ناتيجە كوڭىل كونشىتپەيدى. پوليتسەيلەر ادامدى زاڭسىز باس بوستاندىعىنان ايىرۋ, جاس قىزداردى ءتانىن ساۋدالاۋعا ماجبۇرلەۋ, جىنىستىق قىزمەت كورسەتەتىن استىرتىن ورىندار ۇيىمداستىرۋ, ول جەردە ادامدى كۇشتەپ ۇستاۋ سياقتى كوپتەگەن قىلمىس تۇرلەرىن اشكەرەلەپ وتىر. پوليتسەيلەر مۇنداي ورىنداردا ءماجبۇرلى تۇردە جۇرگەن 3 ادامدى الىپ شىعىپ, ولاردى ارناۋلى الەۋمەتتىك قولداۋ كورسەتۋ ورتالىعىنا ورنالاستىردى.
ماسەلەن, ادامدى زاڭسىز باس بوستاندىعىنان ايىرۋعا قاتىستى وقيعانىڭ ءبىرى ب.مايلين اۋدانىندا تىركەلىپ وتىر. وسى اۋدانعا قاراستى قايرانكول اۋىلىنىڭ ماڭىنداعى جەكە شارۋاشىلىقتا 33 جاستاعى تۇرعىن 21 جاستاعى جىگىتكە ەكى جىل بويى كۇشتەپ مال باقتىرىپ قويعان. پوليتسەيلەر شارۋاشىلىق يەسىنە قاتىستى قر قك 126-بابىنىڭ 3-ءبولىم, 2-تارماعى بويىنشا قىلمىستىق ءىس قوزعاپ, تەرگەۋگە كىرىستى.
«STOP-ترافيك» شاراسى بارىسىندا قوستاناي قالاسىنىڭ تەمىرباەۆ كوشەسىندەگى پاتەرلەردىڭ بىرىندە 28 جاستاعى قىزدىڭ اپالى-ءسىڭلىلى ەكى بويجەتكەندى جەزوكشەلىكپەن اينالىسۋعا ماجبۇرلەپ كەلگەنى انىقتالىپ وتىر. اتالعان قىلمىس بويىنشا ءىس قوزعالىپ, تەرگەۋ ءجۇرىپ جاتىر.
پوليتسەيلەر ادام ساۋداسىنىڭ بەلەڭ الىپ كەتپەۋى ءۇشىن رەيد جۇمىستارىن جيىلەتىپ, قىلمىستىڭ الدىن الۋ ماقساتىنداعى شارالاردى كۇشەيتتى.
قوستاناي وبلىسى
