قالا تۇرعىندارىنىڭ بەيبىت ءومىرىن قامتاماسىز ەتۋشى جاۋىنگەرلەر قىزمەت ەتەتىن 5573 اسكەري ءبولىمى – اسكەردىڭ ەڭ ەليتالى جەدەل قۇراماسى. بۇل قۇرامانىڭ جەكە قۇرامى جان-جاقتى باعىتتاعى مىندەتتەردى اتقارۋعا جۇمىلدىرىلادى. قالاشىقتىڭ اۋماعى مەن قارۋ-جاراق قويماسىن كۇزەتەتىن ىشكى قاراۋىل, جارىلعىش زاتتار, ەسىرتكى ىزدەگىش جانە قىلمىسكەردىڭ ءىزىن كەسۋشى قىزمەتتىك يتتەردى دايىندايتىن كينولوگيالىق ورتالىق, ماڭىزدى رەسمي ءىس-شارالار مەن سالتاناتتى ءراسىم كەزىندە, اسكەري داستۇرلەردە ايرىقشا قىزمەت اتقاراتىن قۇرمەت قاراۋىل روتاسى بار. اسكەردىڭ ءان-بي ءانسامبلى مەن وركەسترى, حورەوگرافيا جانە حور ۇجىمدارى, ورتالىق مۇراجايى دا قالاشىق بازاسىندا ورنالاسقان.
قۇرامانىڭ جاڭا تەحنولوگيالارمەن جابدىقتالعان مادەنيەت ورتالىعى مەن لازارەتى, اتۋ ءتيرى, ءۇش زالدان تۇراتىن سپورت كەشەنى بار. مۇنىڭ ءبارى جەكە قۇرامنىڭ جاۋىنگەرلىك دايىندىعىن ۇزدىكسىز شىڭداۋعا, موبيلدەندىرۋگە جاسالعان جاعداي دەپ بىلگەن ءجون. توتەنشە جاعدايلار كەزىندە جەكە قۇرام دابىل قاعىلىسىمەن وقيعا ورنىنا اتتانۋعا نەمەسە ءتيىستى مىندەتتى ورىنداۋعا جەدەل جاساقتالادى. دەگەنمەن, اسكەري قىزمەتشىلەردىڭ نەگىزگى مىندەتى – كۇندەلىكتى قوعامدىق ءتارتىپ پەن قاۋىپسىزدىكتى قامتاماسىز ەتۋ. بۇگىن ءبىز جەدەل ماقساتتاعى باتالونداردىڭ قىس مەزگىلىندەگى قىزمەتى جايلى ءسوز ەتپەكپىز.
قىزمەتكە شىعاتىن كۇنى اسكەري جاساقتاردىڭ باعىتتارى ايقىندالىپ, ساربازدار كيىم-كەشەكتەرىن الدىن الا سايلاپ قويدى. «اس – ادامنىڭ ارقاۋى» دەمەكشى, قىزمەت الدى كۇش جيناپ, جاقسىلاپ اۋقاتتانىپ الدى. قالاشىق پلاتسىندا اسكەري جاساقتار كەزەكشىسى, پاترۋلدىك توپ باستىقتارى مەن كولىكتەگى پاترۋلدەر جانە اسكەري باعدارلاردىڭ دايىندىعى, قۇرال-جابدىقتارىنىڭ بۇتىندىگى تەكسەرىلدى. قۇراما كومانديرى, پولكوۆنيك نۇرلان مۇحامەدوۆتەن بۇيرىق العان جەكە قۇرام ءبولىمنىڭ كولىك پاركىنە ساپپەن بەت الدى.
بۇل ۋاقىتتا قىزمەتتىك تەحنيكالاردىڭ جۇرگىزۋشىلەرى قالا ىشىندە قوزعالۋ رۇقساتنامالارىن الىپ, جانار-جاعارمايىن قۇيىپ, تەحنيكالىق احۋالىن تەكسەرىپ, كولىكتى جىلىتىپ جەكە قۇرامدى كۇتىپ تۇرعان بولاتىن. باعىت – اۋداندىق پوليتسيا باسقارمالارى. جارتى ساعاتتا ءتيىستى نىساندارعا جەتكەن 1 جانە 2-جەدەل ماقساتتاعى باتالون جاۋىنگەرلەرىنە قالانىڭ ەسىل, الماتى اۋداندارىنداعى پوليتسيا باسقارمالارىنىڭ باسشىلارى قوعامدىق ءتارتىپتى قامتاماسىز ەتۋدى جانە قىزمەت بارىسىندا زاڭسىزدىقتارعا جول بەرمەۋدى, وزدەرىنە جۇكتەلگەن مىندەتتى ۇلكەن جاۋاپكەرشىلىكپەن اتقارۋدى تاپسىردى.
– قىزمەت بابىندا ءتۇرلى جايتتار ورىن الىپ جاتادى. سونىسىمەن دە ۇنايدى. سەبەبى كەيدە جوعالعان زاتتاردى تاۋىپ الىپ, يەلەرىنە قايتارىپ, العىسقا بولەنەسىڭ. مۇنداي كۇندەرى كوڭىلىڭ كوتەرىلىپ, كەۋدەڭدى ماقتانىش سەزىمى كەرنەيدى. ءبىر پايداعا جاراعانىڭا, جاقسىلىق جاساعانىڭا, قىزمەت ەتە ءجۇرىپ ساۋاپ جيناعانىڭا, بىرەۋدىڭ شىن كوڭىلمەن راحمەت ايتقانىنا قۋاناسىڭ. ەندى بىردە ۇرىنىڭ ىزىنە ءتۇسىپ, قولعا تۇسىرەمىز. ىزدەۋدە جۇرگەندەردى, سۋىق قارۋى بار ازاماتتاردى, ناشاقورلاردى, ادام زورلاماق بولعانداردى قۇرىقتايمىز. ياعني بۇرىن-سوڭدى ءدال مۇنداي مىندەت اتقارىپ كورمەگەن ءبىز ءۇشىن بۇل ۇلكەن جاۋاپكەرشىلىك. قىسقاسى, «وتان قورعاۋشى» ءسوزىنىڭ بايىبىن ءتۇسىنىپ جاتىرمىز, – دەيدى بەكزات تاڭسىقباي.
بەكزات تۇركىستان وبلىسى سارىاعاش اۋدانى قىزىلاسكەر اۋىلىنىڭ تۋماسى. قالا تىنىشتىعىن قورىپ جۇرگەنىنە توعىز اي بولىپتى. ال جاساقتى باسقارعانىنا جارتى جىلدان اسقان. اسكەرگە كەشە عانا بۋىنى قاتايا قويماعان بوزبالا كۇيدە كەلگەن ول بۇگىندە ەسەيىپ, قاراماعىنداعى كومەكشى پاترۋلدەرىنە جول كورسەتىپ, ءوزىنىڭ ۇلكەندىگىن تانىتىپ ءجۇر. اسكەري جاساق باستىعىنىڭ قوعامدا ءوز ءرولى بار ەكەنىن جاقسى تۇسىنەدى. ءسوزى نىق. بويى تىك. مۇنداي قاسيەت پەن قابىلەت تاجىريبە مەن جاۋىنگەرلىك دايىندىقتىڭ ناتيجەسىندە قالىپتاسادى.
قاسىنداعى ءپاترۋلدىڭ ءبىرى قاتارداعى اسحات تاجەن قىزىلوردا قالاسىنان شاقىرىلعان ەكەن. بۇعان دەيىن ءدال وسى 5573 اسكەري بولىمىندە نۇرلان قوجاحمەت جانە رۋسلان قوجاحمەت ەسىمدى تۋىس اعالارى 2015 جانە 2017 جىلدارى وتان الدىنداعى بورىشىن وتەپتى. سولاردىڭ اسكەر تۋرالى اڭگىمەلەرىن, ەستەلىكتەرىن ەستىگەن اسحات ەرتەرەك سارباز اتانۋعا اسىققان كورىنەدى.
جاۋىنگەرلەردىڭ ۋاقىتىن المايىق دەپ كەلەسى باعىتقا قاراي بەت الدىق. ۇشتىككە ەندى جاقىنداي بەرگەندە, قاسىمىزعا «ۇلتتىق ۇلان» دەگەن جازۋى مەن اسكەري سيمۆوليكاسى بار كولىك كەلىپ توقتادى. جاساق باستىعى قولىن شەكەسىنە قويىپ, كولىكتەن تۇسكەن اسكەري قىزمەتشىگە جاعدايدى باياندادى. سول كۇنگى اسكەري جاساقتار بويىنشا كەزەكشىلىك ەتىپ جۇرگەن وفيتسەر 4-جەدەل ماقساتتاعى روتانىڭ كومانديرى كاپيتان راحات ءابىلجانوۆ ەكەن.
– جارتى جىل سايىن ءبىر شاقىرىلىم كەتىپ, ءبىر شاقىرىلىم كەلىپ جاتادى. جاس ساربازدارىمىز تاجىريبەلى جاۋىنگەرگە اينالعاندا, قاتارعا جاڭادان قوسىلعاندار اسكەري ءىستىڭ قىر-سىرىمەن ەندى عانا تانىسا باستايدى. ياعني جەكە قۇرام جاڭارىپ, وزگەرگەنمەن, جاۋىنگەرلىك قىزمەت ەشقاشان توقتامايدى. ولاردىڭ قىزمەتكە تەز بەيىمدەلىپ, مىندەتىن جەتىك مەڭگەرۋى, قالىپتاسۋ كەزەڭىنە تىكەلەي بايلانىستى. وقۋ پۋنكتىندە جۇرگەندە دۇرىس باعىتتاپ, اتقاراتىن مىندەتتەرىنىڭ ماڭىزىن تۇسىندىرە بىلسەڭ, قىزمەتكە وڭ وي, جاقسى كوڭىل كۇيمەن اتتانۋىنا جاعداي جاساساڭ ناتيجەسى دە جوعارى بولادى, – دەيدى راحات ءسابيت ۇلى.
ايتا كەتەلىك, 5573 اسكەري ءبولىمىنىڭ جەكە قۇرامى نۇر-سۇلتان قالاسىنىڭ ىشكى ىستەر بولىمدەرىنە وتكەن جىلى اكىمشىلىك قۇقىق بۇزۋشىلىق جاساعان 4261 ادامدى, قىلمىستىق بەلگىلەرى بار 86 ادامدى جەتكىزدى. ولاردىڭ ىشىندە ىشىمدىك ءىشىپ, قوعامدىق ورىندا تىنىشتىق بۇزعاندار, ۇساق بۇزاقىلىق جاساعاندار, ەل اۋماعىندا زاڭسىز, قۇجاتسىز جۇرگەندەر, ىزدەۋدە جۇرگەندەر بار. سونداي-اق اسكەري جاساقتاردىڭ كومەگىمەن 36 ۇرلىق, 5 توناۋ, 6 بۇزاقىلىق, 5 الاياقتىق, 3 دەنساۋلىققا قاساقانا نۇقسان كەلتىرۋ, 19 زاڭسىز ەسىرتكى تاسىمالداۋ جانە قولدانۋ, 1 كولىك ۇرلاۋ, 1 سوققىعا جىعۋ, 5 بيلىك وكىلىنە باعىنباۋ, 4 بيلىك وكىلىنە كۇش قولدانۋ فاكتىسى اشىلعان. پروفيلاكتيكا دەگەن وسى.
ءمولدىر نالىباەۆا,
اعا لەيتەنانت
