اۋدان اكىمى جانسۇلتان تاۋكەنوۆتىڭ ايتۋىنشا, كارانتين جاعدايىنا قاراماستان, اۋداندا مەملەكەتتىك باعدارلامالار اياسىندا تىڭ ينۆەستيتسيالىق جوبالار ىسكە قوسىلىپ, جاڭا جۇمىس ورىندارى اشىلعان.
«بيزنەستىڭ جول كارتاسى-2025» باعدارلاماسىن جۇزەگە اسىرۋ اياسىندا وسى جىلدىڭ 9 ايىندا قوستاناي اۋدانىندا 1 ملرد تەڭگە قارجىعا 26 جوباعا نەسيە بەرىلىپ وتىر. مىسالى, توبىلدىق كاسىپكەر «اۆتو بالا كۇتۋشى – بالانى اۆتوكولىكپەن الىپ ءجۇرۋ» جوباسىن جاساۋعا گرانت ۇتىپ العان. اۋدان اكىمى مۇنداي نەسيەلەر كوبىنە جۇك تاسىمالداۋعا, كوكونىس ءوسىرۋ, ساۋدانى دامىتۋ جانە جيھاز ءوندىرىسى بويىنشا قىزمەتتى كەڭەيتۋگە بەرىلگەنىن ايتادى. سونىمەن قاتار قوستاناي اۋدانىندا كاسىپكەرلىكتى قولداۋدىڭ وبلىستىق كارتاسىنا ەنگەن جوبالار ءساتتى جۇزەگە اسىرىلۋدا. ماسەلەن, جۋكوۆ اۋىلىندا برويلەر ەتىن وندىرەتىن اگروونەركاسىپتىك كەشەن, سادوۆىي اۋىلىندا ءسۇت فەرماسى جانە ءسۇت وڭدەۋ جانە ىرىمشىك ءوندىرۋ تسەحى سالىنىپ جاتىر. ال توبىل قالاسىندا وسى جىلدىڭ سوڭىنا قاراي قوقىستى سۇرىپتاۋ كەشەنى ىسكە قوسىلادى.
بولاشاق ينۆەستيتسيالىق جوبالارعا كەلسەك, 2022 جىلى ۋليانوۆ اۋىلدىق وكرۋگىندە قۇس شارۋاشىلىعى قالدىقتارىنان ورگانيكالىق تىڭايتقىشتار ءوندىرىسىن ىسكە قوسۋ جوسپارلانىپ وتىر. جوبانىڭ قۇنى – 450 ملن تەڭگە, ال 2030 جىلعا قاراي توبىل قالاسىندا قۋاتى جىلىنا 360 مىڭ توننا ەت وندىرەتىن جانە مالدى قولدان ۇرىقتاندىراتىن كاسىپورىن ىسكە قوسىلۋى ءتيىس. جوبانىڭ قۇنى 1 ملرد تەڭگەگە جۋىقتايدى. جەل ەلەكتر ستانساسى 2021 جىلدىڭ ءبىرىنشى جارتىجىلدىعىندا ىسكە قوسىلادى دەپ جوسپارلانىپ وتىر. مۇندا 2018 جىلدان بەرى جۇمىس ءجۇرىپ جاتىر. گەنەراتورلاردىڭ قاجەتتى بولشەكتەرى رەسەي فەدەراتسياسى مەن قىتايدان اكەلىنىپ قويىلعان. قازىر جۇمىستى «جەل ەلەكتريك» جشس جالعاستىرۋدا. جوبانىڭ جالپى قۇنى 18,7 ملرد تەڭگەگە باعالانىپ وتىر. قازىر جەل ستانساسىنىڭ ىرگەتاستارى ورناتىلىپ جاتىر.
كاسىپورىن باسشىلىعىنىڭ ايتۋىنشا, جاڭا ەلەكتر ستانساسىنىڭ قۇرىلىسى 2021 جىلدىڭ ءبىرىنشى جارتىجىلدىعىنا دەيىن اياقتالادى.
اۋداندا بيىل «قاراپايىم زاتتار ەكونوميكاسى» باعدارلاماسى ءتيىمدى جۇزەگە اسىرىلىپ جاتىر. باعدارلاما اياسىندا قوستاناي اۋدانىندا جىلقى ءوسىرۋ, مايلى داقىلدار, ءداندى جانە ءداندى-بۇرشاقتى داقىلدار تۇقىمدارىن ءوسىرۋ, ۇن تارتۋ, جارما ونەركاسىبى ونىمدەرىن ءوندىرۋ بويىنشا توعىز جوبا قارجىلاندىرىلىپ, ولارعا جالپى كولەمى 1,5 ملرد تەڭگە بولىنگەن. وتىنىمدەردى قابىلداۋ ءالى دە جالعاسۋدا. سونىمەن قاتار اۋداندا «جۇمىسپەن قامتۋدىڭ جول كارتاسى» باعدارلاماسى اياسىندا 28 جوبانى ىسكە اسىرۋعا 4,3 ملرد تەڭگە ءبولىنىپ وتىر. مىسالى, ءبىلىم بەرۋ سالاسىندا 4 نىسانعا كۇردەلى جوندەۋ جۇرگىزۋگە, 2 نىساندى اعىمداعى جوندەۋدەن وتكىزۋ جۇمىستارىنا 1,3 ملرد تەڭگە قاراستىرىلدى. ەكى مادەنيەت وشاعىنا اعىمداعى جوندەۋ جۇمىستارى جۇرگىزىلىپ, وعان جالپى سوماسى 111,2 ملن تەڭگە جۇمسالدى. باعدارلامانىڭ شاراپاتى سپورت سالاسىنا دا ءتيىپ وتىر. مىسالى, زارەچنىي اۋىلىندا 71,5 ملن تەڭگەگە ستاديون سالىندى. تكش سالاسىندا جالپى سوماسى 2,6 ملرد تەڭگەگە 19 نىسانعا جوندەۋ جۇمىستارى جۇرگىزىلگەن. سونىمەن قاتار بيىل التىن دالا اۋىلىنا ورتالىقتاندىرىلعان سۋ قۇبىرى تارتىلدى.
– «جۇمىسپەن قامتۋدىڭ جول كارتاسى» باعدارلاماسىن جۇزەگە اسىرۋ بارىسىندا بيىل 1177 جاڭا جۇمىس ورىندارى قۇرىلدى, ونىڭ ىشىندە حالىقتى جۇمىسپەن قامتۋ ورتالىعى ارقىلى 605 ادام جۇمىسقا ورنالاستىرىلدى. باعدارلاما شارتتارى بويىنشا جۇمىسقا ورنالاسۋ كەزىندە جۇمىسسىز جاستارعا باسىمدىق بەرىلەتىنى ەسكەرىلە وتىرىپ, جوبالارعا 29 جاسقا دەيىنگى جاستار ساناتىنان شامامەن 241 ادام تارتىلدى, – دەدى اۋدان اكىمى جاسۇلان تاۋكەنوۆ.
«اۋىل – ەل بەسىگى» باعدارلاماسى شەڭبەرىندە قوستاناي اۋدانىنا قاراستى وكتيابر اۋىلىنداعى سوۆحوز ورتا مەكتەبىنە كۇردەلى جوندەۋ, سونداي-اق وكتيابر اۋىلىنداعى 2 كوشەگە جانە شەمينوۆ اۋىلىنداعى 4 كوشەگە ورتاشا جوندەۋ جۇرگىزىلدى.
وبلىستىق ترانسفەرتتەر ەسەبىنەن توبىل قالاسىنىڭ, ميچۋرين جانە مايكول اۋىلدارىنىڭ كوشەلەرى, وزەرنايا ستانساسىنىڭ كىرەبەرىسى مەن شەمينوۆ اۋىلىنىڭ بىرنەشە كوشەسى, وسينوۆ, اباي, نوۆوسەلوۆ اۋىلدارىن جالعاپ جاتقان اۋداندىق ماڭىزى بار كۇرە جول ورتاشا جوندەۋدەن ءوتتى.
«ەڭبەك» باعدارلاماسىنىڭ ءتيىمدى جۇزەگە اسىرىلۋى قوستاناي اۋدانىنداعى جۇمىسسىزدىق دەڭگەيىن ازايتىپ قانا قويماي, تۇرعىنداردىڭ جەكە بيزنەسىن كەڭەيتۋىنە نەمەسە جاڭا كاسىپ اشۋىنا مول مۇمكىندىك بەرىپ وتىر. بيىل اتالمىش باعدارلاما اياسىندا اۋداننىڭ 2657 تۇرعىنى ۋاقىتشا, تۇراقتى جۇمىس ورىندارىمەن قامتىلىپ وتىر.
باعدارلامانىڭ ەكىنشى باعىتى - «باستاۋ بيزنەس» جوباسى بويىنشا 113 ادام وقۋعا جىبەرىلىپ, 61 ادام شاعىن نەسيە الدى. سونداي-اق بيزنەس يدەيالاردى ىسكە اسىرۋ ماقساتىندا 81 گرانتقا 45,004 مىڭ تەڭگە قارجى ءبولىنىپ وتىر. باعدارلامانىڭ ءۇشىنشى باعىتى بويىنشا 34 ادام الەۋمەتتىك جۇمىس ورىندارىنا ورنالاستىرىلسا, جاستار پراكتيكاسىنا 52 ادام, قوعامدىق جۇمىستارعا 202 ادام جىبەرىلگەن. بيىلدىڭ وزىندە جۇمىسپەن قامتۋ ورتالىعى ارقىلى اۋداننىڭ 1377 تۇرعىنى تۇراقتى جۇمىسقا ورنالاستى.
قوستاناي
