جاڭا زاۋىت ىسكە قوسىلسا, مۇندا جىلىنا 20 مىڭ تونناعا دەيىن ەت وڭدەلەتىن بولادى. «Beef Export Group» سەرىكتەستىگىنىڭ باستاماسىمەن قولعا الىنعان اۋقىمدى جوبانىڭ قۇنى – 5,1 ملرد تەڭگە.
ايماق باسشىسى ارحيمەد مۇحامبەتوۆ جاڭا سالىنىپ جاتقان نىسانعا بارىپ, قۇرىلىس بارىسىمەن تانىستى.
«زاۋىت ىسكە قوسىلسا, 180-نەن استام جاڭا جۇمىس ورنى اشىلماق. جوبانى بيزنەستى دامىتۋ ينستيتۋتتارى قولداعانىن جانە «قاراپايىم زاتتار ەكونوميكاسى» باعدارلاماسى اياسىندا جۇزەگە اسىرىلىپ جاتقانىن اتاپ وتكەن ءجون. اتالمىش جوبا وبلىسقا كەلىپ جاتقان ەت يمپورتىن ازايتىپ, نەگىزگى شيكىزات كوزى بولىپ تابىلاتىن جەرگىلىكتى شارۋا قوجالىقتارىن دامىتۋدى كوزدەيتىنىن اتاپ وتكىم كەلەدى», دەدى وبلىس اكىمى.
ەت وڭدەۋ زاۋىتىنىڭ اكىمشىلىك-تۇرمىستىق عيماراتى, اۆتوكولىك جۋاتىن ەكى كەشەنى, سانيتارلىق-تۇرمىستىق عيماراتى مەن شەبەرحاناسى, ەت وڭدەيتىن نەگىزگى ءوندىرىس الاڭى مەن قوسىمشا ينفراقۇرىلىمدىق نىساندارى بار. زاۋىت قۇرىلعىلارى ەۋروپا ەلدەرىنەن, اتاپ ايتقاندا, پولشا, رەسەي, يتاليا مەملەكەتتەرىننە اكەلىنبەك.
قازىر زاۋىت عيماراتىنىڭ قۇرىلىسى اياقتالىپ, نەگىزگى وندىرىستىك عيماراتتا قۇرىلىس-مونتاجداۋ جۇمىستارى ءجۇرىپ جاتىر. ەت وڭدەۋ كەشەنى بيىل كۇزگە قاراي ىسكە قوسىلماق.
