وبلىستىق اسسامبلەيا جەتىنشى جىل قاتارىنان وتكىزىپ كەلە جاتقان «ميسس ەتنو-قوستاناي» بايقاۋىنىڭ 2020 جىلعى جەڭىمپازى اتانعان قىزىلگيۋل رادجابوۆا – وسى تاباساران ۇلتىنىڭ وكىلى. قىزىلگيۋل فارماتسەۆتيكالىق كومپانيادا جۇمىس ىستەيدى.
– ەڭ الدىمەن, وسى بايقاۋدى ۇيىمداستىرىپ, بىزگە كوپشىلىك الدىندا ءوز ۇلتىمىزدىڭ سالت-ءداستۇرى مەن ۇلتتىق ونەرى, اس-تاعامى, تاريحى مەن ادەت-عۇرپى تۋرالى اڭگىمەلەپ, كىشكەنتاي بولسا دا بويىمىزداعى ونەر ۇشقىنىن سىن تارازىسىنا سالۋعا مۇمكىندىك جاساپ وتىرعان وبلىستىق اسسامبلەياعا العىس بىلدىرەمىن. وسى بايقاۋ ارقىلى مەن ءوز ۇلتىم – تاباساراندار تۋرالى ەلگە ءبىراز ماعلۇمات بەردىم دەپ ويلايمىن. ماعان داۋىس بەرگەن بارشاعا ريزاشىلىعىم شەكسىز. وسى ءساتتى پايدالانا وتىرىپ, داعىستانعا تاۋداي سالەم جولدايمىن! – دەدى قىزىلگيۋل.
ونلاين تۇردە وتكەن بايقاۋعا وبلىستاعى ءاربىر ەتنومادەني بىرلەستىكتىڭ اتىنان 14 ۇمىتكەر قاتىستى. كوركىنە اقىلى ساي بويجەتكەندەر وزدەرى ازىرلەگەن ۇلتتىق تاعام تۇرلەرى مەن قولونەر تۋىندىلارىن كوپشىلىك تارازىسىنا سالدى.
ۇمىتكەرلەرگە داۋىس بەرۋ ناتيجەسى بويىنشا, گرۋزين قىزى ديانا بالانچيۆادزە ءىى ۆيتسە-ميسس اتاندى. باستاۋىش سىنىپ مۇعالىمى بولىپ جۇمىس ىستەيتىن ديانا ازىرلەگەن حينكالي, حاچاپۋري سياقتى تاۋلىقتاردىڭ ۇلتتىق اسى الەۋمەتتىك جەلىدەگى كوپشىلىكتىڭ كوڭىلىنەن شىقتى.
كوپشىلىك داۋسىمەن ءالى مەكتەپ قابىرعاسىندا وقيتىن ازەربايجان قىزى ەلۆينا راگيموۆا ءىىى ۆيتسە-ميسس اتاعىنا لايىق دەپ تانىلدى.
قوستاناي وبلىسى
