دوستىق ءۇيىنىڭ قىزمەتكەرلەرى جىل باسىندا ەلىمىزدە تۇرىپ جاتقان شىعىس مادەنيەتى وكىلدەرىنىڭ ۇلتتىق ونەرىن ناسيحاتتايتىن اۋقىمدى شارا وتكىزۋدى جوسپارلاپ قويعان. الايدا كوكتەمدە پاندەميا باستالىپ, كەدەرگى كوبەيدى. كارانتين رەجىمى قايتا كۇشەيگەن سوڭ, ۇيىمداستىرۋشىلار فەستيۆالدى ونلاين بايلانىس كومەگىمەن وتكىزۋدى ءجون كورىپتى.
– كوپشىلىكتىڭ قاتىسۋىمەن وتەتىن شارالارعا تىيىم سالىنعان سوڭ, ۇيىمداستىرۋشىلار دا, شاقىرتۋ العان قوناقتار دا فەستيۆالدەن كۇدەر ۇزە باستاعان. بىراق ويعا العان دۇنيەنى نە دە بولسا ءوز ۋاقىتىندا وتكىزەيىك دەگەن نيەتپەن, بيىل العاش ۇيىمداستىرىلىپ جاتقان شارانى ونلاين رەجىمدە وتكىزۋدى ۇيعاردىق, – دەيدى دوستىق ۇيىندەگى قوعامدىق-بۇقارالىق شارالاردى ۇيىمداستىرۋ ءبولىمىنىڭ جەتەكشىسى يۋليا پونومارەۆا.
وسىلايشا, ەلىمىزدىڭ بارلىق ايماقتارىنا شاقىرتۋ جىبەرىلگەن. شاراعا ون شاقتى ونەر ۇجىمى قاتىستى. ونلاين فەستيۆالدە يراننىڭ «باحرام» ءبيىن مىڭ بۇرالتقان اقتاۋلىق «ەكزوتيكا» بي توبىنىڭ ونەرى كورەرمەندى بىردەن باۋراپ الدى. وزبەكتىڭ «حورەزم» ءبيىن ورىنداعان ورالدىق ونەرپازدار دا كوپشىلىك كوڭىلىنەن شىقتى. ءدال وسى ءبيدى قوستانايداعى «التىناي» حالىقتىق ۇلگىدەگى بي ءانسامبلى دە ءساتتى ورىنداپ شىقتى. مادەني شارا اياسىندا كوپشىلىككە «قازاقستان ۇيعىرلارىنىڭ رەسپۋبليكالىق مادەني ورتالىعى» قوعامدىق قورىنىڭ پاۆلودارداعى فيليالىنىڭ اتىنان شىققان «ەۆريشيم» بي ءانسامبلىنىڭ ارتىستەرى ۇيعىر حالقىنىڭ «گۋلداك جانانلا» ءبيىن, تارازدىق «ينفينيتي» حورەوگرافيالىق ۇجىمى وزبەك ءبيىن تارتۋ ەتتى.
قوستانايلىق انشىلەر شىعىس اندەرىن ناقىشىنا كەلتىرە ورىنداپ, بي كەرۋەنىنىڭ ءسان-سالتاناتىن اسىرا ءتۇستى. كورەرمەندەر اسىرەسە وزبەك ءانىن تامىلجىتا شىرقاعان «شارق» تاجىك-وزبەك بىرلەستىگىنىڭ بەلسەندىسى انۆار وسپانوۆ پەن «اسەم-بەند» ۆوكالدىق توبىنىڭ ءانشىسى كاميلا ءجۇنىسوۆانىڭ دۋەتىن ەرەكشە ىستىق ىقىلاسپەن قابىلدادى.
ونلاين فەستيۆالدىڭ تولىق نۇسقاسىن وبلىستىق اسسامبلەيانىڭ You Tube-ارناسىنان تاماشالاۋعا بولادى.
قوستاناي وبلىسى
