سىيلىققا ۇمىتكەر رەتىندە 14 پەن 29 جاس ارالىعىنداعى جاستار قاتىسىپ, 10 نوميناتسيا بويىنشا تاڭدالدى. ياعني ءبىلىم جانە عىلىم, جۋرناليستيكا, قوعامدىق قىزمەت, سپورت, مەديتسينا, مادەنيەت, كاسىپكەرلىك, ءوندىرىس سالالارىندا تابىستى ەڭبەك ەتىپ, ءوز سالاسى بويىنشا جوعارى كورسەتكىشتەرگە جەتىپ جۇرگەن جانە ەرەن ەرىكتىلىك تانىتىپ, بەيبىت كۇندە ەرلىك كورسەتكەن جاستار كونكۋرسقا ءتۇستى.
ىرىكتەۋدە ۇمىتكەرلەردىڭ ءوز سالاسىنىڭ جانە قوعامنىڭ جالپى دامۋىنا قوسقان ۇلەسى مەن يننوۆاتسيالىق يدەيالارىنا باسىمدىق بەرىلىپ, الەۋمەتتىك ماڭىزدى جوبالار جانە قوعامدىق ومىرگە بەلسەنە قاتىسۋى, مەملەكەتتىك جاستار ساياساتىن جۇزەگە اسىرۋ جانە جەتىلدىرۋ بويىنشا قوسقان جاڭاشىل باستامالارى ەسەپكە الىندى.
بايقاۋ جەڭىمپازدارى ارنايى قۇرىلعان كوميسسيا قورىتىندىسىمەن انىقتالىپ, ءار نوميناتسيا بويىنشا ۇزدىك شىققان 10 جاسقا قالا اكىمىنىڭ 100 مىڭ تەڭگە كولەمىندەگى سىياقىسى تابىستالدى.
شارا سوڭىندا قالا اكىمى «سامعاۋ» سىيلىعىنىڭ يەگەرلەرىن ماراپاتىمەن قۇتتىقتاپ, بۇل سىيلىق بەلسەندى جاستاردىڭ ودان ءارى شىعارماشىلىعىن شىڭداپ, ساياسي-مادەني, رۋحاني بايلىعىن ارتتىرۋعا قولداۋ كورسەتۋ, كوتەرمەلەۋ ماقساتىندا تاعايىندالىپ, جىل سايىن ءداستۇرلى تۇردە جالعاساتىندىعىن اتاپ ءوتتى.
سونىمەن قاتار سالتاناتتى جيىندا وڭىرىمىزدەگى قوعامدىق جۇمىستارعا بەلسەنە ارالاسىپ, بىلىمگە, ونەرگە, عىلىمعا, سپورتقا جانى قۇمار, ازاماتتىق قوعامدى قالىپتاستىرۋدا وزىندىك ۇلەس قوسىپ جۇرگەن بىرقاتار جاستار قوسىمشا ارناۋلى نوميناتسيالارعا يە بولدى.
