بيىلعى ىرىكتەۋگە وڭىردە ءار سالادا ەڭبەك ەتىپ جۇرگەن ەكى جۇزدەن استام جاس قاتىستى. ۇمىتكەرلەر ەسىمى اۋەلى الەۋمەتتىك جەلىدە تانىستىرىلدى. ولارعا كوپشىلىك قوستاناي وبلىسىنىڭ جاستار ساياساتى ماسەلەلەرى جونىندەگى باسقارماسىنىڭ ينستاگرام پاراقشاسى ارقىلى داۋىس بەردى. بۇل ىرىكتەۋدىڭ ءبىرىنشى كەزەڭى. ودان تاڭدالعان ەڭ مىقتىلاردى بايقاۋ كوميسسياسى تالقىعا سالدى. ءسويتىپ, 11 نوميناتسيادا ۇزدىكتەر انىقتالدى.
سونىمەن, «جاس ساياساتكەر» اتالىمىندا الينا يششانوۆا, «جۋرناليستيكا» نوميناتسياسىندا قاسقىرباي قويشىمانوۆ, «مادەنيەت جانە ونەر سالاسىنا قوسقان ۇلەسى ءۇشىن» – جاننا تالاسپاەۆا, ء«بىلىم جانە عىلىم سالاسىنا قوسقان ۇلەسى ءۇشىن» – رۇستەم بەيىشوۆ, «مەملەكەتتىك قىزمەتتى دامىتۋعا قوسقان ۇلەسى ءۇشىن» – رىسكۇل تاسكۋمباەۆا, «سپورتتاعى جەتىستىكتەرى ءۇشىن» – نادەجدا ريابەتس, «دەنساۋلىق ساقتاۋ سالاسىن دامىتۋعا قوسقان ۇلەسى ءۇشىن» – كارينا يۋسۋپوۆا, «جاستار كاسىپكەرلىگىن دامىتۋعا جانە Start-up جوبالارعا قوسقان ۇلەسى ءۇشىن – ءلاززات احماديەۆا, «ۆولونتەرلىقتى دامىتۋعا قوسقان ۇلەسى ءۇشىن» – دامير وتەباەۆ, «اۋىلدىڭ دامۋىنا قوسقان ۇلەسى ءۇشىن» – ناۋرىزبەك بىرماعامبەتوۆ «التىن كىتاپ» لاۋرەاتى اتاندى. ال قىزمەتتىك بورىشىن اتقارۋ بارىسىندا قىلمىسكەردىڭ قولىنان قازا تاپقان پوليتسيا قىزمەتكەرى دارحان بازارباەۆتىڭ ەسىمى «جاس باتىر» نوميناتسياسى بويىنشا «التىن كىتاپقا» جازىلدى.
قوستاناي وبلىسى
