اۋليەكول اۋداندىق ىشكى ساياسات ءبولىمىنىڭ تاپسىرىسىمەن ەكى جىلعا مەجەلەنگەن الەۋمەتتىك جوبانى قوستاناي وبلىسىنىڭ پسيحولوگتەر اسسوتسياتسياسى جۇزەگە اسىرا باستادى. پسيحولوگ ەۆگەنيا يۋرينانىڭ ايتۋىنشا, اۋداننىڭ كەز كەلگەن جاستاعى تۇرعىنى جاڭا ورتالىققا كەلىپ, باسىنداعى جاعدايعا قاتىستى تەگىن كەڭەس الا الادى. ورتالىق ماماندارى كوبىنە وتباسىندا ورىن الىپ جاتاتىن زورلىق-زومبىلىق, جانجالداردى شەشۋگە دايىنبىز دەپ وتىر.
– ءبىز كۇيزەلىسكە ۇشىراعان وتباسىلار مەن بالالارعا پسيحولوگيالىق جانە الەۋمەتتىك-قۇقىقتىق كومەك كورسەتەمىز. وسى ماقساتتا اۋداندىق پروباتسيا قىزمەتىمەن جانە ءبىلىم بولىمىمەن تىعىز بايلانىستا جۇمىس جۇرگىزىپ جاتىرمىز, – دەدى جوبا جەتەكشىسى يۋليا كاليۋجنايا.
پسيحولوگتەردەن قۇرالعان ءموبيلدى توپتار 10 شاقتى شاعىن ەلدى مەكەندى ارالاپ, اۋىل جاستارىنىڭ كۇيزەلىسكە قارسى كۇرەس داعدىلارىن دامىتۋعا ارنالعان ارنايى ترەنينگتەر وتكىزىپ, اتا-انالارعا پسيحولوگيالىق كەڭەس بەردى. سونىمەن قاتار اۋداننىڭ جەرگىلىكتى مۇعالىمدەرى مەن پسيحولوگتەرىنە وتباسىنداعى زورلىق-زومبىلىق ماسەلەسىنە قاتىستى سەمينارلار وتكىزىپ جاتىر.
مامانداردىڭ سوزىنشە, ورتالىققا كەلۋشىلەردىڭ كوبى كامەلەت جاسقا تولماعان جاسوسپىرىمدەر ەكەن.
– ولاردىڭ ىشىندە اتا-اناسىمەن نەمەسە قۇربىلارىمەن جانجالداسىپ قالعاندار, تۇرمىسى تومەن وتباسىندا تۇرىپ جاتقان جاسوسپىرىمدەر بار. ءبىزدىڭ ماماندارىمىز ولارعا پسيحولوگيالىق تۇرعىدا قولداۋ كورسەتىپ, بالالاردىڭ كۇيزەلىس جاعدايىنان شىعۋىنا كومەك كورسەتەدى. قانداي جاعدايدا بولماسىن, بالانىڭ مۇددەسىن قورعاپ قالۋىمىز كەرەك. بۇل ماقساتتا پروباتسيا قىزمەتىمەن بىرلەسىپ اتقارعان جۇمىسىمىز ءوز جەمىسىن بەرۋدە. مىسالى, وسى اۋداندا تۇراتىن كامەلەتكە تولماعان بالا ءوز تۋىسىنىڭ ىقپال ەتۋىمەن ۇرلىق جاساعان. اڭداماي باسىپ, قىلمىسقا بارعان ءجاسوسپىرىمنىڭ ءوزى وسىدان كەيىن تەرەڭ كۇيزەلىسكە ءتۇسىپ, پروباتسيا قىزمەتىنىڭ ۇسىنىسىمەن ءبىزدىڭ ورتالىققا كەلدى. ماماندار بالاعا پسيحولوگيالىق كومەك كورسەتۋدە. بالانىڭ اناسى دا بىزگە ءجيى باس سۇعىپ تۇرادى.
بيىل مىناداي وقيعا ورىن الدى. بۇرىن بالالار ۇيىندە تاربيەلەنگەن ەكى بالانى تۋىستارى اسىراپ العان. بىراق ءبىراز ۋاقىت وتكەن سوڭ بالالاردىڭ ول وتباسىنان قاشىپ كەتكەنى تۋرالى حابار الدىق. جوعالعان بالالاردى ەكى كۇن بويى ىزدەستىرىپ ءجۇرىپ ارەڭ تاپتىق. ولار سودان بەرى ءبىزدىڭ ورتالىقتا تۇرىپ جاتىر. تاياۋدا عانا بالالاردىڭ جاقىن تۋىستارى تابىلىپ, ەكى بالانى دا اسىراپ الاتىندىقتارىن حابارلادى, دەيدى ە.يۋرينا.
پسيحولوگتەر قامقورلىق مەكەمەلەرىمەن دە تىعىز بايلانىستا جۇمىس ىستەپ كەلەدى. داعدارىس ورتالىعىنىڭ ماماندارى اتالعان مەكەمەلەردىڭ وكىلدەرىمەن بىرگە تۇرمىسى تومەن 30 شاقتى وتباسىن ارالاپ, تۇرمىستىق, پسيحولوگيالىق كەڭەس بەرگەن.
قوستاناي وبلىسى
