سوڭعى ون شاقتى جىلدىڭ ىشىندە قوستاناي تۇرعىندارىنىڭ ءومىر ءسۇرۋ ساپاسىن جاقسارتۋ ماسەلەسىندەگى ەڭ باستى جەتىستىك – حالىقتى تۇرعىن ۇيمەن قامتۋ ماسەلەسىنىڭ وڭتايلى شەشىلۋى دەسەك قاتەلەسپەيمىز. ارينە, توبىل جاعالاۋىنداعى شىرايلى شاھار تۇرعىندارى تۇگەلدەي باسپانالى بولدى دەۋدەن اۋلاقپىز. الايدا قازىر بۇرىنعىداي ەمەس, تۇرعىن ءۇي الۋدىڭ ءتيىمدى تەتىكتەرى مەن ناقتى جۇيەسى قالىپتاسىپ, تالپىنعان جاننىڭ اينالاسى 3-4 جىلدىڭ ىشىندە پاتەرلى بولۋىنا تولىق مۇمكىندىك بار. بۇگىندە ايماقتا تابىستى جۇزەگە اسىرىلىپ جاتقان مەملەكەتتىك باعدارلامالار ارقىلى مىڭداعان وتباسى ء«وز ءۇيى – ولەڭ توسەگىنە» قول جەتكىزىپ جاتىر. وعان قالانىڭ ىرگەسىندە بوي كوتەرگەن جاڭا شاعىن اۋدانداردىڭ شىرايىن اشا تۇسكەن شۋاقتى تىرشىلىك كۋا. قازىرگى قوستانايدىڭ سىرت كەلبەتى دە ادام تانىماستاي وزگەرگەن. قالانىڭ باتىسىندا «اەروپورت», سولتۇستىك-باتىسىندا «التىن ارمان», «يۋبيلەينىي», «بەرەكە» دەپ اتالاتىن جاڭا شاعىن اۋداندار پايدا بولىپ, بۇرىنعى شاعىن شاھار كادىمگىدەي قانات جايىپ, كەرەگەسىن كەڭەيتە ءتۇستى.
الايدا اتالعان شاعىن اۋدانداردىڭ تۇرعىندارى تاڭعى جانە كەشكى قاربالاستا ورتالىققا باراتىن نەمەسە كەرى قايتاتىن جول قاتىناسىنىڭ قيىنداپ كەتكەنىن ايتادى. قازىر ەكىنشى قوستانايعا №8, 10, 12, 38-باعىتتارداعى 4 اۆتوبۋس قاتىنايدى. تۇرعىنداردىڭ ايتۋىنشا, جۇمىسقا باراتىن جانە جۇمىستان قايتاتىن ۋاقىتتا ءيىن تىرەستىرە جولاۋشى تيەپ الاتىن بۇل اۆتوبۋستاردا ىندەتكە قارسى سانيتارلىق ساقتىق شارالارى ساقتالا بەرمەيدى. بۇعان دا كوندىگىپ قالعان جۇرتتى, اسىرەسە, بالالاردىڭ جاعدايى قينايدى.
– قازىر 1-4 سىنىپتىڭ وقۋشىلارى مەكتەپتەگى كەزەكشى توپتاردا ءبىلىم الىپ جاتىر. ءار توپقا 15 بالادان ءبولىپ تاستادى. ولاردىڭ ساباعى دا ءار ۋاقىتتا باستالادى. ەڭ باستى ماسەلە, №28 گيمنازياعا ەكىنشى قوستانايدان كەلەتىن اۆتوبۋستىڭ جوقتىعى بولىپ تۇر. ءبىزدىڭ شاعىن اۋداندا تۇراتىن 33 اتا-انانىڭ بالالارى وسى مەكتەپتە وقىپ جاتىر. ءبارىنىڭ ايتاتىنى سول, باياعى اۆتوبۋستىڭ جوقتىعى. بىزگە №8 نەمەسە №38-اۆتوبۋستىڭ ءبىرىنىڭ باعىتىن وزگەرتىپ, بالالارىمىز وقيتىن گيمنازيا ارقىلى جۇرەتىندەي ەتىپ بەرسە, سول دا جەتەر ەدى. ايتپەسە كۇن سايىن ن.نازارباەۆ داڭعىلىنداعى «اگروماش» ايالداماسىنان ءتۇسىپ قالامىن دا, بالامدى دەدەكتەتىپ بەرى قاراي مەكتەپكە دەيىن جاياۋ كەلەمىن. وتكەندە ەرىنبەي ساناپ شىقتىم, ايالدامامەن مەكتەپتىڭ اراسى 800 مەتردەن اسىپ كەتەدى ەكەن, – دەيدى «يۋبيلەينىي» شاعىن اۋدانىنىنىڭ تۇرعىنى ورالباي قابىل.
بالالارى №28-مەكتەپ-گيمنازيادا وقىپ جاتقان 33 اتا-انا قوستاناي قالاسىنىڭ اكىمى قايرات احمەتوۆكە ءوتىنىش ءبىلدىرىپ, «سىزدەن سۇرايتىنىمىز, ن.نازارباەۆ داڭعىلىمەن جۇرەتىن №8 نەمەسە №38-اۆتوبۋستىڭ ءبىرىنىڭ بورودين كوشەسىنە بۇرىلىپ, پوبەدا كوشەسى ارقىلى ءوز باعىتىنا قايتا تۇسەتىن ەتىپ وزگەرتۋگە كومەكتەسىڭىز. سوندا تومەنگى سىنىپتا وقيتىن ءبىزدىڭ بالالارىمىز مىنگەن اۆتوبۋس مەكتەپتىڭ جانىنداعى ايالداماعا توقتايتىن ەدى. بۇل مەكتەپكە دە, بالالارعا دا قولايلى. ءبىز بالالارىمىزدىڭ دەنساۋلىعىنا الاڭداپ وتىرمىز. الدا التى اي قىس بار. قازىرگى ايالداما مەن مەكتەپتىڭ اراسى تىم ۇزاق. وسى ماسەلەنىڭ جەدەل شەشىلۋىنە كومەكتەسۋىڭىزدى وتىنەمىز», دەگەن مازمۇندا حات جولداعان ەكەن. وكىنىشكە قاراي, اتا-انالاردىڭ ءوتىنىشى قالا اكىمدىگى تاراپىنان قولداۋ تاپپادى. قالالىق اكىمدىككە قاراستى تۇرعىن-ءۇي كوممۋنالدىق شارۋاشىلىق, جولاۋشىلار كولىگى جانە اۆتوموبيل جولدارى ءبولىمىنىڭ باستىعى ن.مۋسين كومەكتەن ۇمىتتەنىپ وتىرعان اتا-انالارعا №28 مەكتەپ-گيمنازياعا قالانىڭ باسقا اۋداندارىنان كەلەتىن قوعامدىق كولىك مارشرۋتتارىن تۇگەندەي كەلىپ, مازمۇنى ب ۇلىڭعىرلاۋ جاۋاپ حات جولداپتى. حاتتا: «سىزدەر ۇسىنىپ وتىرعان قوعامدىق كولىكتىڭ باعىتىن وزگەرتۋگە بولمايدى. ويتكەنى باسقا جولاۋشىلارعا كەرى اسەرى تيەدى. جول ءجۇرۋ ۇزاقتىعى كەمىندە 20 مينۋتقا ارتادى. سوندىقتان ايالدامادان تۇسكەن سوڭ, كەلەسى كولىككە ءمىنىپ مەكتەپكە جەتۋگە بولادى», دەپ جازىلعان.
تاۋى شاعىلعان اتا-انالاردىڭ ءبىرازى بالالارى ءۇشىن ەندى ەكىنشى دەڭگەيلى بانكتەردىڭ بىرىنەن نەسيە رەسىمدەپ, ەسكى بولسا دا, ايتەۋىر قالا ىشىندە ءجۇرىپ-تۇرۋعا جارايتىن جەڭىل كولىك ساتىپ الۋدىڭ قامىنا كىرىسىپ كەتتى.
قوستاناي وبلىسى
