جاڭادان اشىلعان №27-مەكتەپتە نەگىزىنەن «يۋبيلەينىي» جانە «التىن ارمان» شاعىن اۋداندارىندا تۇراتىن بالالار ءبىلىم الادى. 18 مىڭعا جۋىق تۇرعىنى بار بۇل ەكى شاعىن اۋداندا بۇگىندە مەكتەپ جاسىنداعى 1700 بالا بار ەكەن. بيىلعى وقۋ جىلىنىڭ ءۇشىنشى توقساننان باستاپ 830 بالا وسى مەكتەپتە ءبىلىم الاتىن بولادى.
جاڭا مەكەندە جاڭا مەكتەپتىڭ اشىلۋى, ەڭ الدىمەن, وسى توڭىرەكتەگى تۇرعىنداردى قۋانىشقا بولەدى. بۇعان دەيىن بالالارىن قالا ورتالىعىنداعى تۇرعىلىقتى مەكەندەرىنەن الىس مەكتەپتەردە وقىتىپ كەلگەن اتا-انالار سالتاناتتى جيىندا ءسوز الىپ, شاراعا جينالعان كوپشىلىككە شاعىن اۋدان تۇرعىندارىنىڭ العىسىن جەتكىزدى.
– ءبىز بىلتىر مەملەكەتتىك باعدارلاما ارقىلى باسپانالى بولىپ, «يۋبيلەينىي» شاعىن اۋدانىنداعى جاڭا پاتەرىمىزگە كوشىپ كەلدىك. بۇعان دەيىن بالالار ورتالىقتاعى №115 ورتا مەكتەپتە وقىدى. راس, جول الىس, بالالار ۇيگە ورالعانشا الاڭداپ وتىراسىڭ. مىنە, بۇگىن ءۇيىمىزدىڭ ىرگەسىنەن كوپتەن كۇتكەن ءبىلىم ورداسى اشىلىپ, قۋانىشىمىزعا قۋانىش قوسىلىپ, مەرەيىمىز ءوسىپ وتىر. مەكتەپ پەن ءۇيدىڭ اراسى بەس-اق مينۋتتىق جەر. ەكى بالامدى دا وسى مەكتەپكە بەردىم. ويتكەنى بىزگە وتە ىڭعايلى. بالالارىمىزدىڭ مىناداي كەڭ ءارى ساۋلەتتى مەكتەپتە وقىعانى وزىمىزگە دە جاقسى. سىزدەرگە وسى شاعىن اۋداندا تۇراتىن اتا-انالاردىڭ اتىنان زور العىسىمدى بىلدىرەمىن, – دەدى شاعىن اۋدانداعى №39 ءۇيدىڭ تۇرعىنى مانشۇك العاشباەۆا.
تاۋەلسىزدىك كۇنى قارساڭىندا اشىلعان ءبىلىم ورداسىندا جالپى سانى 49 سىنىپ بار. مەكتەپ ديرەكتورىنىڭ ايتۋىنشا, مۇندا 2021 جىلدىڭ باسىنان باستاپ 1-11 سىنىپتاردا 770 وقۋشى ءبىلىم الادى.
– مەكتەپالدى دايارلىق سىنىبىنا قابىلدانعان 88 بالانىڭ 17-ءسى مەملەكەتتىك تىلدە وقۋعا ءوتىنىش بەردى. قازىر 76 مۇعالىمدى جۇمىسقا قابىلدادىق. ولاردىڭ دەنى جوعارى جانە ءبىرىنشى ساناتتاعى ۇستازدار. مۇعالىمدەردى جۇمىسقا قابىلداۋ بارىسىندا ءبىز ءبىرىنشى كەزەكتە وسى شاعىن اۋداندا تۇراتىن ماماندارعا كوپ كوڭىل بولدىك. سىنىپتاردىڭ ءبارى زاماناۋي تەحنيكالىق قۇرال-جابدىقتارمەن قامتاماسىز ەتىلگەن. ساپالى ءبىلىم بەرۋ ءۇشىن نە قاجەت, سونىڭ ءبارى بار, – دەدى مەكتەپ ديرەكتورىنىڭ مىندەتىن اتقارۋشى باقىتجان يسەتوۆا.
جاڭا ءبىلىم ورداسىندا مۇمكىندىگى شەكتەۋلى بالالارعا ينكليۋزيۆتى ءبىلىم بەرۋ مۇمكىندىكتەرى دە قاراستىرىلعان. مەكتەپ اۋلاسىندا ويىن جانە دەمالىس الاڭدارى بار. سونىمەن قاتار بالالار جەمىس-جيدەك, گۇل جانە ءتۇرلى داقىلدار ەگىپ, سەلەكتسيا جۇمىسىمەن اينالىساتىن ارنايى وقۋ-تاجىريبەلىك ايماق تا بار. مەردىگەرلەردىڭ ايتۋىنشا, ساۋلەتتى مەكتەپ عيماراتىن سالۋعا جۇمسالعان قۇرىلىس ماتەريالدارىنىڭ ساپاسى وتە جوعارى ءارى بۇل ماتەريالداردىڭ 95%-ى وتاندىق كاسىپورىنداردىڭ ءونىمى. مەكتەپ قۇرىلىسى بارىسىندا 189 ادام ەڭبەككە تارتىلعان. مۇنىڭ سىرتىندا, مەكتەپ پايدالانۋعا بەرىلگەن سوڭ مۇندا 100-گە جۋىق جاڭا جۇمىس ورنى پايدا بولىپ, 76 مۇعالىم, 28 تەحنيكالىق قىزمەتشى تۇراقتى جۇمىسپەن قامتىلىپ وتىر.
وبلىستىق ءبىلىم باسقارماسىنىڭ باسشىسى زاۋرە بايمەنوۆانىڭ سوزىنشە, الداعى جىلى جاڭا شاعىن اۋداندا 280 ورىنعا ارنالعان بالاباقشا قۇرىلىسى باستالادى. سونىمەن قاتار «التىن ارمانعا» ىرگەلەس جاتقان «بەرەكە» شاعىن اۋدانىندا تاعى ءبىر جاڭا مەكتەپ سالىنادى.
– پاندەمياعا بايلانىستى قيىنشىلىقتارعا قاراماستان, وبلىستىڭ بىرنەشە اۋدانىندا جاڭا مەكتەپ عيماراتتارى سالىنىپ جاتىر. وزدەرىڭىز بىلەسىزدەر, قىركۇيەك ايىندا اۋليەكول اۋدانىنىڭ امانقاراعاي اۋىلىندا مەملەكەتتىك تىلدە ءبىلىم بەرەتىن 320 بالاعا ارنالعان زاماناۋي مەكتەپ اشىلدى. قازىر قاراسۋ اۋىلىندا مەملەكەتتىك تىلدە ءبىلىم بەرەتىن 320 ورىنعا ارنالعان قازاق مەكتەبىنىڭ قۇرىلىسى ءجۇرىپ جاتىر. قاراسۋ مەكتەبى 2021 جىلى پايدالانۋعا بەرىلەدى, – دەدى زاۋرە بايمەنوۆا.
وبلىس ورتالىعىندا مەكتەپ عيماراتتارىن جوندەۋ جۇمىستارى دا ەرەكشە قارقىندى. ماسەلەن, بيىل جالپى سوماسى 3,1 ملرد تەڭگەگە 7 ءبىلىم مەكەمەسىنە كۇردەلى جوندەۋ جۇرگىزىلدى. مۇنىڭ سىرتىندا, 313 ملن تەڭگەگە 18 ءبىلىم نىسانى اعىمداعى جوندەۋدەن ءوتتى. بۇل 2 مىڭعا جۋىق ءبىلىم سالاسى قىزمەتكەرىنىڭ ەڭبەك جاعدايىنىڭ جاقسارىپ, 22 مىڭ بالانىڭ ساپالى عيماراتتا ءبىلىم الۋىنا مۇمكىندىك تۋعىزىپ وتىر. باسقارما باسشىسىنىڭ ايتۋىنشا, بيىل وبلىس كولەمىندە 11,2 ملرد تەڭگە قارجىعا 133 ءبىلىم مەكەمەسى كۇردەلى جانە اعىمداعى جوندەۋدەن وتكەن.
