قازاقستان • 02 جەلتوقسان، 2020

ەلىمىزدىڭ 10 وڭىرىندە بالالاردى وڭالتۋ ورتالىقتارى اشىلادى

16 رەت كورسەتىلدى

پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا مۇمكىندىگى شەكتەۋلى جانداردى الەۋمەتتىك قورعاۋ ماسەلەسى قارالدى، دەپ حابارلايدى Egemen.kz.

وتىرىستا ءسوز سويلەگەن دەنساۋلىق ساقتاۋ ءمينيسترى الەكسەي تسوي قازاقستاندا 2020 جىلدىڭ 10 ايىنىڭ قورىتىندىسى بويىنشا مۇگەدەك ادامداردىڭ سانى 705 500 ادامدى قۇرايتىنىن، ونىڭ ىشىندە 93 900-ءى بالالار ەكەنىن اتاپ ءوتتى.

«ەلىمىزدە مەديتسينالىق وڭالتۋ ءۇشىن 500-دەن استام ۇيىم جۇمىس ىستەيدى، ونىڭ ىشىندە 37 ەرەسەك جانە 23 بالالاردى وڭالتۋ ورتالىعى بار»، — دەپ اتاپ ءوتتى ا. تسوي.

مۇمكىندىگى شەكتەۋلى ادامدار باسقالارمەن تەڭدەي پروفيلاكتيكالىق، دياگنوستيكالىق جانە ەمدىك مەديتسينالىق قىزمەتتەردى، ءدارى-دارمەكتەردى قامتيتىن تمككك-مەن قامتاماسىز ەتىلگەن. 2020 جىلى قالپىنا كەلتىرۋ ەمى مەن مەديتسينالىق وڭالتۋدى 567 جەتكىزۋشى كورسەتەدى، بۇل 2019 جىلمەن سالىستىرعاندا 8،9 ەسە كوپ. 2020 جىلى جەتكىزۋشىلەرمەن 638 مىڭ قىزمەت كورسەتۋگە شارتتار جاسالدى، بۇل 2019 جىلمەن سالىستىرعاندا 15 ەسە كوپ. 2020 جىلى مەديتسينالىق وڭالتۋدى قاجەت ەتەتىن ادامدار 60%-عا قامتاماسىز ەتىلدى. وتكەن جىلمەن سالىستىرعاندا بۇل 7%-عا ارتىق. 2021 جىلى قاجەتتى قىزمەتتەرمەن قامتاماسىز ەتۋ سانىن 75%-عا دەيىن ارتتىرۋ جوسپارلانۋدا، ال 2025 جىلعا قاراي بارلىق مۇقتاج ازاماتتاردى وڭالتۋمەن تولىق قامتاماسىز ەتۋدى جۇزەگە اسىرۋ جوسپارلانۋدا.

2020 جىلدىڭ 10 ايىندا امبۋلاتوريالىق-ەمحانالىق كومەك شەڭبەرىندە جالپى سوماسى 11 ملرد تەڭگەدەن استام 6،4 ملن قىزمەت، ستاتسيونارلىق مەديتسينالىق كومەك اياسىندا 90 ملرد تەڭگەدەن استام سوماعا 384 مىڭ قىزمەت كورسەتىلدى.

«امبۋلاتوريالىق ءدارى-دارمەكپەن قامتاماسىز ەتۋ اياسىندا مۇمكىندىگى شەكتەۋلى جاندارعا شامامەن 5،1 ملرد تەڭگەگە 21 737 رەتسەپت بەرىلدى، ونىڭ ىشىندە بالالار ءۇشىن 2،2 ملرد تەڭگەگە 6 859 رەتسەپت، ەرەسەكتەر ءۇشىن 2،8 ملرد تەڭگەگە 14 878 رەتسەپت»، — دەپ اتاپ ءوتتى ا. تسوي.

بالالاردىڭ مۇگەدەكتىگىنىڭ الدىن الۋ ءۇشىن نەوناتالدىق حيرۋرگيانى، بالالار كارديوحيرۋرگيالىق قىزمەتىن، ونكوگەماتولوگيانى دامىتۋ شارالارى ىسكە اسىرىلۋدا.

ەستۋ قابىلەتىن قالپىنا كەلتىرۋ بويىنشا وپەراتسيالار جاسالادى. قانت ديابەتىنىڭ اسقىنۋىن بولدىرماۋ ءۇشىن 2008 جىلدان باستاپ جاڭادان انىقتالعان ناۋقاستار ينسۋلين پومپالارىمەن تەگىن قامتاماسىز ەتىلەدى. دەنساۋلىق ساقتاۋدى دامىتۋدىڭ 2020-2025 جىلدارعا ارنالعان مەملەكەتتىك باعدارلاماسى شەڭبەرىندە مۇگەدەكتەرگە مەديتسينالىق كومەكتىڭ قولجەتىمدىلىگى مەن ساپاسىن ارتتىرۋ شارالارى كوزدەلگەن.

«مەملەكەتتىك-جەكەمەنشىك ارىپتەستىك تەتىكتەرىن تارتا وتىرىپ، ەلىمىزدىڭ 10 وڭىرىندە بالالاردى وڭالتۋ ورتالىقتارىن اشۋ جوسپارلانۋدا. بۇل الماتى، اقتوبە، اتىراۋ، شقو، بقو، قوستاناي، ماڭعىستاۋ، سقو، تۇركىستان وبلىستارىندا جانە نۇر-سۇلتان قالاسىندا»، — دەپ اتاپ ءوتتى مينيستر.

قازاقستان رەسپۋبليكاسى تۇڭعىش پرەزيدەنتى قورىنىڭ بالالارعا ارنالعان وڭالتۋ ورتالىقتارى جەلىسىن كەڭەيتۋدەگى ءرولىن اتاپ ءوتۋ قاجەت. وسى جىلدىڭ سوڭىنا دەيىن مۇمكىندىگى شەكتەۋلى بالالارعا ارنالعان 8 بالالار ورتالىعى ىسكە قوسىلادى. 18 وڭالتۋ ورتالىعىنىڭ اشىلۋى 45 مىڭنان استام بالانى مەديتسينالىق وڭالتۋمەن قامتاماسىز ەتۋگە مۇمكىندىك بەرەدى.

«وسىلايشا، مينيسترلىك مۇگەدەك ادامدارعا مەديتسينالىق كومەكتىڭ قولجەتىمدىلىگى مەن ساپاسىن ارتتىرۋ بويىنشا كەشەندى شارالار قابىلداۋدا»، — دەپ اتاپ ءوتتى ا. تسوي.

سوڭعى جاڭالىقتار

الەم كۋبوگى وتەدى

سپورت • كەشە

ۇقساس جاڭالىقتار