كۇنى كەشە مەملەكەت باسشىسىنىڭ شەشىمىمەن اگرارلىق سالادا اتقارعان ۇزاق جىلعى ەڭبەگىم ەلەنىپ, «پاراسات» وردەنىنە لايىق دەپ تانىلدىم. جاسىم جەتپىستەن اسسا دا بۇل ماراپات جاڭا بەلەستەردى باعىندىرۋعا شابىتتاندىرادى. تاۋەلسىزدىك العالى بەرى ەلىمىز ءتۇرلى كەزەڭدەردى باسىنان وتكەرىپ كەلەدى. جارقىن ساتتەرمەن بىرگە ەگەمەن مەملەكەتىمىز سان الۋان سىن-قاتەرلەرمەن بەتپە-بەت كەلگەن كەزدەرى از بولعان جوق. سونىڭ بارلىعىن حالىقپەن بىرگە كورىپ, ەرتەڭگى كۇنىمىزگە ۇلكەن ۇمىتپەن قارايمىز. جوعارىدا ايتقانىمداي, 50 جىلدان ارتىق قىزمەتتىك عۇمىرىمدى وتاندىق اۋىل شارۋاشىلىعى سالاسىنا ارنادىم. بالالارىم اكە جولىن تاڭداپ, وزىممەن بىرگە ەڭبەك ەتىپ ءجۇر. وسى ارالىقتا جۇمىس ورىندارىن ساقتاپ, مال شارۋاشىلىعىن وركەندەتۋگە بارىنشا كۇشىمىزدى سالىپ جاتىرمىز. اتاپ ايتقاندا, قازىر قوجالىعىمىزدا 2 800-دەي ءىرى قارا بار. ونىڭ ىشىندە 700-گە جۋىعى ساۋىندى سيىرلار. ەڭ باستىسى, ىنتىماعى مىعىم ۇجىم قالىپتاستى. ەڭبەگىمىزدىڭ جەمىسىن ۇجىمداعى اۋىزبىرشىلىكتىڭ ارقاسىندا كورىپ وتىرمىز دەسەم ارتىق ايتقاندىعىم ەمەس. الەۋمەتتىك ماسەلەلەر بىرتىندەپ شەشىلىپ كەلەدى.
قازىر كوپتەگەن مۇمكىندىك قاراستىرىلعان. مەملەكەت تە قولداۋ كورسەتىپ ءجۇر. جول, سۋ جانە گاز سىندى قاجەتتى ينفراقۇرىلىمدىق جەلىلەر ەلدى مەكەندەرگە تارتىلىپ جاتىر. بيىل اۋدانىمىزدا ءار ۇيگە سۋ تارتىلادى دەپ جوسپارلانىپ وتىر. جول سالۋ ماسەلەسى دە ۇدايى نازاردا ەكەنى قۋانتادى. حالىق مۇنىڭ بارلىعىن كورىپ وتىر. تەك قانا جۇمىس ىستەۋ قاجەت.
پرەزيدەنتتىڭ ايتقاندارى كوڭىلگە قونىمدى. بيىل پاندەميا ەلىمىزدى عانا ەمەس, بۇكىل الەمدى سىناق رەجىمىنەن وتكىزدى. بۇل سىناققا حالقىمىزدىڭ اۋىزبىرشىلىگى مەن ىنتىماعى ارقىلى توتەپ بەرىپ, جاھاندىق داعدارىستان شىعۋ ءۇشىن بار كۇش-جىگەرىمىزدى جۇمىلدىرا بىلدىك. ۋاقتىلى قابىلدانعان شارالاردىڭ ناتيجەسىندە جاعداي تۇراقتالدى دەسەك تە بولادى.
اۋىلدا تۋىپ-وسكەن اداممىن. قاجىرلى ەڭبەكتىڭ قانداي بولاتىنىن جاقسى تۇسىنەمىن. زەينەت جاسىندا بولعانىما قاراماستان, اتقا وتىرىپ, تراكتوردى قازىر دە تىزگىندەي الامىن. سەبەبى ەڭبەك جولىمدا بارلىق ساتىلاردان ءوتىپ شىقتىم. تۇتاستاي دەربەس ەلىمىزدىڭ ىرگەسى قالانعانىنان باستاپ, ونىڭ گۇلدەنۋ كەزەڭدەرىنىڭ كۋاگەرى بولعانىما قۋانىشتىمىن. مۇنىڭ ءبارى مەن ءۇشىن اسا قىمبات. ءبىزدىڭ جالعىز وتانىمىز – تاۋەلسىز قازاقستان! مەنىڭ تۇسىنىگىمدە باسقا وتان جوق. سول سەبەپتى ەلىمدە ءومىر ءسۇرىپ, ەڭبەك ەتەمىن. بۇل پىكىرىمدى بالالارىم دا قۋاتتايدى.
نيكولاي شەرەر,
«فرۋنزەنسكوە» جشس ديرەكتورى,
قوستاناي وبلىسى
