قازىر قوستاناي قالاسىنىڭ تۇرعىندارى ءبىرىنشى سۇرىپتى ناندى 105 تەڭگەدەن ساتىپ الىپ وتىر. ال جەلەزنودوروجنىيدىڭ جۇمساق نانى ودان ەكى ەسە ارزان. اۋىل تۇرعىندارىنىڭ ايتۋىنشا, بۇل ەلدى مەكەندە سوڭعى بەس-التى جىلدىڭ ىشىندە نان باعاسى وزگەرمەگەن.
جەرگىلىكتى سەرىكتەستىككە قاراستى ناۋبايحانا سول ماڭايداعى اۋىلداردى ساپالى ءارى ارزان الەۋمەتتىك نانمەن قامتۋمەن قاتار, نەشە ءتۇرلى توقاش, پىسپە نان سياقتى شاي ىشكەندە تىسكە باسار جىلى-جۇمساق تۇرلەرىن پىسىرەدى. ناۋبايحانادان شىققان ارزان ءونىم وكتيابر اۋىلدىق وكرۋگىنە قاراستى اۋىلدارعا, ودان قالدى كورشىلەس اقمولا وبلىسىنىڭ بىرقاتار ەلدى مەكەندەرىنە جونەلتىلەدى.
– كۇنىنە شامامەن 1200 بولكە نان پىسىرەمىز. بۇل اۋىل تۇرعىندارىنا دا, سىرتتان كەلەتىن شاعىن كاسىپكەرلەرگە دە جەتەدى. ەڭ باستىسى, ۇن وزىمىزدىكى. سوندىقتان باعانى تۇراقتى ۇستاپ وتىرۋعا مۇمكىندىك بار, – دەيدى سەرىكتەستىك باسشىسى ماكسيم ارتەمۋك.
جاقسىنىڭ جاقسىلىعىن ايتپاسقا بولمايدى, تاياۋدا ماكسيم ارتەمۋك وكتيابر اۋىلىنداعى اۋرۋحاناعا قۇنى 22 ملن 783 مىڭ تەڭگە تۇراتىن انەستەزيولوگيالىق كەشەندى سىيعا تارتتى. اۋىل مەديتسيناسىن دامىتۋعا اسا قاجەت كەشەننىڭ توسەك الدىنا قويىلاتىن مونيتورى مەن جاساندى جولمەن دەمالدىراتىن ارنايى قۇرىلعىسى بار. وكتيابر اۋرۋحاناسى وبلىس ورتالىعىنان 220 شاقىرىم قاشىقتىقتا جاتىر. سوندىقتان اۋىر ناۋقاستاردى دەر كەزىندە وبلىستىق اۋرۋحاناعا جەتكىزۋ قيىنعا سوعاتىن. كاسىپكەر سىيعا تارتقان اسا قىمبات مەديتسينالىق قۇرىلعى ەندى مۇنداي ناۋقاستاردى الىسقا اپارماي-اق, ولارعا اۋىلدىق اۋرۋحانادا وتا جاساي بەرۋگە مۇمكىندىك تۋعىزىپ وتىر.
دارىگەرلەردىڭ ايتۋىنشا, جەرگىلىكتى سەرىكتەستىك اۋىلدىڭ دەنساۋلىق سالاسىنا كوپتەن بەرى قولداۋ كورسەتىپ كەلەدى.
– اۋىلدىق اۋرۋحانا عيماراتى وسىدان 3 جىل بۇرىن «جەلەزنودوروجنىي امف» سەرىكتەستىگىنىڭ قارجىسىنا كۇردەلى جوندەۋدەن ءوتتى. ال 2018 جىلى اتالعان سەرىكتەستىك «رۋحاني جاڭعىرۋ» باعدارلاماسى اياسىندا 12 پاتەرلى تۇرعىن ءۇي سالدى. بۇل ۇيلەردە قازىر اۋىلشارۋاشىلىق سالاسىنىڭ قىزمەتكەرلەرى, مۇعالىمدەر مەن دارىگەرلەر تۇرىپ جاتىر. كوپ جىلدان بەرى ۋدز اپپاراتىنا مۇقتاج بولىپ كەلىپ ەدىك, ماكسيم فەدوروۆيچ بىلتىر اۋرۋحاناعا 15 ملن تەڭگە تۇراتىن جوعارى ساپالى ۋدز قۇرىلعىسىن تارتۋ ەتتى. قازىر اۋىل تۇرعىندارى ۋدز-تەكسەرۋدەن ءوتۋ ءۇشىن بۇرىنعىداي قالاعا سابىلمايدى, وسى جەردە قارالادى, – دەدى وكتيابر اۋىلدىق اۋرۋحاناسى باس دارىگەرىنىڭ مىندەتىن اتقارۋشى مارينا حوروشۋن.
وسىدان ءبىر-ەكى جىل بۇرىن وبلىس باسشىسىنىڭ باستاماسىمەن قولعا الىنعان «كوركەيە بەر, قوستاناي» ارنايى جوباسى بويىنشا قاراسۋ اۋىلىندا 9 ءۇي بوي كوتەرىپ, مۇعالىمدەر مەن دارىگەرلەرگە تابىس ەتىلگەن. تۇرمىسقا جايلى ءارى جىلى بۇل ۇيلەردىڭ بىرەۋى «جەلەزنودوروجنىي» سەرىكتەستىگىنىڭ قارجىسىنا تۇرعىزىلعانىن دا ايتا كەتۋ كەرەك. مۇنىڭ سىرتىندا, جەرگىلىكتى سەرىكتەستىك بىلتىر 135 ملن تەڭگە قارجىعا وكتيابر اۋىلىنداعى كاسىبي-تەحنيكالىق ۋچيليششەنىڭ وقۋ عيماراتىن دا كۇردەلى جوندەۋدەن وتكىزىپ بەردى. ال اۋىل مەكتەبىنىڭ وقۋ وزاتتارى جەرگىلىكتى سەرىكتەستىكتەن اي سايىن ارنايى ستيپەنديا الىپ وتىرادى.
