«تاۋەلسىزدىك مەرەيتوي اياسىندا ءبىر تۋار تۇلعالاردى ەسكە الىپ, ولاردىڭ مۇراسىن جاستارىمىزعا جانە بۇكىل الەمگە كەرەك» دەگەنى دە كوپشىلىكتىڭ كوڭىلىنەن شىعارى ءسوزسىز. «قۇرمەتتەپ, كوتەرمەسە كورەگەندى, قازاعىم قايدان الادى كەمەڭگەردى...» دەپ اياۋلى اقىنىمىز ايتقانىنداي, كەمەڭگەرلەرىمىزدىڭ قايراتكەرلىگىن كوككە كوتەرىپ, باعالاي بىلسەك, ەلدىك, مەملەكەتتىك مۇددەگە, تۋعان ءتىلدى تۋ ەتىپ ۇستاۋدا وزىندىك ۇستانىمدارمەن ەرەكشەلەنگەن ارداقتىلارىمىزدى ارداقتاۋ ارقىلى جاستارىمىزدىڭ بويىنا پاتريوتتىق سەزىمدى ابدەن قالىپتاستىراتىنىمىز حاق.
ءتىلشى-عالىم رەتىندە پرەزيدەنتىمىزدىڭ مەملەكەتتىك ءتىل تۋرالى ويلارى ەڭ الدىمەن ءتىل جاناشىرلارىنىڭ كوپتەن كۇتكەن ءۇمىتىنىڭ اقتالۋىنا اپارار جول ىسپەتتەس كورىندى ماعان. ويتكەنى, سوڭعى كەزدە بۇقارالىق اقپارات قۇرالدارىندا «قازاق ءتىلىن تورگە شىعاراتىن ۋاقىت جەتتى», ء«تىلىمىزدى تۇعىرىنا قوندىرايىق», «قازاق ءتىلىن دامىتامىز دەسەك...» سياقتى ەل اعالارىنىڭ, زيالى قاۋىم وكىلدەرى مەن ءتىل جاناشىرلارىنىڭ مەملەكەتتىك ءتىلدىڭ مارتەبەسىن كوتەرۋگە بايلانىستى ماقالالارى كوپتەپ جاريالانىپ, مەملەكەتتىك ءتىلدى دامىتۋعا بايلانىستى وزدەرىنىڭ ۇسىنىستارىن ايتىپ, ونىڭ ىسكە اسۋىنا مۇددەلى مەكەمەلەردىڭ ءمان بەرۋىن وتىنگەن وزەكتى ويلار قوعامدىق وي-پىكىر تۋعىزعان ەدى. مەملەكەت باسشىسىنىڭ بۇگىنگى ماقالاسى «حالىق ۇنىنە قۇلاق اساتىن ۇكىمەت» تۇجىرىمداماسىنىڭ جالاڭ سوزگە ەمەس, ناقتى ىستەرگە نەگىزدەلگەنىنىڭ دالەلى رەتىندە كوپتىڭ كوڭىلىنەن شىعىپ وتىرعانى استىن سىزىپ ايتقىم كەلەدى. مەملەكەتتىك ءتىلدى بىلەتىن قازاقتىڭ دا, وزگە ەتنوس وكىلدەرىنىڭ دە ۇلەسى ەداۋىر ارتقانىن, ماسەلە – نيەتتە ەكەنىن, نيەتتىڭ دۇرىس بولۋى قازاق ءتىلىن مەڭگەرگىسى كەلەتىن ادامدارعا دا, وسى ماقساتقا جەتۋگە جاعداي جاسايتىن ۇكىمەتكە دە بايلانىستى ەكەنىن ايتقان ەل باسشىسىنىڭ پىكىرى قۇرمەتكە لايىق. ءبىزدىڭ ويىمىزشا, نيەتپەن بىرگە, ۇكىمەت مەملەكەتتىك ءتىلدى مەڭگەرۋگە قاجەتتىلىكتى دە تۋدىرۋ تەتىكتەرىن قاراستىرعانى دۇرىس بولار ەدى.
ەڭ الدىمەن, حالىق قالاۋلىلارىنان باستاپ, بارلىق مەملەكەتتىك قىزمەتكەرلەردى ءوز سالالارى بويىنشا مەملەكەتتىك ءتىلدى مەڭگەرۋ دەڭگەيىن انىقتايتىن, اتقاراتىن قىزمەتىنە ساي ءتىلدى مەڭگەرۋ قۇزىرەتتىلىگى قاناعاتتاندىرادى دەگەن تەستىدەن وتكىزۋدى قولعا الاتىن كەز كەلدى دەپ ەسەپتەيمىن. ەلدىڭ دە, كۇتەتىنى – وسى!
«مەملەكەتتىك ءتىلدى ءبىلۋ – قازاقستاننىڭ ءاربىر ازاماتىنىڭ پارىزى. مىندەتى دەپ تە ايتۋعا بولادى...» دەگەن ۇندەۋى تىل جاناشىرلار تىلەگىنىڭ ەسكەرىلگەنى دەپ باعالاۋعا بولادى. شىنىندا دا, ەل بىرلىگى جاراسقان تاۋەلسىز ەلىمىزدىڭ ازاماتتارى مەملەكەتتىك ءتىلدى مەڭگەرۋ پارىز عانا ەمەس, مىندەتىم دەپ تۇسىنەتىن بولسا, قازاق ءتىلىن تۇعىرىنا قوندىراتىن كۇن دە الىس ەمەستىگىن سەندىرەتىنى ءسوزسىز.
جاستار اعىلشىن ءتىلىن نەمەسە باسقا تىلدەردى از عانا ۋاقىتتا مەڭگەرە الاتىنىن كورىپ وتىرمىز. تۇتاس بۋىن الماسقان وسى جىلداردا قازاق ءتىلىن ۇيرەنگىسى كەلگەن ادام, ونى الدەقاشان ءبىلىپ شىعاتىن ەدى... جاستارىمىز بىرنەشە ءتىل ءبىلۋى وزدەرىنىڭ كوكجيەگىن كەڭەيتىپ, كوكىرەك كوزىن وياتاتىنىن جەتە تۇسىنگەنى ابزال», دەگەن مەملەكەت باسشىسىنىڭ ەلگە جولداۋى – حالىق قولداۋىنا يە بولاتىنى كۇمان تۋدىرمايدى. پرەزيدەنتتىڭ ءسوزىن تولىق قولداي وتىرىپ, الاش ارداقتىسى حالەل دوسمۇحامەد ۇلىنىڭ: «انا ءتىلىن جاقسى ءبىلىپ تۇرىپ, بوتەنشە جاقسى سويلەسەڭ, بۇل- ءسۇيىنىش. انا ءتىلىن بىلمەي تۇرىپ, ورىسشا جاقسى سويلەسەڭ, بۇل- كۇيىنىش»,- دەگەن قاعيداسىن جاستاردىڭ ساناسىنا سىڭىرۋگە شارشاماۋىمىز كەرەك. ءبىزدىڭ تاراپتان قوسارمىز – شەت ءتىلدى ءبىلۋدى انا تىلىنەن باستاۋ قاجەت دەگەن ۇستانىمدى ارقاشاندا ەستە ۇستاعانىمىز ابزال.
سوناۋ, تاۋەلسىزدىك العان العاشقى جىلداردىڭ وزىندە, ەلدەگى قيىنشىلىقتارعا قاراماستان تۇڭعىش پرەزيدەنت – ەلباسى «بولاشاق» جوباسىن ۇسىنىپ, تالانتتى ۇل-قىزدارىمىزدىڭ ساپالى ءبىلىم الىپ, ەلىمىزدى وركەندەتۋگە وركەنيەتتى ەلدەردىڭ تاجىريبەسىن تاراتۋدا ۇلگى بولادى دەگەن ۇكىلى ۇمىتپەن الەمنىڭ ايتۋلى ۋنيۆەرسيتەتتەرگە جىبەرۋى جانە ولاردىڭ بۇل كۇندەرى ەلىمىزدىڭ الەۋمەتتىك-ەكونوميكالىق دامۋىنا قوماقتى ۇلەس قوسىپ جاتقانى بەلگىلى.
ەندى, ەلباسىنىڭ سارابدال ساياساتىن جەمىستى جالعاستىرىلىپ جاتقانىنىڭ كۋاسىندەي ازاتتىق جىلدارىندا دۇنيەگە كەلگەن, ءالى تانىلىپ ۇلگەرمەگەن تالانتتى جاستاردى قولداۋ ماقساتىندا «تاۋەلسىزدىك ۇرپاقتارى» اتتى گرانت تاعايىنداۋدى تاپسىرۋى - مەملەكەت باسشىسىنىڭ اقيىق اقىن ماعجان جۇماباەۆتىڭ «مەن جاستارعا سەنەمىن...» دەگەن جالىندى جىرىمەن استارلاسىپ, جاستاردىڭ وتانعا شەكسىز سۇيىسپەنشىلىكپەن قاراپ جانە حالقىنا قالتقىسىز قىزمەت ەتۋگە جول اشۋ دەپ باعالاۋعا بولادى.
ەل تاۋەلسىز بولماي – ءتىل تاۋەلسىز بولمايدى دەگەن قاناتتى ءسوزدىڭ ىسكە اسىپ, تاۋەلسىزدىكتىڭ ارقاسىندا مەملەكەتتىك ءتىلىمىز دە ودان ءارى دامي بەرەتىنىن نىق سەنىممەن ايتا الامىز.
كارىمبەك قۇرماناليەۆ
قر ۇلتتىق عىلىم اكادەمياسىنىڭ اكادەميگى,
فيلولوگيا عىلىمدارىنىڭ دوكتورى, پروفەسسور
