باسقوسۋ بارىسىندا دەپارتامەنت باستىعى بەكەت ايماعامبەتوۆ تاياۋدا مەملەكەت باسشىسى قاسىم-جومارت توقاەۆتىڭ توراعالىعىمەن وتكەن ءىىم-ءنىڭ كەڭەيتىلگەن القا وتىرىسىندا ءتارتىپ ساقشىلارىنا جۇكتەلگەن جاڭا مىندەتتەر تۋرالى ءسوز ەتتى.
– ىشكى ىستەر ورگاندارىندا جۇزەگە اسىرىلىپ جاتقان رەفورمالىق وزگەرىستەردىڭ تۇپكى ماقساتى – زاڭنىڭ ساقتالۋى مەن ازاماتتاردىڭ ادىلدىككە قول جەتكىزۋىن تولىق قامتاماسىز ەتۋ. ءاربىر تەرگەۋشى قىلمىستىق ءىستى قاراۋ بارىسىندا كەتكەن كىشكەنتاي عانا قاتەلىك ادامنىڭ ءبۇتىن تاعدىرىن وزگەرتىپ, تالكەككە ۇشىراتۋى مۇمكىن ەكەنىن قاپەرىنە ۇستاۋى قاجەت. بۇل تۋرالى پرەزيدەنت جولداۋىندا دا ايتىلدى, – دەدى ب.ايماعامبەتوۆ.
جالپى, وبلىس تەرگەۋشىلەرى جىل باسىنان بەرى 3 300-دەن استام قىلمىستىق ءىستى تەرگەپ, سوتقا جونەلتكەن. جيىندا تەرگەۋ سالاسىنداعى سىبايلاس جەمقورلىق تاۋەكەلدەرىن جويۋدىڭ ەڭ ءتيىمدى جولى قىلمىستى تەرگەۋ بارىسىن ەلەكتروندى فورماتقا كوشىرۋ ەكەنى ايتىلدى. بۇل باعىتتا ءبىراز شارۋا تىندىرىلىپ, وبلىس تەرگەۋشىلەرى ءبىر جىل بۇرىن جاڭا كومپيۋتەرلەرمەن, ۆەب-كامەرالارمەن قامتاماسىز ەتىلگەن. قازىردىڭ وزىندە دەپارتامەنت قاراۋىنداعى قىلمىستىق ءىستىڭ 53,8 پايىزى ەلەكتروندى تۇردە قاشىقتان تەرگەلىپ جاتىر.
ماسەلەن, قاراسۋ اۋداندىق پوليتسيا ءبولىمى باستىعىنىڭ ورىنباسارى پاۆەل بەلوۆ قازىرگى تەرگەۋشىلەردىڭ زاماناۋي تەحنيكالىق مۇمكىندىكتەرمەن بارىنشا قامتاماسىز ەتىلىپ جاتقانىن, سونىڭ ناتيجەسىندە, جىل سوڭىنا دەيىن اسا اۋىر ساناتتاعى قىلمىستىق ىستەردى قوسپاعاندا, بارلىق ىستەردىڭ 70 پايىزىن ەلەكتروندى فورماتتا تەرگەۋگە قول جەتەتىنىن ايتتى. ونى باسقا اۋداندار مەن وبلىس ورتالىعىنداعى تەرگەۋشىلەر مەن انىقتاۋشىلار دا قوشتاپ وتىر.
– پوليتسيا جۇمىسىنداعى ەڭ باستى قاسيەت – كاسىبي بىلىك پەن ادال ەڭبەك. ازاماتتارعا قۇرمەتپەن قاراۋ, ىسكە قاتىسۋشىلارمەن كەزدەسۋگە, تەرگەۋ ەكسپەريمەنتىنە جانە جاۋاپ الۋعا مۇقيات دايىندالۋ. ءسىز ءىس بويىنشا تۇپكىلىكتى شەشىم قابىلدايسىز, بۇكىل پوليتسيانىڭ بەدەلى وسىعان بايلانىستى, – دەدى ب.ايماعامبەتوۆ.
جيىننىڭ سوڭىنا تامان ايماقتىڭ ۇزدىك تەرگەۋشىلەرى مەن انىقتاۋشىلارى العىس حاتتارمەن جانە اتاۋلى ساعاتتارمەن ماراپاتتالدى.
بيىل قاراسۋ اۋداندىق پوليتسيا ءبولىمى باستىعىنىڭ ورىنباسارى پاۆەل بەلوۆ, رۋدنىي قالاسى پب اعا تەرگەۋشىسى باقتيار سەيىتبەكوۆ, قوستاناي اۋدانى پب-نىڭ اعا تەرگەۋشىسى اناستاسيا روگوجينالار وبلىستىڭ ەڭ ۇزدىك تەرگەۋشىلەرى رەتىندە تانىلىپ وتىر. مىسالى, پوليتسيا مايورى ب.سەيىتبەكوۆ جىل باسىنان بەرى جالپى سانى 25 اۋىر جانە اسا اۋىر قىلمىستاردى تەرگەپ, ءىستى اياعىنا جەتكىزىپ, سوتقا جىبەرسە, توبىل قالاسىنىڭ تەرگەۋشىسى, كاپيتان ا.روگوجينا 45 قىلمىستىق ءىستى اشقان.
قوستاناي وبلىسى
