بۇل الداعى ۋاقىتتا پارتيالار اراسىنداعى ساياسي باسەكەنى كۇشەيتە تۇسەرى انىق. پارلامەنتكە وتە الماي قالعان پارتيالار, بولاشاقتا قۇرىلۋى مۇمكىن ساياسي ۇيىمدار بارىن ەسكەرسەك, ولار ءۇشىن بەس پايىزدىق مەجە ۇلكەن مۇمكىندىكتەرگە جول اشادى.
اتالعان ۇسىنىستاردىڭ ىشىندە اۋىل اكىمدەرىن سايلاۋدى ەرەكشە ىقىلاسپەن اتاپ وتكىم كەلەدى. اۋىل حالقىنا ءوز اكىمىن تاڭداۋعا جول اشۋ – يگى باستاما. ويتكەنى سايلانعان اكىم سول ەلدى مەكەننىڭ تۇرعىندارىنا تولىق جاۋاپكەرشىلىك الىپ, ولاردىڭ الدىندا جاۋاپ بەرەتىن بولادى. بۇل جەرگىلىكتى اكىمدەردىڭ قوعام, حالىق الدىنداعى ەسەپ بەرۋ مەحانيزمىن ودان ءارى جەتىلدىرە تۇسپەك. سونىمەن قاتار الداعى ۋاقىتتا اۋىل اكىمدەرىن سايلاۋ پروتسەسى تيىمدىلىگىن كورسەتەتىن بولسا, بۇل رەفورما وزگە دەڭگەيدەگى اكىمدەردى سايلايتىن جۇيەگە ءبىر قادام جاقىنداتا تۇسەدى. ماسەلەن, اۋدان اكىمدەرىن دە سايلاۋ ارقىلى تاڭداۋعا بولار ەدى. بايقاعانىمىزداي, قازاقستان ساياسي رەفورمالاردى جۇزەگە اسىرۋ بارىسىندا ەۆوليۋتسيالىق جولمەن سابىرلى ءارى ساتىلى ساياساتتى ۇستانىپ وتىر.
ودان بولەك مەملەكەت باسشىسىنىڭ ونلاين-پەتيتسيا جۇيەسىن ىسكە قوسۋ تۋرالى باستاماسى دا «حالىق ۇنىنە قۇلاق اساتىن مەملەكەت» تۇجىرىمداماسىنىڭ قاعيداتتارىنا تولىق ساي ەكەنىن ايتا الامىن. وسىلايشا, حالىقتى تولعاندىرعان ماسەلەلەر اۋداندىق, وبلىستىق, ءتىپتى رەسپۋبليكالىق دەڭگەيدە نازارعا الىنىپ, ءوز شەشىمىن تاباتىن بولادى. قوعامدا قىزۋ تالقىلاناتىن ماسەلەلەردى انىقتاۋ ارقىلى دا حالىقتىڭ كوڭىل كۇيىن, وزەكتى تاقىرىپتار مەن رەفورما جۇرگىزۋ كەرەك سالالاردى انىقتاۋعا مۇمكىندىك بەرەدى. كەيبىر ماسەلەلەردى جەرگىلىكتى اتقارۋشى ورگاننىڭ, مينيسترلىكتىڭ, ءتىپتى پارلامەنتتىڭ دەڭگەيىندە دە كوتەرۋگە بولار ەدى.
مەملەكەت باسشىسى ازاماتتىق قوعامنىڭ دامۋىنا قاتىستى ماسەلەلەردى دە كوتەردى. ۇكىمەتتىڭ, بيلىكتىڭ قىزمەتىنە قوعامدىق باقىلاۋدىڭ كۇشەيۋى – قازاقستاننىڭ ساياسي جاڭعىرۋعا بەت العاندىعىنىڭ ايعاعى. قايىرىمدىلىقپەن اينالىساتىن ازاماتتاردى ىنتالاندىرۋ دا وزەكتى. وسىنداي ۇسىنىستاردىڭ زاڭنامالىق تۇرعىدا بەكىتىلىپ, ىسكە اسىرىلۋى ەلىمىزدەگى كەي سالالاردىڭ قارقىنداپ دامۋىنا جول اشپاق.
باۋىرجان سەرىكباەۆ,
ەۋرازيالىق ينتەگراتسيا ينستيتۋتىنىڭ ساراپشىسى
