بۇدان بىلاي ءبىلىم سالاسىنا بولىنگەن بيۋدجەت قاراجاتىن اكىمشىلىك رەتتەۋ مىندەتىن دە بۇرىنعىداي جەرگىلىكتى اكىمدىكتەر ەمەس, وبلىستىق باسقارما اتقارادى. بۇل ماسەلە قوستاناي وبلىسى اكىمدىگىندە وتكەن كەڭەستە قارالىپ, بيىل قاڭتار ايىنان باستاپ كۇشىنە ەنگەن ء«بىلىم تۋرالى» زاڭداعى جاڭالىقتارعا وراي, سالاداعى قۇرىلىمدىق وزگەرىستەردى جۇزەگە اسىرۋ بارىسى پىسىقتالدى.
كەڭەس بارىسىندا وبلىس اكىمى ارحيمەد مۇحامبەتوۆ ايماقتا 565 ءبىلىم بەرۋ مەكەمەسى ءبىلىم باسقارماسىنىڭ قۇزىرىنا وتكەنىن مالىمدەدى.
– ونىڭ ىشىندە 489 جالپى ءبىلىم بەرەتىن مەكتەپ, 124 مەكتەپكە دەيىنگى مەكەمە, 43 قوسىمشا ءبىلىم بەرۋ مەكەمەسى بار. وسىعان بايلانىستى, قازىر ادىلەت ورگاندارى قۇقىق بەلگىلەيتىن قۇجاتتاردى تىركەۋ بويىنشا جۇمىس جۇرگىزىپ جاتىر.
قالالىق جانە اۋداندىق اكىمدىكتەر جەرگىلىكتى ءبىلىم بەرۋ مەكەمەلەرىنە قاجەتتى كومەك پەن قولداۋ كورسەتەتىن بولادى. سونىمەن قاتار, اۋدان اكىمدىكتەرىنىڭ بىرقاتار قۇزىرەتى ساقتالىپ قالادى. مىسالى, جەتىم بالالاردى مىندەتتى جۇمىسقا ورنالاستىرۋ جانە تۇرعىن ۇيمەن قامتاماسىز ەتۋ, تۇلەكتەردىڭ جۇمىسقا ورنالاسۋىنا كومەك بەرۋ, اۋىلدىق جەرگە جۇمىسقا كەلگەن جاس مۇعالىمدەردى باسپانامەن قامتىپ, تۇرمىستىق قولداۋ كورسەتۋ مىندەتى جەرگىلىكتى اكىمدىكتەرگە جۇكتەلەدى.
جيىن سوڭىندا ءوڭىر باسشىسى قالالىق جانە اۋداندىق اكىمدىكتەرگە ءبىلىم بولىمدەرىن وبلىستىق باسقارما قۇزىرىنا تاپسىرۋ ءىسىن مەرزىمىندە اياقتاۋدى تاپسىردى.
قوستاناي وبلىسى
