س.بايماعامبەتوۆ اتىنداعى گيمنازيانىڭ الدىنا قويىلعان ەسكەرتكىش ۋاقىت وتە توزىڭقىراپ قالعان ەدى, بيىل سانكت-پەتەربۋرگ قالاسىنداعى قازاق ۇلتتىق-مادەني بىرلەستىگى مەن لەنينگراد وبلىسىنىڭ «اتا-مەكەن» بىرلەستىگىنىڭ جانە قازاقستاننىڭ سانكت-پەتەربۋرگتەگى باس كونسۋلدىعىنىڭ ىقپال ەتۋىمەن, ەسكەرتكىشتىڭ اينالاسى اباتتاندىرىلىپ, ءمۇسىن قايتا جاڭارتىلدى. باتىر ەسكەرتكىشىنىڭ بۇتىندەلۋىنە قوستاناي وبلىسىنىڭ كاسىپكەرلەرى دەمەۋشىلىك ەتىپ, 1 ملن رۋبل كولەمىندە قارجى اۋدارعان.
ەسكەرتكىشتىڭ اشىلۋ راسىمىنە قازاقستاننىڭ رەسەيدەگى ەلشىسى ەرمەك كوشەرباەۆ پەن لەنينگراد وبلىسىنىڭ گۋبەرناتورى الەكساندر دروزدەنكو قاتىستى. سالتاناتتى جيىن بارىسىندا قازاقستان ەلشىسى ءمۇسىننىڭ اشىلۋى سۇلتان بايماعامبەتوۆتىڭ 100 جىلدىعى مەن جەڭىستىڭ 75 جىلدىعىنا ورايلاس كەلگەنىن تىلگە تيەك ەتىپ, لەنينگراد وبلىسىنىڭ باسشىلىعىنا, باتىر اتىنداعى ءبىلىم ورداسىنىڭ وقۋشىلارى مەن ۇستازدارىنا العىس ايتتى.
– كەڭەس وداعىنىڭ باتىرى سۇلتان بايماعامبەتوۆتىڭ وشپەس ەرلىگى ەكى ەل جاستارىنىڭ جادىندا ماڭگى ساقتالادى. ءبىزدىڭ باتىر جەرلەسىمىزدىڭ ەسكەرتكىشىن قاستەرلى ورىنداردىڭ بىرىنە اينالدىرىپ, ەرلىگىن كەيىنگى ۇرپاققا ونەگە ەتىپ, قۇرمەتتەپ وتىرعان كيروۆسك قالاسىنىڭ تۇرعىندارىنا رياسىز جۇرەگىممەن العىس ايتامىن. كورشىلەس ەكى مەملەكەتكە ورتاق تاريحي كەزەڭدەر, ەسكەرتكىشتەر بار. ولارعا قۇرمەت كورسەتۋ قوس حالىقتىڭ اراسىنداعى دوستىق پەن سىيلاستىقتى بۇرىنعىدان دا نىعايتا تۇسەتىنى انىق, – دەدى ەرمەك كوشەرباەۆ.
لەنينگراد وبلىسىنىڭ گۋبەرناتورى الەكساندر دروزدەنكو لەنينگراد ءۇشىن بولعان كەسكىلەسكەن شايقاستا ەرلىكپەن قازا تاپقان قازاقتىڭ قاھارمان ۇلى سۇلتان بايماعامبەتوۆتىڭ ەسىمىن جەرگىلىكتى جۇرتشىلىق ەشقاشان ۇمىتپايتىنىن اتاپ ءوتتى.
– وسى جەر ءۇشىن شايقاسىپ, قازا تاپقان جاۋىنگەرلەر ۇلتىنا قاراپ ءبىر-ءبىرىن الالاعان جوق. ولار قاي جەردە تۋعانىنا قاراماستان, قان ساسىعان مايدان دالاسىندا ورتاق وتان ءۇشىن سوعىستى. مەن ءۇشىن ماڭىزدىسى, سۇراپىل سوعىستىڭ جاڭعىرىعىن جالعىز ءبىز – لەنينگرادتىقتار عانا ەستە ساقتاپ قالعان جوقپىز, بىزبەن بىرگە قازاق حالقى دا وسى توپىراقتى ماڭگى جاستانعان قاھارمان ۇلدارىن جوقتايدى, – دەدى گۋبەرناتور.
تاعىلىمدى شارانىڭ سوڭىنا تامان ەرمەك كوشەرباەۆ پەن الەكساندر دروزدەنكو ەسكەرتكىشكە گۇل شوقتارىن قويىپ, باتىر رۋحىنا تاعزىم ەتتى.
1943 جىلى سينياۆين بيىگى ءۇشىن بولعان ۇرىستا امبرازۋرانى دەنەسىمەن تۇنشىقتىرىپ, ەرلىكپەن قازا تاپقان باتىر سۇلتان سول جەردە قارۋلاس باۋىرلاستار قورىمىنا جەرلەنگەن.
قوستاناي وبلىسى
