مينيستر كاسىپورىننىڭ اتموسفەرالىق اۋانى لاستاۋ دەڭگەيىن تومەندەتۋ بويىنشا جۇرگىزىپ جاتقان جۇمىستارىمەن تانىستى. جىلۋ ەلەكتر ورتالىعى 2014 جىلدان باستاپ وندىرىسكە ەڭ وزىق قولجەتىمدى تەحنولوگيالاردى ەنگىزگەن. ناتيجەسىندە اۋاعا شىعاتىن قاتتى بولشەكتەر 51,3%-عا, كۇكىرت ديوكسيدى 17%-عا تومەندەگەن. 2003-2019 جىلدار ارالىعىندا وسكەمەن جەس-ءىنىڭ ەكولوگيالىق شارالارعا بولگەن قارجىسى 7,6 ملرد تەڭگەدەن استى.
ەكولوگيا ءمينيسترى جەس-ءتىڭ جۇمىس تەحنولوگياسىن ودان جاسىلداندىرا ءتۇسۋ قاجەتتىگىن ايتتى.
«وسكەمەن قالاسىندا نەگىزگى ەكى لاستاۋشى كاسىپورىن بار. ءبىرى - «قازتسينك» كومپانياسى, ەكىنشىسى جىلۋ ەلەكتر ورتالىعى. اسىرەسە قىستا, جەلسىز اۋا رايىندا لاستاۋشى زاتتىڭ كوپ بولىگى جەس-تان شىعادى. شىعارىندىلار 16 مىڭ تونناعا دەيىن جەتەدى. دەگەنمەن جاسىل تەحنولوگيا بويىنشا ۇلكەن جۇمىس ىستەلگەنى كورىنىپ تۇر. شىعارىندىلار كولەمىن تاعى دا ازايتا ءتۇسۋ ماقساتىندا قوسىمشا باعدارلاما ازىرلەۋ قاجەت. قىسقا ۋاقىت ىشىندە حالىق ونىڭ ناتيجەسىن سەزىنۋى ءتيىس»,- دەدى ەكولوگيا ءمينيسترى.
ءارى قاراي ەكولوگيالىق احۋالدىڭ ناشارلاۋىن بولدىرماس ءۇشىن قولدانىستاعى قازاندىق اگرەگاتتارىن جاڭارتىپ, تازالاۋ قۇرىلعىلارىن تولىعىمەن اۋىستىرۋ جوسپارىن جاساۋ قاجەت. اتاپ وتەيىك, كاسىپورىننىڭ ءوندىرىس الاڭىندا نوسەر اعىندىلارىن تازالاۋ بويىنشا قۇرىلعىلار ورناتىلعان. ال 2016 جىلدان باستاپ ءۇلبى وزەنىنە تۇسەتىن نوسەر اعىندىلارى توقتاتىلدى.
ماعزۇم مىرزاعاليەۆ جۇمىس ساپارى بارىسىندا «كازتسينك», ءۇلبى مەتاللۋرگيالىق زاۋىتتارىنا, بالىق شارۋاشىلىعى مەكەمەلەرىنە بارۋدى جوسپارلاپ وتىر.
