وسى جىلدار ىشىندە قازاقستان عاسىرعا جۇك بولار عالامات جەتىستىكتەرگە قول جەتكىزدى. اتا-بابالار اڭساعان ارمان-مۇراتتار ورىندالىپ, ەگەمەن ەل بولىپ تولىق قالىپتاستى. ەڭسەسى تىك, ىرگەسى بەرىك, ناعىز تاۋەلسىز مەملەكەتكە اينالدى. مۇنىڭ ءبارى ەلباسىمىز, تاۋەلسىز قازاقستاننىڭ تۇڭعىش پرەزيدەنتى نۇرسۇلتان ءابىش ۇلى نازارباەۆتىڭ ەرەن ەڭبەگىنىڭ ناتيجەسى ەكەنى ءسوزسىز.
مەملەكەت باسشىسى قاسىم-جومارت كەمەل ۇلى توقاەۆ «تاريحي تۇلعا تاعىلىمى» اتتى ماقالاسىندا «ەلباسى – ەلىمىزدىڭ نەگىزىن قالاۋشى, ەلدىگىمىزدىڭ سيمۆولى, تاۋەلسىز قازاقستاننىڭ ءتول تاريحىنىڭ باستاۋىندا تۇرعان تۇعىرلى تۇلعا!», دەگەن ەدى.
شىن مانىندە, نۇرسۇلتان ءابىش ۇلى ەل تىزگىنىن قولعا العان تۇستا قازاقستاننىڭ ىشكى احۋالى وتە كۇردەلى بولعانىن ءبارىمىز جاقسى بىلەمىز. ءبىزدىڭ سول كەزدەگى جاعدايىمىزدى ەسكەرىپ, بولاشاعىمىزعا سەنىمسىزدىكپەن قاراعاندار دا از بولمادى. تۇڭعىش پرەزيدەنتىمىز سول تىعىرىقتان شىعار جولدى تاۋىپ قانا قويماي, وزىنە جۇكتەلگەن تاريحي ميسسيانى ارتىعىمەن ورىندادى. تاۋەلسىز قازاقستان مەملەكەتىن قۇرىپ, ەگەمەندىكتىڭ ەڭ باستى تۇعىرلارىن تاس-ءتۇيىن بەكىتىپ بەردى.
ەڭ الدىمەن, شەكاراداي كۇردەلى ماسەلە كەمەڭگەرلىكپەن شەشىلىپ, حالىقارالىق قۇجاتتارمەن ءبىرجولا شەگەندەلدى. نۇرسۇلتان ءابىش ۇلى ءبىر سوزىندە «جەر تاعدىرى – ەل تاعدىرى» دەگەن ەدى. شەكارا ماسەلەسى تۇپكىلىكتى شەشىلمەسە مەملەكەتتىڭ تاۋەلسىزدىگى بايانسىز, بولاشاعى ب ۇلىڭعىر بولادى. ونى بۇگىندە ءبارىمىز كورىپ وتىرمىز. سوندىقتان ەلباسىمىز بۇل ىستە داۋ-دامايعا ەمەس, ساليقالى ديپلوماتياعا ارقا سۇيەدى. ناتيجەسىندە بابالارىمىزدان امانات بولعان ۇلان-بايتاق جەر ماڭگىلىككە قازاقتىڭ باستى بايلىعىنا اينالدى.
تۇڭعىش پرەزيدەنتىمىز مەملەكەتتىك باسقارۋ ينستيتۋتتارىنىڭ زاماناۋي ۇلگىسىن قالىپتاستىردى. ەل دامۋىنا تىڭ سەرپىن بەرگەن اتا زاڭىمىز – كونستيتۋتسيامىز قابىلداندى. سوعان سايكەس بيلىك تارماقتارى قالىپتاسىپ, قوس پالاتالى كاسىبي پارلامەنت, ۇكىمەت, تاۋەلسىز سوت جۇيەسى قۇرىلدى. جەرگىلىكتى اكىمدىكتەردىڭ جۇمىسى جولعا قويىلدى. سول ارقىلى مەملەكەتتىك باسقارۋ ينستيتۋتتارى جۇيەلەنىپ, ارقايسىسىنىڭ ماقسات-مىندەتتەرى ناقتىلاندى. ەگەمەندىگىمىز بەن ەلدىگىمىزدىڭ بەرىك قالقانى بولعان قارۋلى كۇشتەرىمىز جاساقتالدى.
ەكونوميكا سالاسىندا كەشەندى رەفورمالار جاسالىپ, ەكونوميكالىق ءوسىمنىڭ جوعارى دەڭگەيى قامتاماسىز ەتىلدى. ەلباسىمىز بۇل باعىتتا دا اسا ماڭىزدى جانە تاريحي شەشىمدەر قابىلدادى. وسىلايشا تۇڭعىش پرەزيدەنتىمىز بۇكىل الەم مويىنداعان دامۋدىڭ «قازاقستاندىق جولىن» ايقىنداپ بەردى.
ەلباسىمىزدىڭ كەمەڭگەر شەشىمدەرىنىڭ ءبىرى – استانانى ارقا توسىنە كوشىرۋ ەكەنى داۋسىز. سول كەزدەگى ەكونوميكالىق قيىندىقتارعا قاراماستان قابىلدانعان بۇل شەشىم ناعىز ستراتەگيالىق قادام بولدى. نۇرسۇلتان نازارباەۆ استانانى كوشىرۋ ارقىلى قازاقتىڭ جاڭا زامانداعى ۇلى كوشىن باستاپ بەردى.
راسىمەن, ەلوردانىڭ ءوسىپ-وركەندەۋى تۇتاس قازاقستاننىڭ دامۋىنا داڭعىل جول اشتى. وتانىمىزدىڭ ابىرويىن اسقاقتاتىپ, بەدەلىن ءوسىردى, بۇكىل قازاقستاندىقتاردى جاڭا ماقسات-مۇراتتارعا جەتەلەدى. بۇگىندە ەلوردامىز وتانىمىزدىڭ جۇرەگى, تاۋەلسىزدىگىمىزدىڭ تىرەگى, مەملەكەتتىك دامۋدىڭ ناعىز تەمىرقازىعىنا اينالدى. جاڭا استانانى تۇڭعىش پرەزيدەنتىمىزدىڭ تاباندىلىعى مەن باتىلدىعىنىڭ جارقىن كورىنىسى دەۋگە ابدەن بولادى.
«تاريحتى تارلان تۇلعالار جاسايدى» دەگەن ءسوز بار. ەلباسىنىڭ ەلدىك مۇددە جولىندا قابىلداعان ءار شەشىمى ۇلت تاريحىنىڭ جاڭا تاراۋى بولىپ جازىلاتىنى انىق. سولاردىڭ ىشىندە تۇركىستان وبلىسىن قۇرىپ, تۇركىستان شاھارىنا جاڭا مارتەبە بەرۋ تۋرالى شەشىمنىڭ ماڭىزى زور.
تۇركىستان – قازاق ءۇشىن ەجەلدەن قۇت دارىپ, كيە قونعان قاستەرلى مەكەن جانە ۇلتتىق رۋحتىڭ وزەگى. ەل دامۋىنىڭ جاڭا كەزەڭىندە ونىڭ قايتا تۇلەۋى تۇتاس قازاقستاننىڭ وركەندەۋىنە تىڭ سەرپىن بەرەرى انىق. قازىردىڭ وزىندە ونىڭ ناتيجەسىن كورىپ تە, سەزىنىپ تە وتىرمىز.
تۇركىستاندى تۇلەتۋ – وتكەننەن ونەگە الا وتىرىپ, كەمەل كەلەشەككە ۇمتىلۋدىڭ وزىق ۇلگىسى. وسى جولداعى «مادەني مۇرا», «رۋحاني جاڭعىرۋ» باعدارلامالارى دا ايرىقشا مانگە يە. تاريحتان تاعىلىم الۋ كەيىن شەگىنۋ ەمەس, ول – ۇلتتىق كودتى ساقتاۋدىڭ جارقىن كورىنىسى. راسىندا ۇلتتىق كودسىز مەملەكەت بولمايدى. سول سەبەپتى بۇل سالادا ەلباسى ۇلتتىق تۇتاستىقتىڭ كەپىلى رەتىندە باتىل شەشىمدەر قابىلداۋدان قايمىققان جوق.
نۇرسۇلتان ءابىش ۇلىنىڭ جاسامپازدىق پەن جاڭاشىلدىقتى توعىستارعان وسىنداي ستراتەگيالىق قادامدارىن سىرتقى ساياساتىمىزدان دا بايقاۋعا بولادى. اسىرەسە ەلباسىنىڭ جاھاندىق قاۋىپسىزدىكتى قامتاماسىز ەتۋگە ىقپال ەتكەن باستامالارىن ەرەكشە اتاپ وتكەن ءجون. تۇڭعىش پرەزيدەنتىمىزدىڭ ساياساتى مەن باستامالارى كۇش پەن قارۋعا ەمەس, كەرىسىنشە, پاراسات پەن پايىمعا, ديالوگ پەن سەنىمگە ارقا سۇيەدى. وركەنيەتارالىق جانە دىنارالىق كەلىسىمگە باسىمدىق بەردى. سول ارقىلى الەمدى الاڭداتقان ماسەلەلەردى شەشۋگە ءوز ۇلەسىن قوستى.
ەلباسىنىڭ سارابدال ساياساتىنىڭ ناتيجەسىندە قازاقستان بۇكىل الەمگە ەكونوميكاسى قۋاتتى, ىنتىماعى جاراسقان, جاۋاپكەرشىلىگى جوعارى ەل رەتىندە تانىلدى.
تۇڭعىش پرەزيدەنتىمىز سالعان وسى سارا جولدان اينىماي, تاۋەلسىز ەلىمىزدى ماڭگىلىك ەتۋ, ساباقتاستىقتى ساقتاۋ – ءبارىمىزدىڭ ابىرويلى مىندەتىمىز.
مەرەكە قۇتتى بولسىن!
