يندەر اۋداندىق پروباتسيا قىزمەتىنىڭ ەسەبىندە 41 ادام تۇر. ولاردىڭ اراسىندا باس بوستاندىعىن شەكتەۋ جازاسىنا تارتىلعان 18, شارتتى سىناق مەرزىمىن العان 8, بەلگىلى ءبىر قىزمەتپەن اينالىسۋ قۇقىعىنان ايىرىلعان 15 سوتتالۋشى بار. ولارعا الەۋمەتتىك كومەكتەر كورسەتىلدى.
اۋداندىق جۇمىسپەن قامتۋ ءبولىمى ارقىلى 8 سوتتالۋشى جۇمىسقا ورنالاستىرىلدى. ونىڭ ىشىندە ەكەۋى جۇرگىزۋشى, وزگەلەرى ءار سالاداعى مەكەمەلەرگە جۇمىسشى بولىپ ورنالاستى. ال باس بوستاندىعى شەكتەلگەن ەكى سوتتالۋشى مەديتسينالىق جاردەم الدى. سونداي-اق ۇشەۋىنە ءبىر جولعى قارجىلاي قولداۋ كورسەتىلسە, دەمەۋشىلەر تاراپىنان ەكى ادامعا ازىق-ت ۇلىك بەرىلدى.
ارينە پروباتسيا قىزمەتىنىڭ ينسپەكتورلارى سوتتالۋشىلارعا ۇدايى قۇقىقتىق كومەك بەرىپ, ولاردىڭ قايتادان قىلمىس جاساۋعا بارماۋىنا ىقپال ەتىپ وتىر. سونىڭ ناتيجەسىندە سوتتالۋشىلار تاراپىنان قىلمىستى قايتالاپ جاساۋ دەرەگى تىركەلگەن جوق. سول سەبەپتەن يندەر اۋداندىق سوتىنا جىل باسىنان بەرى التى ۇسىنىس جولدانىپ, التى سوتتالۋشى شارتتى تۇردە مەرزىمىنەن بوساتىلدى.
پروباتسيالىق ەسەپتە تۇرعاندارعا الەۋمەتتىك كومەك كورسەتۋمەن بىرگە ولاردى الەۋمەتتىك وڭالتۋ, قايتا جاسالاتىن قىلمىستىڭ الدىن الۋ, بولدىرماۋ ماقساتىندا ولارمەن تاربيەلىك ءمانى بار ءتۇرلى ءىس-شارالار ۇيىمداستىرىلىپ كەلەدى. يندەر اۋداندىق پروباتسيا قىزمەتىنىڭ ەسەبىندە تۇرعانداردىڭ ەكەۋى «ەرىكتى-ۆولونتەر» ءىس-شاراسىنا قاتىسىپ, كوپ بالالى اناعا ازىق-ت ۇلىكپەن كومەكتەستى. تاعى ءبىرى اۋداندىق اۋرۋحاناسىنا سيىر ەتىن اكەلىپ, ناۋقاستاردىڭ ءنارلى تاماقپەن قامتىلۋىنا قول ۇشىن سوزدى.
سونىمەن قاتار «اتامەكەن» ۇكپ-نىڭ وڭىرلىك فيليالىمەن بىرلەسە پروباتسيا قىزمەتىنىڭ ەسەبىندەگى سوتتالۋشىلاردىڭ جەكە بيزنەسىن دامىتۋ ماقساتىندا شاعىن نەسيە الۋىنا قولداۋ كورسەتىلىپ وتىر. ويتكەنى ولار دا شاعىن كاسىپكەرلىك نىسانىن اشقىسى كەلەدى. ناتيجەلى جۇمىسپەن قامتۋدىڭ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان مەملەكەتتىك باعدارلاماسىمەن ەكى ادام «باستاۋ بيزنەس» قىسقا مەرزىمدىك كۋرسىندا وقىدى. ولار جەكە كاسىبىن اشۋ ءۇشىن كەپىلسىز ءارى قايتارىمسىز 5 556 000 تەڭگە مولشەرىندە مەملەكەتتىك گرانت الدى. ال ءبىر سوتتالۋشى «اتامەكەن» سەرتيفيكاتىن الىپ, مەملەكەتتىك گرانت قارجىسىن كۇتىپ وتىر.
بيبىگۇل قاناتباەۆا,
يندەر اۋداندىق پروباتسيا قىزمەتى توبىنىڭ اعا ينسپەكتورى,
ادىلەت كاپيتانى
اتىراۋ وبلىسى
