جاڭا جىل تاياعاندا وتتى ويىننان كۇيىپ قالىپ اۋرۋحاناعا ءتۇسىپ جاتاتىندار جوق ەمەس. سوندىقتان دا قۇزىرلى ورگاندار سەرتيفيكاتى جوق پيروتەحنيكالىق ونىمدەردى ساتۋعا رۇقسات جوقتىعىن العا تارتىپ, رەيد ۇيىمداستىرۋدى قولعا الدى. ەگەر ارنايى ليتسەنزيا بولماعان جاعدايدا «تاۋارلار مەن وزگە زاتتاردى زاڭسىز ساتۋ» قر اقتك 196-بابى بويىنشا اكىمشىلىك حاتتاما تولتىرىلىپ, ماتەريال اكىمشىلىك سوتقا جولدانادى.
رەيدتىك ءىس-شارالار كەزىندە بورودۋليحا اۋدانىندا زاڭسىز ساۋدا انىقتالعان. قۇقىق بۇزۋشى سەمەيدىڭ تۇرعىنى. وعان قاتىستى 196-باپ بويىنشا حاتتاما تولتىرىلىپ, 20 اەك مولشەرىندە ايىپپۇل سالىندى.
«اتالمىش قۇقىق بۇزۋشىلىق ءۇشىن 25 اەك ايىپپۇل سالۋ كوزدەلگەن. اقشاعا شاققاندا, 69450 تەڭگە», دەدى وسكەمەن قالالىق پوليتسيا ءبولىمىنىڭ ءاپب ازاماتتىق جانە قىزمەتتىك قارۋ اينالىمىنا باقىلاۋ بويىنشا توبىنىڭ اعا ينسپەكتورى تالعات يسكاكوۆ.
قۇتقارۋشىلار مەن پوليتسيا قىزمەتكەرلەرى حالىققا پيروتەحنيكالىق ونىمدەردى ارنايى ورىنداردان عانا الۋعا كەڭەس بەرەدى. ال وبلىستا پيروتەحنيكا ساتۋعا رۇقسات العان 4 ورىن عانا بار ەكەن.
ء«ورت قاۋىپسىزدىگى ەرەجەسىنە سايكەس پيروتەحنيكالىق ونىمدەردى ساتۋعا ارنايى دۇكەندەرگە نەمەسە بولىمدەرگە رۇقسات ەتىلەدى. ونداي ونىمدەر ورتكە قارسى قالقامەن بولىنگەن بولمە ىشىندەگى مەتالل شكافتاردا ساقتالۋى كەرەك. ونى جەرتولەگە ساقتاۋعا مۇلدەم تىيىم سالىنادى», دەدى توتەنشە جاعداي دەپارتامەنتىنىڭ ءورت باقىلاۋ باسقارماسىنىڭ باستىعى رينات قوندىباەۆ.
ەسكەرتە كەتسەك, وتكەن جىلى وتتى ويىننىڭ سالدارىنان جاڭا جىل قارساڭىندا 14 ءورت وقيعاسى تىركەلگەن.
شىعىس قازاقستان وبلىسى
