وبلىستا رايىمبەك اۋدانىن دامىتۋعا تۇراقتى كوڭىل ءبولىنىپ كەلەدى. قايتا جاڭعىرعان ايماقتاعى 7 اۋىلدىڭ جولىن جوندەۋگە 1,6 ملرد تەڭگەگە قارجى ءبولىنىپ, ۇزىندىعى 65 شاقىرىم جول جوندەلگەن. ونىڭ ىشىندە اۋدان ورتالىعى نارىنقول اۋىلىندا جالپى ۇزىندىعى 31,5 شاقىرىم بولاتىن كوشەلەرگە 795 ملن تەڭگەگە اسفالت توسەلدى. 8 تۇرعىن ۇيمەن بىرىكتىرىلگەن ۋچاسكەلىك پوليتسيا پۋنكتى سالىندى.
بىلتىر جامبىل, قاقپاق اۋىلدارىندا دارىگەرلىك امبۋلاتوريالار تۇرعىزىلىپ, پايدالانۋعا بەرىلگەن. بيىل 1,1 ملرد تەڭگەگە قىزىلشەكارا, جامبىل, قاقپاق اۋىلدارىندا اۋىز سۋ جۇيەسى جاسالىپ جاتىر. الداعى ۋاقىتتا تاعى 7 اۋىل ساپالى اۋىز سۋمەن قامتىلاتىن بولادى. 2018 جىلدان بەرى 4 مەكتەپ پەن 2 بالاباقشا كۇردەلى جوندەۋدەن وتكەنىن دە اتاپ وتكەن ءلازىم. تاعى 3 مەكتەپتى كۇردەلى جوندەۋدەن وتكىزۋگە جوبالىق-سمەتالىق قۇجاتى دايىندالعان.
ەل ىشىندەگى جاعداي وڭالعانىن اۋىل شارۋاشىلىعى سالاسىنىڭ العا باسۋىنان بايقاۋعا بولادى. اۋداندا, اسىرەسە كارتوپ ءوسىرۋ ءىسى جاقسى جولعا قويىلدى. وبلىس قاراجاتى ەسەبىنەن 28 بىرلىك تراكتور مەن 111 بىرلىك اۋىل شارۋاشىلىعى تەحنيكاسى, 236 توننا گوللانديالىق «سانتە» جانە «اگريا» كارتوپ تۇقىمدارى ساتىپ الىنعان. ينۆەستيتسيالىق جوبانىڭ اياسىندا 4 سەرۆيستىك-دايىنداۋ ورتالىعى قۇرىلدى. سونىڭ ناتيجەسىندە كارتوپتى ءار گەكتارىنان 300 تسەنتنەردەن ءونىم الۋعا قول جەتكىزىلدى.
ءوڭىردىڭ رۋحاني جاڭعىرۋى دا قارقىندى. كەلەر جىلى اقيىق اقىن مۇقاعالي ماقاتاەۆتىڭ 90 جىلدىعىن وتكىزۋ جوسپاردا بار. وسى ورايدا قاراساز اۋىلىنداعى مادەنيەت ۇيىنە, مۇقاعالي ماقاتاەۆتىڭ ادەبي-مەموريالدى مۋزەيىنە جوندەۋ جۇمىستارى جۇرگىزىلدى.
جالپى, بيىل اۋدان تۇرعىندارى يگىلىگىنە بىرنەشە الەۋمەتتىك نىسان مەن قىزمەت كورسەتۋ عيماراتتارى, نارىنقول اۋىلىندا قىرىقتان استام تۇرعىن ءۇي قولدانىسقا بەرىلدى. سونىمەن قاتار «ازاماتتارعا ارنالعان ۇكىمەت» جəنە اۋداندىق پروكۋراتۋرا عيماراتتارى ىسكە قوسىلدى.
– شەكارانىڭ شەبىندە, وبلىستىڭ شەتىندە قايتا شاڭىراق كوتەرگەن رايىمبەك اۋدانىنىڭ جاڭارىپ, كوركەيىپ كەلە جاتقانى كوڭىل قۋانتادى. ەلباسى نۇرسۇلتان ءابىش ۇلى نازارباەۆتىڭ جارلىعىمەن قايتا قۇرىلعاننان بەرى اۋدانداعى حالىق سانى ءوسىپ, 40 مىڭعا جۋىقتادى. سونىڭ ىشىندە ەكى مىڭنان اسا ادام تۋعان جەرىنە قايتا ورالدى. اۋداننىڭ دامۋىنا, ينفراقۇرىلىمىن قالپىنا كەلتىرۋگە بيۋدجەتتەن 17,9 ملرد تەڭگە قارجى جۇمسالدى. جولدارى جاسالىپ, كوشەلەرىنە اسفالت توسەلىپ, جاڭا عيماراتتار سالىندى. باسقا دا يگىلىكتەردىڭ بارلىعى جاسالۋدا. سونىڭ ىشىندە ءبىرىنشى كەزەكتە, اۋدانعا جۇمىس ىستەۋگە كەلگەن قىزمەتكەرلەردى باسپانامەن قامتاماسىز ەتۋ ماسەلەسىن شەشىپ كەلەمىز. مىنە, سالىنىپ جاتقان 83 كوممۋنالدىق تۇرعىن ءۇيدىڭ العاشقى كەزەگىن قولدانىسقا بەرىپ وتىرمىز, – دەيدى وبلىس اكىمى اماندىق باتالوۆ.
ايتپاقشى, اۋداندا سالىنىپ جاتقان دەنەشىنىقتىرۋ-ساۋىقتىرۋ كەشەنى دە جىل سوڭىنا قاراي اياقتالۋى ءتيىس. ونىڭ الاڭى – 4257 شارشى مەتر. كەشەندى «فۋد مس» كومپانياسى سالۋدا. قۇرىلىس جۇمىستارىنا قازىر 87 ادام تارتىلعان.
الماتى وبلىسى
