باس سانيتاردىڭ قاۋلىسى جاريالانىسىمەن, پوليتسيا باسشىلىعى كارانتين رەجىمىنىڭ كۇشەيتىلۋىنە بايلانىستى ەنگىزىلگەن وزگەرىستەر تۋرالى ءتۇسىندىردى. جەرگىلىكتى پوليتسيا قىزمەتى باسقارماسى باستىعىنىڭ ورىنباسارى ۆيتالي تسويدىڭ ايتۋىنشا, وبلىس اۋماعىنداعى ءجۇرىپ-تۇرۋ ءتارتىبىنىڭ ساقتالۋىن 20 سانيتارلىق بەكەت قاداعالايدى. 17 قاراشادان باستاپ ءار اۋدانعا ءموبيلدى بەكەتتەر قويىلىپ, وبلىس ورتالىعى مەن رۋدنىيعا باراتىن تۇرعىنداردىڭ جولعا شىعۋىنا شەكتەۋ قويىلادى.
قاۋلىدا سانيتارلىق بەكەتتەردەن وتۋگە رۇقسات بەرىلەتىن جولاۋشىلار ءتىزىمى كورسەتىلگەن. ولاردىڭ ىشىندە ءوتىپ بارا جاتقان جولاۋشىلار مەن جۇك كولىكتەرى, ۆاحتالىق جۇمىسشىلاردى تاسيتىن كولىك قۇرالدارى, تۇرعىلىقتى مەكەنىنە قايتىپ كەلە جاتقاندار بار. تاكسي جۇمىسى تۇنگى 22.00-دەن تاڭعى 6.00-گە دەيىن شەكتەلدى.
كارانتين ءتارتىبىنىڭ كۇشەيتىلگەنى تۋرالى ايماق باسشىسى ارحيمەد مۇحامبەتوۆ ءوزىنىڭ الەۋمەتتىك جەلىدەگى جەكە پاراقشاسى ارقىلى حابارلاپ, وبلىس تۇرعىندارىنا ەنگىزىلگەن شەكتەۋ شارالارىنا تۇسىنىستىكپەن قاراپ, جالپىعا بىردەي مىندەتتەلگەن تالاپتى ساقتاۋدى سۇرادى.
«شتاب وتىرىسى بارىسىندا مەڭدىقارا, سارىكول, قاراسۋ, قوستاناي, جانگەلدين جانە امانگەلدى اۋداندارى اكىمدەرىنىڭ اعىمداعى جاعداي تۋرالى ەسەبىن تىڭدادىم. سونداي-اق مونيتورينگتىك توپتاردىڭ جۇمىسىن قاراستىردىق. وكىنىشكە قاراي, كەيبىر كاسىپكەرلىك سۋبەكتىلەرى ەنگىزىلگەن شەكتەۋ شارالارىنا قاراماستان, باس سانيتارلىق دارىگەردىڭ قاۋلىسىن ورەسكەل بۇزۋعا جول بەرەدى, بۇل وبلىستاعى ەپيدەميالىق جاعدايدىڭ ناشارلاۋىنا اكەپ سوعادى. وسىعان بايلانىستى جەدەل شتاب ءبىر اپتا مەرزىمگە قوسىمشا شەكتەۋلەر ەنگىزۋ تۋرالى شەشىم شىعاردى. بارلىق شارا ءبىرىنشى كەزەكتە وبلىس حالقىنىڭ دەنساۋلىعى مەن ءال-اۋقاتىن ساقتاۋ ءۇشىن قابىلداندى», – دەپ جازدى ا.مۇحامبەتوۆ.
قوستاناي وبلىسى
