2018 جىلى بوتەننىڭ مۇلكىن جاسىرىن جىمقىرعان جۇلدىزايدى ماقتاارال اۋداندىق سوتى بەس جىل مەرزىمگە باس بوستاندىعىنان ايىرادى. الايدا سوت وتىرىسىندا اۋداندىق سوت قىلمىسكەردىڭ كامەلەتكە تولماعان جاس بالالارى بارىن ەسكەرىپ, قىلمىستىق كودەكستىڭ 74-بابىنىڭ 1-بولىگىنە سايكەس جازاسىن ورىنداۋدى بەس جىل مەرزىمگە كەيىنگە قالدىرادى.
جازانى وتەۋ كەيىنگە قالدىرىلعان كەزدە, وسى جازانىڭ ورىندالۋىن ۇيىمداستىرۋدى سوتتالعان ادامنىڭ تۇرعىلىقتى جەرىندەگى پروباتسيا قىزمەتى جۇزەگە اسىرادى.
– جەتىساي اۋداندىق پروباتسيا قىزمەتىنىڭ ەسەبىنە الىنعان العاشقى كۇنى جۇلدىزايعا ءوزىنىڭ قۇقىقتارى مەن مىندەتتەرىن, بالادان باس تارتسا نەمەسە بالانى تاربيەلەۋدەن جالتارعان جاعدايدا, سوتقا جازانى وتەۋدى كەيiنگە قالدىرۋدىڭ كۇشىن جويۋ بويىنشا جانە سوت ۇكiمiنە سايكەس تاعايىندالعان جەرگە جازاسىن وتەۋگە جiبەرۋ بويىنشا ۇسىنىس جولدانىلاتىنى ەسكەرتىلدى. جازاسىنىڭ ورىندالۋىن باقىلاۋ كەزىندە سوتتالعان ازاماتقا جانە ونىڭ پەرزەنتتەرىنە پروباتسيا تاراپىنان بىرنەشە رەت الەۋمەتتىك كومەك كورسەتىلدى. الايدا ازامات جازا وتەۋ بارىسىندا وزىنە سوتپەن بەرىلگەن مۇمكىندىكتى ءتيىستى دەڭگەيدە ورىنداماي, اسىراۋىنداعى جاس بالالارىن تاربيەلەۋدىڭ ورنىنا, سپيرتتىك ىشىمدىككە سالىنىپ, بالالارىن قاراۋسىز قالدىرىپ, جازاسىن وتەۋدەن قاساقانا جالتاردى. سونىمەن قاتار پەرزەنتتەرى ءۇشىن مەملەكەت تاراپىنان تاعايىندالعان اي سايىنعى 66 مىڭ تەڭگە جاردەماقىسىن باس پايداسىنا جاراتىپ كەلدى, – دەيدى پروباتسيا قىزمەتى ءبولىمىنىڭ باستىعى ەلامان بەكبالاەۆ.
سوت جۇكتەگەن مىندەتتەردى ورىنداماي, جازادان قاساقانا جالتارعانى ءۇشىن جەتىساي اۋداندىق سوتىنىڭ قاۋلىسىمەن ىزدەۋ جاريالانىپ, ناتيجەسىندە جۇلدىزاي قاماۋعا الىنىپ, پروباتسيا قىزمەتىمەن اۋداندىق سوتقا جازانى وتەۋدى كەيiنگە قالدىرۋدىڭ كۇشىن جويۋ بويىنشا ۇسىنىس جولداندى.
پروباتسيا قىزمەتى جۇلدىزايدىڭ اسىراۋىنداعى كامەلەتتىك جاسقا تولماعان بالالارىنا قامقورلىق جاساپ, اۋدان اكىمىنە بالالاردى «بوبەكتەر ۇيىنە» ورنالاستىرۋ بويىنشا ۇسىنىسپەن شىقتى.
اۋدان اكىمىنىڭ قاۋلىسىمەن 2019 جىلى تۋعان «ق» ەسىمدى ۇلى شىمكەنت قالاسىنداعى «مامانداندىرىلعان بوبەكتەر ۇيىنە», قالعان ءبىر ۇل, ءتورت قىزى كامەلەتكە تولماعانداردى بەيىمدەۋ ورتالىعىنا ۋاقىتشا ورنالاستىرىلدى.
– اتا-انالىق مىندەتتەرىن ورىنداۋدان جالتارعان جۇلدىزايدى اتا-انالىق قۇقىقتارىنان ايىرۋ ماسەلەسى دە سوتپەن قارالاتىن بولادى, – دەيدى ەلامان بەكبالاەۆ.
انانىڭ جاعدايى تۇزەلمەسە, ۇرپاقتىڭ تۇزەلۋى قيىن.
