مينيستر سوڭعى جىلدارى اشم مەملەكەتتىك قىزمەتتەر مەن سالالىق بيزنەس-پروتسەستەردى تسيفرلاندىرۋ بويىنشا اۋقىمدى جۇمىس جۇرگىزگەنىن حابارلادى. اتالمىش ۆەدومستۆودا اۆتوماتتاندىرۋ دەڭگەيى 94%-عا جەتتى. 2020 جىلى اشم-ءنىڭ ەلەكتروندىق فورماتتا كورسەتكەن قىزمەتتەرىنىڭ ۇلەسى 34%-عا ءوستى.
بيزنەس-پروتسەستەردىڭ باسىم بولىگى «E-Agriculture» بىرىڭعاي اۆتوماتتاندىرىلعان باسقارۋ جۇيەسى ەسەبىنەن تسيفرلاندىرىلدى. بۇگىندە وسىنىڭ ارقاسىندا فەرمەرلەر مەن ساۋدا ۇيىمدارىنىڭ وكىلدەرى ينتەرنەت ارقىلى قاجەتتى قۇجاتتاردى الۋدا.
اتاپ ايتقاندا, وسىمدىك شارۋاشىلىعىندا بارلىق 11 رۇقسات بەرۋ قۇجاتتارى تسيفرلاندىرىلعان. مال شارۋاشىلىعى سالاسىندا 12 رۇقسات بەرۋ قۇجاتىنىڭ 10-ى ەلەكتروندىق فورماتقا اۋىستىرىلدى.
سۋبسيديالاۋدىڭ بارلىق باعىتتارى, سونداي-اق اۋىل شارۋاشىلىعى تەحنيكاسىن تىركەۋ, دايىنداۋشى ۇيىمداردى اككرەديتتەۋ پروتسەستەرى جانە ميكرونەسيەلەرگە كەپىلدىك بەرۋ جونىندەگى كوميسسيانىڭ جۇمىسى 100%-عا اۆتوماتتاندىرىلدى.
سونداي-اق قر اشم Plem.kz اقپاراتتىق تالداۋ جۇيەسى ارقىلى مال شارۋاشىلىعىنداعى سەلەكتسيالىق جانە اسىل تۇقىمدىق جۇمىستىڭ ەسەبىن تسيفرلاندىردى. ەندى 35 مىڭ قولدانۋشى ەلەكتروندى فورماتتا جانۋارلاردىڭ شىعۋ تەگىن راستاي الادى جانە زووتەحنيكالىق وقيعالاردى رەتتەي الادى.
ساپارحان وماروۆ قازاقستان ەاەو مەملەكەتتەرى اراسىندا اۋىل شارۋاشىلىعى جانۋارلارىن بىردەيلەندىرۋدىڭ اقپاراتتىق جۇيەسىمەن ينتەگراتسيالانعان, اۋىل شارۋاشىلىعى جانۋارلارىن ەسەپكە الۋدىڭ بىرىڭعاي جۇيەسى ەنگىزىلگەن العاشقى ەل ەكەنىن اتاپ ءوتتى. بۇگىندە وندا 35 ملن-نان استام مال تىركەلگەن. جۇيەنى دامىتۋ اياسىندا جاقىن ارادا ەلەكتروندىق ۆەتەريناريالىق پاسپورتتاردى بەرۋ قىزمەتى ەنگىزىلەتىن بولادى.
سونىمەن قاتار, مينيستر اوك تسيفرلاندىرۋ ماسەلەسى تولىق شەشىلدى دەپ ايتۋ ءالى ەرتە ەكەنىن اتاپ ءوتتى. مينيسترلىك جاڭا مىندەتتەر جيىنتىعىمەن جۇمىس ىستەۋدە.
قازىرگى ۋاقىتتا اگرارلىق سالانى تسيفرلاندىرۋ دەڭگەيى انىقتالدى جانە «ناقتى اۋىل شارۋاشىلىعى» جۇيەسىن ەنگىزۋ بويىنشا جۇمىس قولعا الىنعان. سمارت-جۇيەلەردى پيلوتتىق رەجيمدە ەنگىزۋ وڭ اسەرىن كورسەتتى.
ماسەلەن, ناقتى ەگىنشىلىكتە جاڭا تەحنولوگيالاردى قولدانا وتىرىپ, اگرونوميادا 20%-عا دەيىن كوبىرەك ءونىم الا الدى, بۇل رەتتە فەرمەردىڭ شىعىندارى 15%-عا دەيىن قىسقاردى. مال شارۋاشىلىعىندا زاماناۋي جابدىقتاردى قولدانۋ ارقىلى ءسۇت كولەمى 20%-عا, تولدەيتىن بۇزاۋلاردىڭ سانى 25%-عا ءوستى.
س. وماروۆتىڭ ايتۋىنشا, اوك پروتسەستەرىن 5 جىل ىشىندە تولىق تسيفرلاندىرۋ كەلەسى قوسىمشا ناتيجەلەردى بەرەدى:
– 20%-عا جالپى الىمدى ۇلعايتۋعا;
– ەڭبەك ونىمدىلىگىن 50%-عا ارتتىرۋعا.
قر اشم اوك تسيفرلاندىرۋ – تاۋەكەلدەر مەن وندىرىستىك شىعىنداردى ازايتۋعا, اۋا رايىنىڭ وزگەرۋىنە بەيىمدەلۋگە, اۋىل شارۋاشىلىعى داقىلدارىنىڭ جانە جانۋارلاردىڭ ونىمدىلىگىن ارتتىرۋعا, اگروتەحنولوگيالاردى ۋاقىتىلى جوسپارلاۋعا مۇمكىندىك بەرەدى دەيدى. سايىپ كەلگەندە, جاڭا تەحنولوگيالاردى ەنگىزۋ وتاندىق اۋىل شارۋاشىلىعى ونىمدەرىنىڭ ساپاسى مەن باسەكەگە قابىلەتتىلىگىن ارتتىرادى.
سونداي-اق, اۋىل شارۋاشىلىعى ءمينيسترى جەر قاتىناستارىن تسيفرلاندىرۋ جۇمىستارىنا دا توقتالىپ ءوتتى. مينيستر جەر قاتىناستارىن باسقارۋدىڭ بازالىق قۇرالى جەر ۋچاسكەلەرى بويىنشا, ونىڭ ىشىندە توپىراق, گەوبوتانيكالىق جانە اۋىل شارۋاشىلىعى كارتالارى بويىنشا 6,5 ملن مالىمەتتى ساقتايتىن مەملەكەتتىك جەر كاداسترىنىڭ اۆتوماتتاندىرىلعان اقپاراتتىق جۇيەسى بولىپ تابىلاتىنىن ەسكە سالدى. وسى جۇيە ارقىلى قازاقستاندىقتارعا جەر قاتىناستارى سالاسىنداعى ەلەكتروندىق مەملەكەتتىك قىزمەتتەردىڭ 15 ءتۇرىنىڭ 12-ءسى كورسەتىلەدى.
2021-2022 جىلدارى توپىراق جانە گەوبوتانيكالىق كارتالار بويىنشا قامتۋ 40 ملن گەكتارعا دەيىن جانە اۋىل شارۋاشىلىعى كارتالارى بويىنشا 33,2 ملن گەكتارعا دەيىن ۇلعايتىلاتىن بولادى. قر اوك دامىتۋدىڭ 2022-2026 جىلدارعا ارنالعان مەملەكەتتىك باعدارلاماسى اياسىندا بارلىعىن كولەمدى تسيفرلىق اۋىل شارۋاشىلىعى كارتالارىمەن قامتۋ جوسپارلانۋدا.
قازىر مينيسترلىك مەملەكەت باسشىسىنىڭ تاپسىرماسىنا سايكەس اۋىل شارۋاشىلىعى جەرلەرىن بەرۋ ءتارتىبىن رەتكە كەلتىرۋ بويىنشا جۇمىس اتقارۋدا. 2021 جىلدىڭ ءبىرىنشى توقسانىنىڭ سوڭىنا دەيىن ۆەدومستۆو كەزەككە قويۋ پروتسەسىن اۆتوماتتاندىرۋدى اياقتاۋدى جوسپارلاپ وتىر.
پرەزيدەنتتىڭ جەردى اۋىل شارۋاشىلىعى اينالىمىنا تارتۋ جونىندەگى تاپسىرماسىن ورىنداۋ اياسىندا كوسمومونيتورينگ ارقىلى پيلوتتىق جوبا جۇزەگە اسىرىلۋدا. ءبىرىنشى كەزەڭنىڭ ناتيجەسى بويىنشا اقمولا, شىعىس قازاقستان, قوستاناي جانە ماڭعىستاۋ وبلىستارىندا پايدالانىلمايتىن 8,3 ملن گا جايىلىمدىق جەر انىقتالدى. 2,6 ملن گا جايىلىم ەرىكتى تۇردە مەملەكەت مەنشىگىنە قايتارىلدى, 5,7 ملن گا جەردىڭ يەلەرىنە حابارلاما جىبەرىلدى.
سونداي-اق, پرەزيدەنتتىڭ تاپسىرماسىنا وراي قر اشم جەر قاتىناستارى سالاسىندا تسيفرلاندىرۋ جانە دامىتۋ ماسەلەلەرى بويىنشا زاڭ جوبالارىن ازىرلەۋ جۇمىستارىن جۇرگىزۋدە. اتالمىش زاڭ نورمالارى جەر بەرۋدىڭ قازىرگى تارتىبىنە تۇجىرىمدامالىق نەگىزدە وزگەرىستەر ەنگىزۋدى كوزدەيدى.
