جىلعا باس بوستاندىعىنان ايىرىلدى.

سوڭعى جاڭالىقتار

يتاليادا توعىز جۇلدە الدىق

سپورت • بۇگىن، 10:10

ءار سالا ۇزدىكتەرىنە قۇرمەت تانىتتى

ايماقتار • 05 ناۋرىز، 2021

باعدات مۋسين شىمكەنتكە باردى

ايماقتار • 05 ناۋرىز، 2021

ۇقساس جاڭالىقتار