Елбасы • 01 Желтоқсан, 2020

Мәулен Әшімбаев: Қазақтың жаңа замандағы ұлы көшін бастап берді

25 рет көрсетілді

Барша Қазақстан халқын Тұңғыш Президент күнімен шын жүректен құт­тықтаймын!

Осыдан 29 жыл бұрын Қазақ­стан халқы тарихи таңдауын жасап, еліміздің Тұңғыш Прези­дентін сайлады. Бұл тәуелсіздік жолындағы ең маңызды қадам­дардың бірі болды деп айтуға толық негіз бар.

 

Осы жылдар ішінде Қазақстан ғасырға жүк болар ғаламат жетістіктерге қол жет­кізді. Ата-бабалар аңсаған арман-мұраттар орындалып, егемен ел болып толық қалыптасты. Еңсесі тік, іргесі берік, нағыз тәуелсіз мемлекетке айналды. Мұның бәрі Елбасымыз, тәуелсіз Қазақстанның Тұңғыш Президенті Нұрсұлтан Әбішұлы Назарбаевтың ерен еңбегінің нәтижесі екені сөзсіз.

Мемлекет басшысы Қасым-Жомарт Кемелұлы Тоқаев «Тарихи тұлға тағы­лымы» атты мақаласында «Елбасы – еліміздің негізін қалаушы, елдігіміздің символы, тәуелсіз Қазақстанның төл тарихының бастауында тұрған тұғырлы тұлға!», деген еді.

Шын мәнінде, Нұрсұлтан Әбішұлы ел тізгінін қолға алған тұста Қазақстанның ішкі ахуалы өте күрделі болғанын бәрі­міз жақсы білеміз. Біздің сол кездегі жағ­дайымызды ескеріп, болашағымызға сенімсіздікпен қарағандар да аз болмады. Тұңғыш Президентіміз сол тығырықтан шығар жолды тауып қана қоймай, өзіне жүктелген тарихи миссияны артығымен орындады. Тәуелсіз Қазақстан мемлекетін құрып, егемендіктің ең басты тұғырларын тас-түйін бекітіп берді.

Ең алдымен, шекарадай күрделі мәселе кемеңгерлікпен шешіліп, халықаралық құжаттармен біржола шегенделді. Нұрсұлтан Әбішұлы бір сөзінде «Жер тағдыры – ел тағдыры» деген еді. Шекара мәселесі түпкілікті шешілмесе мемлекеттің тәуелсіздігі баянсыз, болашағы бұлыңғыр болады. Оны бүгінде бәріміз көріп отырмыз. Сондықтан Елбасымыз бұл істе дау-дамайға емес, салиқалы дипломатияға арқа сүйеді. Нәтижесінде бабаларымыздан аманат болған ұлан-байтақ жер мәңгілікке қазақтың басты байлығына айналды.

Тұңғыш Президентіміз мемлекеттік басқару институттарының заманауи үлгі­сін қалыптастырды. Ел дамуына тың серпін берген Ата Заңымыз – Консти­ту­циямыз қабылданды. Соған сәйкес билік тармақтары қалыптасып, қос пала­талы кәсіби Парламент, Үкімет, тәуел­сіз сот жүйесі құрылды. Жергілікті әкім­дік­тердің жұмысы жолға қойылды. Сол ар­қылы мемлекеттік басқару инсти­туттары жүйеленіп, әрқайсысының мақсат-міндеттері нақтыланды. Еге­мен­дігіміз бен елдігіміздің берік қалқаны болған Қарулы Күштеріміз жасақталды.

Экономика саласында кешенді реформалар жасалып, экономикалық өсімнің жоғары деңгейі қамтамасыз етілді. Елба­сымыз бұл бағытта да аса маңызды және тарихи шешімдер қабылдады. Осы­лайша Тұңғыш Президентіміз бүкіл әлем мойындаған дамудың «Қазақстандық жолын» айқындап берді.

Елбасымыздың кемеңгер шешім­дерінің бірі – астананы Арқа төсіне көшіру екені даусыз. Сол кездегі экономикалық қиындықтарға қарамастан қабылданған бұл шешім нағыз стратегиялық қадам болды. Нұрсұлтан Назарбаев астананы көшіру арқылы Қазақтың жаңа замандағы ұлы көшін бастап берді.

Расымен, елорданың өсіп-өркендеуі тұтас Қазақстанның дамуына даңғыл жол ашты. Отанымыздың абыройын асқақ­татып, беделін өсірді, бүкіл қазақстан­дық­тарды жаңа мақсат-мұраттарға жетеледі. Бүгінде елордамыз Отанымыздың жүрегі, тәуелсіздігіміздің тірегі, мемлекеттік дамудың нағыз темірқазығына айналды. Жаңа астананы Тұңғыш Президентіміздің табандылығы мен батылдығының жарқын көрінісі деу­ге әбден болады.

«Тарихты тарлан тұлғалар жасайды» деген сөз бар. Елбасының елдік мүдде жолында қабылдаған әр шешімі ұлт тарихының жаңа тарауы болып жазылатыны анық. Солардың ішінде Түркістан облысын құрып, Түркістан шаһарына жаңа мәртебе беру туралы шешімнің маңызы зор.

Түркістан – қазақ үшін ежелден құт дарып, кие қонған қастерлі мекен және ұлттық рухтың өзегі. Ел дамуының жаңа кезеңінде оның қайта түлеуі тұтас Қазақ­станның өркендеуіне тың серпін берері анық. Қазірдің өзінде оның нәтижесін көріп те, сезініп те отырмыз.

Түркістанды түлету – өткеннен өнеге ала отырып, кемел келешекке ұмтылудың озық үлгісі. Осы жолдағы «Мәдени мұра», «Рухани жаңғыру» бағдарламалары да айрық­ша мәнге ие. Тарихтан тағылым алу кейін шегіну емес, ол – ұлттық кодты сақ­тау­дың жарқын көрінісі. Расында ұлттық кодсыз мемлекет болмайды. Сол себепті бұл салада Елбасы ұлттық тұтас­тық­тың кепілі ретінде батыл шешімдер қабылдаудан қаймыққан жоқ.

Нұрсұлтан Әбішұлының жасампаздық пен жаңашылдықты тоғыстарған осындай стратегиялық қадамдарын сыртқы саясатымыздан да байқауға болады. Әсіресе Елбасының жаһандық қауіпсіздікті қам­тамасыз етуге ықпал еткен бастамаларын ерекше атап өткен жөн. Тұңғыш Президентіміздің саясаты мен бастамалары күш пен қаруға емес, керісінше, парасат пен пайымға, диалог пен сенімге арқа сүйеді. Өркениетаралық және дінаралық келісімге басымдық берді. Сол арқылы әлемді алаңдатқан мәселелерді шешуге өз үлесін қосты.

Елбасының сарабдал саясатының нәтижесінде Қазақстан бүкіл әлемге экономикасы қуатты, ынтымағы жарасқан, жауапкершілігі жоғары ел ретінде танылды.

Тұңғыш Президентіміз салған осы сара жолдан айнымай, тәуелсіз елімізді мәңгілік ету, сабақтастықты сақтау – бәріміздің абыройлы міндетіміз.

Мереке құтты болсын!

Соңғы жаңалықтар

Ұқсас жаңалықтар