ازاتتىق, اسىرەسە, جاس بۋىن ساناسىنا سەرپىلىس بەرۋى كەرەك. ال ءبىز, اعا بۋىن جاستاردى جەتەلەمەي, كەرىسىنشە سولاردىڭ جەتەگىندە كەلە جاتىرمىز. وسكەلەڭ ۇرپاق – ساۋاتتى. تەك ۇلكەندەر جاستارعا تاۋەلسىزدىك تۋرالى كەڭىستىكتى كەڭەيتە الماي وتىر. ءبىز جاستارعا: «مەنىكى دۇرىس, مەنىڭ ايتقانىممەن ءجۇر», دەپ ۇنەمى قىسىم جاسايمىز. بۇل قاتە. جاستار سانالى ساراپتاپ, جاعدايدى وزدەرى وزگەرتۋى كەرەك. ول ءۇشىن تاربيە, ءبىلىم, مادەنيەت جانە عىلىمدى ىلگەرىلەتۋىمىز قاجەت. وسى دۇنيەلەردى كوتەرسەك, ءار نارسە ءوزىنىڭ قانىق بوياۋىنا ەنەدى.
بۇگىندە تاۋەلسىزدىكتىڭ 30 جىلدىق مەرەيتويى قارساڭىندا تۇرمىز. بۇعان قوسا عۇلاما ءابۋ ناسىر ءال-ءفارابيدىڭ 1150, ال حاكىم ابايدىڭ 175 جىلدىق مەرەيتويى قاتار كەلدى. ءابۋ ناسىر ءال-فارابي وسىدان ون عاسىر بۇرىن ءومىر سۇرگەن. ال اباي قۇنانباي ۇلى ودان توعىز عاسىر كەيىن قازاق دالاسىن مەكەن ەتتى. وسى 900 جىل ارالىعىندا تاريحتا نەبىر جاعداي ورىن الدى. الەمنىڭ ەكىنشى ۇستازى ون عاسىر بۇرىن ايتىپ كەتكەن دۇنيەلەردى توعىز عاسىردان كەيىن ۇلى اباي قايتالاپ وتىر. بۇل ۇرپاقتار ساباقتاستىعىنىڭ ۇزىلمەگەندىگىن كورسەتەدى. نەگە ۇزىلمەدى؟ بىرىنشىدەن, مۇسىلماندىعىمىز, ەكىنشىدەن تۇركى ءتىلى. وسى ەكى فاكتور ءابۋ ناسىر ءال-ءفارابيدىڭ ايتقاندارىن اباي زامانىنا, اباي ءبىزدىڭ زامانعا جەتكىزدى. بۇل رۋحاني بايلىق قازاق حالقىنىڭ كورەگەندىگى مەن دانالىعىنىڭ ارقاسىندا ساقتالىپ قالدى. بۇنىڭ بارلىعى – تۇعىرلى تاۋەلسىزدىگىمىزدىڭ جەمىسى.
عاريفوللا ەسىم,
ۇعا اكادەميگى,
فيلوسوفيا عىلىمدارىنىڭ دوكتورى, پروفەسسور
