«بۇگىن وسى زالدا ءوڭىردىڭ دامۋىنا كۇندەلىكتى ەڭبەگىمەن ۇلەس قوسىپ كەلە جاتقان ءتۇرلى سالا وكىلدەرى جينالدى. مەملەكەت باسشىسى قاسىم-جومارت كەمەل ۇلى توقاەۆتىڭ جارلىعىمەن 48 قوستانايلىق مەملەكەتتىك ناگرادالارعا يە بولدى. بۇل – قاجىرلى ەڭبەكتىڭ ناتيجەسى جانە وتانىمىزدىڭ يگىلىگى جولىنداعى سىزدەردىڭ قىزمەتتەرىڭىزگە بەرىلگەن جوعارى باعا. الەۋمەتتىك-ەكونوميكالىق رەفورمالاردى جۇزەگە اسىرۋعا قوسقان زور ۇلەستەرىڭىز ءۇشىن سىزدەرگە جانە ۇجىمدارىڭىزعا العىس بىلدىرۋگە رۇقسات ەتىڭىزدەر», - دەدى ارحيمەد مۇحامبەتوۆ قۇتتىقتاۋ سوزىندە.
جيىن بارىسىندا «فرۋنزەنسكوە» جشس ديرەكتورى نيكولاي شەرەر «پاراسات» وردەنىمەن, جىتىقارا اۋدانىنىڭ اكىمى اباي يبراەۆ, «قوستاناي مينەرالدارى» اق باسقارما توراعاسى ەربول نۇرحوجاەۆ, «ۋسپەنوۆسك» شق باسشىسى اناتولي سەرگەەۆ, «شايحين» شق باسشىسى عالىمجان شايحين «قۇرمەت» وردەنىمەن ماراپاتتالدى.
«زاريا» اق مەحانيزاتورى الەكسەي اسانوۆ, «سۆەتلىي جاركول» جشس مەحانيزاتورى نۇرلىبەك بايسالباەۆ, «حاميتوۆ» شق مەحانيكالىق توك ءماشينيسى سەرگەي بۋللەر, «سىما» جشس مەحانيزاتورى سەرىكبول تولەمىس III-دارەجەلى «ەڭبەك داڭقى» وردەنىن كەۋدەلەرىنە تاقتى.
سونداي-اق, بىرقاتار قوستانايلىقتار «ەرەن ەڭبەگى ءۇشىن», «شاپاعات», «حالىق العىسى» مەدالدارىنىڭ, قازاقستان رەسپۋبليكاسىنىڭ جانە قازاقستان رەسپۋبليكاسى پرەزيدەنتى قۇرمەت گراموتالارىنىڭ, «بەلسەندى قىزمەتى ءۇشىن» توسبەلگىلەرىنىڭ يەگەرى اتانىپ وتىر.
ماراپاتتالعانداردىڭ اراسىندا دارىگەرلەر, پەداگوگتار, قوعام قايراتكەرلەرى, مەملەكەتتىك قىزمەتشىلەر جانە بيزنەس وكىلدەرى بار.
بۇل جولى ءوڭىرىمىزدىڭ وركەندەۋ جولىندا ايانباي تەر توككەن بەس قوستانايلىق «قوستاناي وبلىسىنىڭ قۇرمەتتى ازاماتى» اتاعىنا يە بولىپ وتىر. ولار: ۇلى وتان سوعىسىنىڭ ارداگەرى, اقىن, جىرشى, جۋرناليست قاسىمحان الدابەرگەنوۆ, «ماسكەلەۋ» جشس ديرەكتورى زەينوللا جاڭبىرشىنوۆ, «جەلەزنودوروجنوە امف» جشس ديرەكتورى ماكسيم ارتەمۋك, قازاقستاننىڭ ەڭبەك سىڭىرگەن قىزمەتكەرى باعيلا بايماعامبەتوۆا جانە اقىن, دراماتۋرگ اقىلبەك شاياحمەت.
قوستاناي وبلىسى
