– اۋدانداعى جاستار رەسۋرستىق ورتالىعىندا ۆولونتەرلەر شتابى قۇرىلعان. مۇندا اۋدان ورتالىعىنداعى مەكتەپتەردەن جانە جەرگىلىكتى اگروتەحنيكالىق كوللەدجدەن 54 ەرىكتى جاس جۇمىس ىستەپ جاتىر. سونداي-اق جىل باسىندا مەملەكەتتىك مەكەمەلەر مەن قوعامدىق ۇيىم وكىلدەرىنەن 59 ادامنان تۇراتىن ۆولونتەرلەر توبى قۇرىلدى. ۆولونتەرلەر شتابى 409 ادامدى قامتيتىن 56 ءىس-شارا وتكىزدى, 617 ادامعا كومەك كورسەتىلدى. سونىمەن قاتار اۋداننىڭ ءار مەكتەبىندە ۆولونتەر جاساقتارى جۇمىس ىستەيدى, وندا 100-دەن استام ۆولونتەر بار. وقۋشىلار وتكىزەتىن ءىس-شارالار ەڭبەك ارداگەرلەرىنە, زەينەتكەرلەرگە جانە جالعىز باستى ادامدارعا كومەكتەسۋگە باعىتتالعان. تاقىرىپتىق كونتسەرتتەر مەن ەكولوگيالىق اكتسيالار وتكىزىلەدى, – دەيدى قارابالىق اۋدانى جاستار رەسۋرستىق ورتالىعىنىڭ جەتەكشىسى يرينا التىننيكوۆا.
بۇقارالىق ءىس-شارالاردى وتكىزۋگە تىيىم سالۋعا بايلانىستى ناۋرىز ايىنان باستاپ الەۋمەتتىك جەلىلەردە بەلسەندى ۆولونتەرلىك جۇمىس باستالدى. ونىڭ ىشىندە جاستار بەلسەندى اتسالىسقان «ۇيدە بول!», «بەتپەردە كيۋدى ۇمىتپا!», «قاشىقتىقتى ساقتا!», «ۋاقىتتى پايدالى وتكىز», «مەن وتانعا قىزمەت ەتۋگە دايىنمىن!» سياقتى بەينەروليكتەردى اتاپ وتۋگە بولادى. مۇنىڭ سىرتىندا, دارىگەرلەرگە قولداۋ كورسەتۋ ماقساتىندا «مىڭ العىس!» شاراسى دا ۇيىمداستىرىلعان.
ەرىكتى جاستار اۋدان تۇرعىندارىنا شەكتەۋ شارالارىن ساقتاۋدىڭ ماڭىزدىلىعىن ءتۇسىندىرۋ جۇمىستارىنا دا بەلسەندى اتسالىسىپ كەلەدى. وتكەن ايدا ۆولونتەرلەر مەن موو قىزمەتكەرلەرى پوليتسيا قىزمەتكەرلەرىمەن بىرلەسىپ كارانتين شارالارىن ساقتاۋ تۋرالى ءتۇسىندىرۋ پاراقشالارىن تاراتتى. ۆولونتەر جاساقتارى اۋداندىق اۋرۋحانامەن دە تىعىز بايلانىستا بولىپ, توتەنشە جاعداي كەزەڭىندە زەينەتكەرلەرگە جانە اۋرۋحانادا ەسەپتە تۇرعان جالعىزباستى ادامدارعا ءدارى-دارمەك تاسىمالداۋدى ۇيىمداستىردى.
– ءساۋىر ايىنان باستاپ زەينەتكەرلەرگە, مۇمكىندىگى شەكتەۋلى جاندارعا جانە اۋداننىڭ الەۋمەتتىك قىزمەتكەرلەرىنە بەتپەردە تىگۋ جۇمىستارى باستالدى. ۆولونتەرلەر تىككەن مىڭنان استام ماسكا الەۋمەتتىك قورعاۋ بولىمىنە بەرىلگەن, ولاردىڭ ءبىر بولىگىن موو قىزمەتكەرلەرى ءوز بەتىنشە الىپ كەتىپ وتىرعان. ەلدەگى قالىپتاسقان جاعدايعا بايلانىستى مەرەكەلىك ءىس-شارالار الەۋمەتتىك جەلىلەرگە اۋىستىرىلدى. 6-8 مامىر ارالىعىندا ۆولونتەرلەر 130 تىل ەڭبەككەرىن قۇتتىقتاپ, ولارعا ەكىنشى دۇنيەجۇزىلىك سوعىستاعى جەڭىستىڭ 75 جىلدىعىن مەرەكەلەۋگە ارنالعان ەستەلىك مەدالداردى تاپسىردى. سونداي-اق بۇل كۇندەرى الەۋمەتتىك جەلىلەردە كەنت تۇرعىندارىنىڭ قاتىسۋىمەن «جەڭىس لەنتاسى» جانە «سوعىس اندەرى» اكتسيالارى وتكىزىلدى. مەملەكەتتىك رامىزدەر كۇنىن مەرەكەلەۋگە وراي «مەن پاتريوتپىن!» ەرىكتىلەر مەن كەنت تۇرعىندارىنىڭ قاتىسۋىمەن قارابالىق باتىر مەموريالىندا ەلىمىزدىڭ ءانۇرانى ورىندالدى, - دەيدى ورتالىق جەتەكشىسى.
تامىز ايىندا قارابالىق ۆولونتەرلەرى «تازا جاعالاۋ» ەكولوگيالىق اكتسياسىن ۇيىمداستىردى. ۆولونتەرلەر مەن كەنت تۇرعىندارى ورتاق كۇش-جىگەرمەن توعىزاق وزەنى جاعالاۋىنىڭ 15 شاقىرىمىن تازالاپ, 2 تىركەمە قوقىس شىعاردى. اۋداندا قالىپتاسقان ەپيدەميالىق جاعدايعا بايلانىستى جاستار رەسۋرستىق ورتالىعى مەملەكەتتىك الەۋمەتتىك تاپسىرىس بويىنشا تەك 1 جوبانى «ۆولونتەرلەر مەكتەبىن» ىسكە اسىرعان. جوبانىڭ نەگىزگى مىندەتى – اۋىلدىق جەرلەردە جاستار باستامالارىن دامىتۋ. ءبىر اي ىشىندە ۇەۇ ماماندارى ۆولونتەرلىك جاساقتاردى قالىپتاستىرۋ جانە الەۋمەتتىك جوبالاردىڭ نەگىزگى قاعيداتتارىن ءتۇسىندىرۋ ماقساتىندا اۋىلدىق وكرۋگتەردىڭ جاستارى ءۇشىن ونلاين-ترەنينگتەر وتكىزدى.
«ۆولونتەرلەر مەكتەبى» جوباسىنىڭ اياقتالۋى 23 قازاندا وتكەن الەۋمەتتىك ەرىكتىلەر جوبالارىنىڭ جارمەڭكەسى بولدى. اۋىلدىق وكرۋگتەر مەن قارابالىق كەنتىنەن 10 باستاماشىل توپ ءوز جوبالارىن ۇسىندى. جۇلدە قورى 900 مىڭ تەڭگەنى قۇرادى. قارابالىق كەنتىنىڭ «حوككەي كورتىن ءىشىنارا جوندەۋ» جوباسىن ىسكە اسىرۋعا «قارابالىق ۆولونتەرلەرى» اقپاراتتىق توبى 300 000 تەڭگە كولەمىندە گرانت الدى. توعىزاق ورتا مەكتەبىنىڭ ۆولونتەرلەرى «مەكتەپ تەلەستۋدياسى» جوباسىنا 200 مىڭ تەڭگە, پوبەدا اۋىلىنىڭ ۆولونتەرلەرى بۇلاق اۋماعىن اباتتاندىرۋعا 200 مىڭ تەڭگە الدى. 100 مىڭ تەڭگە ورنەك مادەنيەت ءۇيى ءۇشىن پروەكتور ساتىپ الۋعا جانە «ستانتسيوننىي اۋىلىندا تۋريزم مەن سپورتتى دامىتۋ» جوبالارىنا بەرىلدى.
اۋداندا جەلتوقسان ايىندا ۆولونتەر جىلىن قورىتىندىلاۋ شاراسىن وتكىزۋ جوسپارلانىپ وتىر. اۋقىمدى شاراعا ارنايى «جىل ۆولونتەرى – 2020» بايقاۋىنىڭ ەرەجەسى ازىرلەندى. بەلسەندى ۆولونتەرلەر مەن باستاماشىل توپتاردى ماراپاتتاۋ «ۇزدىك ۆولونتەر», «ۇزدىك ۆولونتەرلىك ۇيىم», «ۇزدىك ۆولونتەرلىك جوبا» اتالىمدارى بويىنشا وتەدى. بايقاۋدىڭ ەرەجەسى مەن ءوتىنىم نىسانى اۋىلدىق وكرۋگتەرگە, اۋداننىڭ مەملەكەتتىك مەكەمەلەرى مەن ۇيىمدارىنا جىبەرىلگەن.
– بيىل, ەڭ ءبىرىنشى كەزەكتە, ۆولونتەرلەرگە دەگەن قوعامدىق كوزقاراس وزگەردى, سونداي-اق وبلىسىمىزدا ۆولونتەرلىك قوزعالىستىڭ قاناتى كەڭي ءتۇستى. قازىر اۋدانىمىزدا ۆولونتەرلىك ورتالىق قۇرىلماعان ءبىلىم وشاعى كەمدە-كەم. بۇل جاستاردىڭ الەۋمەتتىك جاۋاپكەرشىلىگىنىڭ ارتقانىن كورسەتەدى, – دەيدى قارابالىقتىق جاستار.
قوستاناي وبلىسى,
قارابالىق اۋدانى
