ەلباسى • 16 قاراشا، 2020

«سامۇرىق-قازىنا» ينۆەستحولدينگكە اينالادى

24 رەت كورسەتىلدى

ەلباسىنىڭ توراعا­لى­عىمەن «سامۇرىق-قازىنا» ۇلت­تىق ءال-اۋقات قورىن باس­قا­رۋ جونىندەگى كەڭەستىڭ وتىرىسى ءوتتى، دەپ حابارلادى تۇڭعىش پرەزيدەنتتىڭ ءباس­پاسوز قىزمەتى.

سۋرەت ەلباسىنىڭ ءباسپاسوز قىزمەتىنەن الىندى

جيىندا پاندەميا كەزىندە وتاندىق وندىرۋشىلەردى قولداۋ شارالارى جانە «سامۇرىق-قازىنا» قورىن ينۆەستيتسيالىق حولدينگكە اينالدىرۋ ماسەلەسى قارالدى.

– ءبىزدىڭ بۇگىنگى جيىنىمىز كۇردەلى كەزەڭدە ءوتىپ وتىر. ال­پاۋىت ەلدەر اراسىنداعى باسە­كەلەستىك پەن تەكەتىرەس كۇشەيىپ بارادى. قازاقستان ەكونوميكاسىنا ۇلكەن سالماق تۇسۋدە. سونىمەن بىرگە بۇل – جاڭا ەكونوميكالىق مودەل قالىپتاستىرۋ ءۇشىن قاجەتتى رەفورمالار جۇرگىزۋ مۇمكىندىگى، – دەدى ەلباسى.

نۇرسۇلتان نازارباەۆ قور­دى قايتا قۇرۋ ماسەلەسىن تال­قى­لاۋ بارى­سىندا ءتيىمسىز ينۆەس­تي­تسيا­لار­دى قىسقارتىپ، تابىسى جو­عارى ين­ۆەس­تيتسيالارعا اۋىس­تى­رۋدىڭ ماڭىزدىلىعىن اتاپ ءوتتى.

– ءبىز نەگىزگى ماقساتتاردى قور­دىڭ 2028 جىلعا دەيىنگى جاڭار­تىلعان دامۋ ستراتەگياسىن­دا ايقىن­دادىق. ەڭ باستىسى – تاياۋ مەر­زىمدە «سامۇرىق-قازى­نا» قورى­نىڭ جۇمىسىن جاڭا فور­ماتقا كوشىرىپ، جەتەكشى تاۋەلسىز ءال-اۋ­قات قورلارى سياقتى ين­ۆەست­حول­­دينگكە اينالدىرۋ. بىزگە قور­­دىڭ پورتفەلىندەگى اكتيۆ­تەر­دى گەوگرافياسى مەن سالا­سىنا قاراي ءارتاراپتاندىرۋ كەرەك. ءتيىمسىز ينۆەستيتسيالاردان ارىلىپ، ولاردى بارىنشا تابىس اكەلەتىن ينۆەستيتسياعا اۋىستىرۋ قاجەت. بۇل ديۆيدەندتەردىڭ ءوسۋى ەسەبىنەن بيۋدجەتكە تۇسەتىن تۇسىمدەردى ۇلعايتۋعا مۇمكىندىك بەرەدى، – دەدى «سامۇرىق-قازىنا» ۇلتتىق ءال-اۋقات قورىن باسقارۋ جونىندەگى كەڭەستىڭ توراعاسى.

سونىمەن قاتار قازاقستاننىڭ تۇڭعىش پرەزيدەنتى داعدارىس جاع­دايىندا ۇكىمەت وتاندىق بيز­نەستى قورعاۋ ءۇشىن تەڭدەسسىز شارالار قابىلداعانىن اتاپ ءوتتى.

– توتەنشە جاعداي كەزەڭىندە حالىق پەن بيزنەستى قولداۋ، ەكو­نو­­ميكالىق تۇراقتىلىقتى ساق­تاۋ ءۇشىن داعدارىسقا قار­سى شارا­لار­دىڭ ءۇش بىردەي توپتاماسى قا­بىل­داندى. بىراق پاندەميا باسەڭ­دەر ەمەس. ونىڭ ەكىنشى كە­زەڭى بولجانۋدا. مۇن­داي كۇردەلى جاعدايدا بۇعان دەيىن اتاپ وتكەندەي، وتاندىق كاسىپ­كەرلەرگە قولداۋ كورسەتۋ قاجەت، – دەدى ەلباسى.

«سامۇرىق-قازىنا» اكتسيو­نەر­لىك قوعامىنىڭ باسقارما تور­اعاسى ا.ەسىموۆتىڭ اقپارا­تىن تىڭداي كەلە، نۇرسۇلتان نازارباەۆ بيزنەس بەلسەندىلىكتىڭ كۇرت تومەندەۋى جاعدايىندا كۆازي­مەم­لەكەتتىك سەك­توردىڭ مەملە­كەتتىك تاپسىرىس­تارى مەن ساتىپ الۋلارى وندى­رىستىك كا­سىپ­ورىندارعا جانە كاسىپ­كەرلەرگە كومەك كورسەتۋدىڭ ءتيىمدى شاراسىنا اينالعانىن اتاپ ءوتتى.

– 2018-2020 جىلدار ارالى­عىندا قوردىڭ ساتىپ الۋى­نىڭ 93 پايىزى، ياعني جالپى سوماسى ءبىر تريلليون تەڭگەدەن اساتىن 4200 پوزيتسيا باسەكەلەستىك ور­تا­عا بەرىلدى. 23 مىڭعا جۋىق كاسىپ­­كەرلىك سۋبەكتىلەر ساتىپ الۋعا تىكەلەي قول جەتكىزدى. وسى كەزەڭ­­دە ءبىر كوزدەن ساتىپ الۋ 60 پايىز­عا ازايعان. ناتيجەسىندە، 400 ميل­ليارد تەڭگەدەن استام قار­جى ۇنەم­دەلدى. وسى جۇمىستى جال­عاس­تىرۋ كەرەك، – دەدى قوردى باس­قارۋ جونىندەگى كەڭەستىڭ توراعاسى.

كەڭەس بارىسىندا «قاز­مۇ­نايگاز» ۇلتتىق كومپانياسى» اكتسيونەرلىك قوعامى، «قازاقستان تەمىر جولى» ۇلتتىق كومپانياسى» اكتسيونەرلىك قوعامى، «قازاتومونەركاسىپ» ۇلتتىق اتوم كومپانياسى» اكتسيونەرلىك قوعامى، «قازاقتەلەكوم» اكتسيو­نەر­لىك قوعامى، «سامۇرىق-ەنەرگو» اكتسيو­نەرلىك قوعامى جانە «ەير استانا» اكتسيونەرلىك قوعامى باسشىلارىنىڭ ەسەپتەرى تىڭدالدى.

سونداي-اق قازاقستاننىڭ تۇڭعىش پرەزيدەنتى كاسىپورىنداردىڭ تۇرالاپ قالۋىنا جانە جۇمىسشىلاردىڭ قىسقارتىلۋىنا جول بەرمەي، وڭ قارقىن ساقتاپ قالۋعا اسەر ەتكەن قوردىڭ جاڭا دامۋ ستراتەگياسىنىڭ تيىمدىلىگىن اتاپ ءوتتى.

– ستراتەگيالىق ماڭىزدى سالالاردا بارلىق كاسىپورىننىڭ الەۋمەت­تىك تۇراقتىلىعىن ساقتاۋ، جۇمىسشى­لار­عا قامقورلىق تانىتۋ جانە تۇراقتى قىزمەتىن قامتاماسىز ەتۋ قاجەت. ون­دى­رىستىك پەرسونالدى بارىنشا قورعاۋىمىز كەرەك. بۇل  300 مىڭ ادام جانە 340-تان استام كاسىپورىندى قامتيدى. يمپورتقا تاۋەلدىلىكتى ازايتۋ ءۇشىن دە ءبىراز شارۋا اتقارىلدى. قوردىڭ ۇلگىسىندە وتاندىق بيزنەسكە بەلسەندى قولداۋ كورسەتۋدى ۇيرەندىك، – دەدى ەلباسى.

نۇرسۇلتان نازارباەۆ ۇسىنىلعان وزگەرىستەر تاۋەلسىز قورلاردى دامىتۋدىڭ الەمدىك تاجىريبەسىنە سايكەس كەلەتىنىن اتاپ ءوتتى.

قازاقستاننىڭ تۇڭعىش پرەزيدەنتى قوردىڭ دامۋ ستراتەگياسىن ىسكە اسىرۋ بويىنشا «سامۇرىق-قازىنا» باسشىلىعىنىڭ قىزمەتىنە وڭ باعا بەردى.

وتىرىس قورىتىندىسى بويىنشا كەڭەس مۇشەلەرى قوردى ينۆەس­تيتسيالىق حولدينگكە اينالدىرۋدىڭ تۇجىرىمداماسىن ماقۇلدادى. سونداي-اق «سامۇرىق-قازىنا» اكتسيونەرلىك قوعامى باسقارماسىنا پاندەميا كەزىندە وتاندىق تاۋار وندىرۋشىلەردى قولداۋعا باعىتتالعان ءىس-شارالاردى جۇزەگە اسىرۋدى جالعاستىرۋدى تاپسىردى.

 

سوڭعى جاڭالىقتار

ۇقساس جاڭالىقتار