شارا بارىسىندا ۋچاسكەلىك پوليتسيا قىزمەتكەرلەرى مەن پسيحولوگ ماماندار وتباسى-وشاق قاسىندا ءۇي ءىشىنىڭ بەرەكەسىن الىپ, ايەلى مەن بالا-شاعاسىنا الىمجەتتىك كورسەتۋدى داعدىعا اينالدىرعان ازاماتتاردىڭ ۇيلەرىن ارالادى. ءار وتباسىنىڭ تۇرمىس جاعدايىمەن تانىسىپ, ۇيدە نەشە جان بارىن, بالالاردىڭ تۇرمىسىن, ولاردىڭ اتا-انالارىنىڭ جۇمىس جاعدايىن سۇراستىرىپ بىلگەن ماماندار ءۇي ىشىندەگى تاتۋلىقتى ساقتاۋدىڭ ماڭىزىن, وتباسىلىق جانجالدىڭ سوڭى ابىروي اكەلمەيتىنىن ءتۇسىندىرىپ, ۋاقىتشا جۇمىسسىز نەمەسە جاس بالامەن وتىرعان ايەلدەرگە تۇرمىستىق زورلىق-زومبىلىق ماسەلەلەرى بويىنشا كەڭەس بەرەتىن سەنىم تەلەفوندارىن قالدىردى. ءوز وتباسىندا الىمجەتتىك كورگەن جاندارعا داعدارىس ورتالىعى مەن «پروگرەسس كاتاليزاتورى» قوعامدىق قورىنىڭ بىلىكتى پسيحولوگتەرى كومەك كورسەتەتىن بولادى.
وبلىستىق پوليتسيا دەپارتامەنتىنىڭ مالىمەتىنە سەنسەك, بيىل ايماقتا جىل باسىنان بەرى ءوز وتباسىندا تۇرمىستىق زورلىق-زومبىلىق كورگەن 3337 ايەل تىركەلىپتى. قۇقىق قورعاۋشىلار مۇنىڭ وتكەن جىلدىڭ كورسەتكىشىمەن سالىستىرعاندا 29%-عا تومەن ەكەنىن ايتىپ وتىر.
«بيىل وتباسىلىق-تۇرمىستىق قاتىناستار سالاسىندا 6293 قورعاۋ ۇيعارىمى شىعارىلدى. قۇقىق بۇزۋشىلارعا قاتىستى توعىز جۇزدەن استام ەرەكشە تالاپتار بەلگىلەندى. بۇل قىلمىستاردىڭ كوبى نەگىزىنەن ءۇي ىشىندەگى قولايسىز جاعدايعا بايلانىستى, سونداي-اق وتباسىنداعى تۇرمىستىق جاعدايدىڭ تومەندىگىنە, وتباسى مۇشەلەرىنىڭ اراسىنداعى ءوزارا سىيلاستىقتىڭ, تۇسىنىستىكتىڭ جوعالۋىنا نەمەسە ۇيدە ەرلى-زايىپتىلاردىڭ قوسىلىپ الىپ الكوگولدى سۋسىن ءىشۋىنىڭ سالدارىنان تۋىنداپ وتىر», دەيدى پوليتسيا دەپارتامەنتى ءباسپاسوز قىزمەتىنىڭ مامانى كەنجە قونىسباي.
وتباسىنداعى الىمجەتتىكتىڭ الدىن الۋ ماقساتىنداعى شارا بارىسىندا پوليتسيا قىزمەتكەرلەرى داعدارىس ورتالىعىنىڭ پسيحولوگتەرىمەن بىرلەسىپ, ەسەپتە تۇرعان وتباسى مۇشەلەرىنە ءتۇسىندىرۋ جۇمىستارىن جۇرگىزگەن. ماماندار پاندەمياعا بايلانىستى ايماقتا قابىلدانىپ جاتقان كارانتيندىك شەكتەۋ شارالارىنىڭ وتباسىلىق قارىم-قاتىناسقا تەرىس ىقپال ەتىپ وتىرعانىن ايتادى. ماسەلەن, بيىل جىل باسىنان بەرى داعدارىس ورتالىعىنا 696 ايەل ءوتىنىم ءتۇسىرىپ, پسيحولوگيالىق كومەككە جۇگىنگەن. ورتالىق ماماندارى 117 ايەلگە پسيحولوگيالىق كومەك كورسەتىپ, ءوز وتباسىنان قاعاجۋ كورگەن 867 ايەلگە تەلەفون ارقىلى كەڭەس بەرگەن. ورتالىق 4 ايەلگە پسيحولوگيالىق, مورالدىق قولداۋ كورسەتۋمەن قاتار, ءوز قامقورلىعىنا الىپ, ۋاقىتشا باسپانامەن قامتاماسىز ەتىپ وتىر.
وبلىستىق پوليتسيا دەپارتامەنتى جەرگىلىكتى پوليتسيا قىزمەتى باسقارماسىنىڭ قىزمەتكەرلەرى جانە «پروگرەسس كاتاليزاتورى» قورى سوڭعى اپتانىڭ وزىندە وتباسىندا ءجابىر كورگەن 9 ايەل مەن 10 بالاعا كومەك كورسەتتى.
قوستاناي وبلىسى
