وبلىستىق ءبىلىم باسقارماسىنىڭ باسشىسى زاۋرە بايمەنوۆا وڭىرلىك كوممۋنيكاتسيالار قىزمەتىندە وتكەن ءباسپاسوز جيىنىندا ءبىلىم بەرۋ ۇدەرىسىنىڭ ءۇشىنشى توقساندا قالاي ۇيىمداستىرىلاتىنى تۋرالى بايان ەتتى.
باسقارما باسشىسى وڭىردە جالپى سانى 31 مىڭنان استام بالا ءبىلىم الاتىن 114 مەكتەپتەگى 1-5-سىنىپتاردا 2 611 كەزەكشى توپ جۇمىس ىستەيتىنىن جەتكىزدى.
«وقىتۋدى ۇيىمداستىرۋ بىلايشا جۇرگىزىلەدى: وقۋ پاندەرىنىڭ 70%-ى مەكتەپ قابىرعاسىندا, 30%-ى قاشىقتان وقىتىلادى. مىسالى, الگەبرا, گەومەتريا, فيزيكا, حيميا, بيولوگيا, تاريح پاندەرى شتاتتىق رەجىمدە, مەكتەپ پارتاسىندا وقىتىلادى. 9, 11-سىنىپ پاندەرى بويىنشا وقۋ جوسپارىنىڭ ساعاتتارىن ءبولۋ قايتا قارالۋى مۇمكىن. جوعارى سىنىپ وقۋشىلارىنىڭ اتا-انالارىنان وتىنىشتەر تالاپ ەتىلمەيتىنىن اتاپ وتكىم كەلەدى, بۇل سىنىپتار تولىق قۇرامدا ارالاس فورماتتا وقيتىن بولادى», دەدى ز.بايمەنوۆا.
وڭىردەگى قالعان 114 مەكتەپتەگى 38 مىڭنان استام بالا قاشىقتان ءبىلىم الادى. سونىمەن قاتار اتا-انالار مەن مۇعالىمدەردىڭ كەلىسىمى بويىنشا قوسىمشا ساباقتار مەن وقۋشىعا جەكە كەڭەس بەرۋ ءۇشىن شاعىن توپتار اشىلۋى مۇمكىن. مۇنداي توپتارداعى وقۋشى سانى بەس بالادان اسپايتىن بولادى.
وبلىستاعى كوللەدجدەر دە ءبىلىم بەرۋ فورماتىن وزگەرتتى. ەكىنشى سەمەستردەن باستاپ وڭىردەگى كاسىبي ءبىلىم بەرەتىن وقۋ وشاقتارىنىڭ 1-كۋرس ستۋدەنتتەرى كوللەدج پارتاسىنا وتىراتىن بولادى.
قوستاناي وبلىسى
