«شاتيلو ي ك» جشس سولتۇستىك قازاقستان وبلىسىنداعى جامبىل اۋدانىنداعى كازانكا سەلوسىندا ۇيىمداستىرىلعان. اۋدان ورتالىعى پرەسنوۆ سەلوسىندا ونىڭ استىق قابىلداۋ پۋنكتى بار. وقيعا وسى پۋنكتتە ورىن الدى.
تۇنگى كەزەكشىلىكتەگى اۋداندىق پوليتسيا قىزمەتكەرلەرى وسى كاسىپورىندا جەتى تۇندە شامدارىن ءسوندىرىپ, استىق ارتىق ارتىپ جاتقان سەگىز «كاماز» اۆتوكولىگىن بايقاپ قالادى. ءتۇن جامىلىپ ءارى شامدارىن ءسوندىرىپ استىق ارتىپ جاتقاندار بىردەن كۇدىك تۋدىرىپ, پوليتسيا قىزمەتكەرلەرى ولاردان قۇجاتتارىن كورسەتۋدى تالاپ ەتكەن. سويتسە, بۇلار شىنىندا دا ەشقانداي رۇقساتسىز استىق ارتىپ جاتقاندار بولىپ شىعادى. ەگەر وسىنشا كولىك تىركەمەلەرىمەن تولىق تولتىرىلعاندا 160 تونناداي استىق ارتىلعان بولار ەدى. بىراق پوليتسيا قىزمەتكەرلەرى استىقتىڭ زاڭسىز ارتىلىپ جاتقانىن توقتاتىپ, تەك 80 توننا قولدى بولعالى تۇرعان جەرىندە ۇستاعان.
ءتۇن جامىلىپ استىقتى باسقا جاققا جونەلتكەلى جاتقان سول كاسىپورىن باسشىلارىنىڭ ءبىرى بولىپ شىقتى. قازىر ول كۇدىكتى رەتىندە ۇستالىپ, ۋاقىتشا قاماۋ ورنىنا توعىتىلدى. ءۇشىنشى كلاستى بيدايدىڭ ءبىر تونناسىنىڭ باعاسى بيىل 200 دوللاردان اسىپ كەتكەنىن ەسكەرسەك ۇرلىقتىڭ قاراجات كولەمى وراسان زور بولىپ شىققانى تۇسىنىكتى.
قازىر جامبىل اۋدانىنىڭ پب قىزمەتكەرلەرى اسا ءىرى مولشەردە استىق ۇرلاۋ فاكتىسى بويىنشا سوتقا دەيىنگى تەرگەۋ جۇرگىزۋدە. كەلتىرىلگەن شىعىن سوماسى 23 ميلليون تەڭگەدەن استام ەكەنى انىقتالىپ وتىر. قازىرگى تاڭدا قىلمىسقا باسقا دا ادامداردىڭ قاتىستىلىعى تەكسەرىلۋدە.
وسى ۋاقىتقا دەيىنگى تەرگەۋ جۇمىستارى جاڭا استىق ءونىمىنىڭ ءبىرىنشى پارتياسى جەلتوقسان ايىنىڭ باسىندا ۇرلانعانىن انىقتادى. ول جولى 190 توننادان استام استىق اقمولا وبلىسىنىڭ ءبىر ەلەۆاتورىنا جەتكىزىلگەن.
قازىر قاسقىرعا قوي باققىزعانداي بولعان كومپانيا باسشىلارى وزدەرى سەنىم بىلدىرگەن ادامنان زالال شەگىپ, وكىنىشتە قالىپ وتىر. ارينە, سونشا كولەمدەگى دۇنيەنى ءجىتىرۋ ءۇشىن ۇيىمداسقان توپ قۇرىلعانى دا انىق. تەرگەۋ بارىسىندا ولار انىقتالاتىن شىعار دەگەن ءۇمىت بار. «تەرگەۋ ارەكەتتەرى بارىسىندا ۇرلانعان ءونىمدى ساتۋ ورنى دا انىقتالدى. كۇدىكتىنىڭ ۇيىنەن كونۆەرتتەرگە سالىنعان اسا ءىرى كولەمدەگى اقشا دا تابىلدى. قىلمىستىق ارەكەتتى تەرگەۋ قك 188-بابى جۇرگىزىلۋدە. تاركىلەنگەن «كاماز» اۆتوكولىكتەرى مەن قۇجاتتاما دا تەكسەرىلۋدە», - دەيدى جامبىل اۋدانىنىڭ پب باستىعى پوليتسيا پولكوۆنيگى اسان مەيراموۆ.
ايتا كەتەتىن جايت, بۇل قىلمىستى تەرگەۋ بارىسى سقو پد باستىعى مەن وبلىستىق پروكۋراتۋرانىڭ باقىلاۋىندا.
سولتۇستىك قازاقستان وبلىسى
