سەرگەي ستاركوۆ يەلىك ەتەتىن كونديتەرلىك تسەحىن بۇكىل قالا جۇرتى جاقسى بىلەدى. قولى اشىق ازامات جەرلەستەرىنەن قولىنان كەلگەن جاقسىلىعىن اياپ كورگەن ەمەس. الەمدى جايلاعان ىندەت ليساكوۆقا دا جەتىپ, قالانىڭ ءۇستىن قاۋىپ بۇلتى تورلاي باستاعاندا سەرگەي اكىمدىككە بارىپ, قانداي كومەك كەرەك ەكەنىن سۇراپتى.
– ليساكوۆ اكىمدىگىنە بارىپ, اقىلداسىپ-كەڭەسىپ, ساپالى تەپلوۆيزور الۋ كەرەك دەگەن شەشىمگە توقتادىق. گۋانچجوۋداعى مەديتسينالىق قۇرىلعىلار شىعاراتىن قىتايلىق زاۋىتتاردىڭ بىرىمەن جاقسى بايلانىستامىن. تىكەلەي تاپسىرىس بەرۋگە مۇمكىندىك بار. بۇل ويىمىزدى سەرگەي بەرۆاگەن, رومان سۋحين, الەكسەي امان, ءاليحان بورانباەۆ سەكىلدى كاسىپكەرلەر دە قولداي كەتتى, – دەيدى ول.
كاسىپكەرلەر قولعا العان يگى باستاماعا جەرگىلىكتى اكىمدىك «رۋحاني جاڭعىرۋ» باعدارلاماسى شەڭبەرىندەگى «كوركەيە بەر, قوستاناي» جوباسى اياسىندا قولداۋ بىلدىرگەن. ءار تەپلوۆيزوردىڭ قۇنى 445 مىڭ تەڭگە تۇرادى. قۇرىلعى قول تازالايتىن سانيتايزەرمەن جابدىقتالعان. كاسىپكەرلەر گۋانچجوۋ زاۋىتىنا ەشبىر دەلدالسىز تىكەلەي تاپسىرىس بەرىپتى. ءبىر ايدان كەيىن ءۇش تەپلوۆيزور ليساكوۆقا جەتىپ, قالا اكىمدىگىنىڭ فرونت-كەڭسەسىنە, حالىققا قىزمەت كورسەتۋ ورتالىعىنا جانە تۇرعىندار كوممۋنالدىق قىزمەت تولەيتىن ورتالىققا ورناتىلدى.
سەرگەي ستاركوۆتىڭ سوزىنشە, جاڭا تەپلوۆيزورلار ادامنىڭ دەنە قىزۋىن اينا-قاتەسىز ءدال كورسەتەدى ەكەن جانە كۇننىڭ ىستىق-سۋىعىنا قاراماي, ءتىپتى 40 گرادۋستىق قاقاعان ايازدا دا مۇدىرمەي جۇمىس ىستەي بەرەدى.
– بۇل – «not touch» جۇيەسىمەن قامتىلعان «Sunchip» ماركالى تەپلوۆيزورلار. كادىمگى كومپيۋتەر سياقتى جۇمىس ىستەيدى. دەنە قىزۋىن تەكسەرگەن ءاربىر ادام تۋرالى جەكە مالىمەتتەردى ساقتاپ, سۋرەتكە ءتۇسىرىپ وتىرادى. الدىنداعى ادامنىڭ ماسكا تاققان-تاقپاعانىنا دەيىن تەكسەرىپ, ناتيجەسىن ساقتاپ قويادى. بۇل تەپلوۆيزوردىڭ تاعى ءبىر ەرەكشەلىگى – قۇرىلعى وزىندە ساقتالعان مالىمەتتەردى قاجەت جەرگە جىبەرە الادى. مىسالى, تەپلوۆيزوردى قالالىق ەمحانالارمەن بايلانىستىرساق, قۇرىلعى وزىندەگى مالىمەتتەردى تىكەلەي ەمحاناعا جىبەرىپ وتىرادى. بۇل ءىسى باستان اسىپ جاتقان دارىگەرلەردىڭ دە جۇمىسىن ءسال دە بولسا جەڭىلدەتەدى, – دەدى كاسىپكەر.
تەپلوۆيزورلاردىڭ ءبىرى قالا اكىمدىگىنىڭ جانىنان اشىلعان فرونت-كەڭسەنىڭ كىرەبەرىسىندە تۇر. فرونت-كەڭسەگە كەلۋشىلەر عيماراتقا كىرمەستەن بۇرىن تەپلوۆيزوردىڭ الدىنا توقتاپ, ەكرانعا قارايدى. ادامنىڭ بەت-بەينەسى كومپيۋتەر مونيتورىنداعى شەكارا سىزىعىنا سىيىپ تۇرۋى كەرەك. اقىلدى قۇرىلعى دەنە قىزۋى قالىپتى ادامعا ء«سىزدىڭ تەمپەراتۋراڭىز قالىپتى» دەپ جاۋاپ قاتىپ, ەكراندا جاسىل ءتۇس جانادى. ەگەر ناتيجە كەرىسىنشە شىقسا, ەكران بەتى قىپ-قىزىل تۇسكە بويالىپ, روبوت «دەنە قىزۋىڭىز كوتەرىلىپ تۇر! ماسكا تاعىڭىزدار» دەپ ايقايعا باسىپ, دابىل كوتەرە باستايدى. ليساكوۆتىقتار تەپلوۆيزور-روبوتتىڭ ادامدى تەكسەرۋدەن وتكىزىپ قانا قويماي, كوپشىلىكتىڭ كوڭىل كۇيىن كوتەرىپ, جۇرتتى كۇلدىرەتىنىن قىزىق كورەدى. باعدارلاماشىلار تاياۋ كۇندەرى تەپلوۆيزورلاردىڭ بارلىق مۇمكىندىگىن ىسكە قوسادى. وسىدان كەيىن «اقىلدى» روبوتتار كوپشىلىك ورىنداردىڭ قاۋىپسىزدىگىن قاداعالايتىن ناعىز سانيتار-ساقشىلارشا جۇمىس ىستەي باستايدى.
قوستاناي وبلىسى,
ليساكوۆ قالاسى
