قاراشانىڭ 23-ءى كۇنى سانكت-پەتەربۋرگتە بۇكىلالەمدىك بوكس سەرياسىنىڭ (WSB) جاڭا ماۋسىمداعى 2 راۋندىن جەرگىلىكتى Russian Boxing Team كومانداسىمەن وتكىزگەن Astana Arlans 3:2 ەسەبىمەن جەڭىسكە جەتتى.
قاراشانىڭ 23-ءى كۇنى سانكت-پەتەربۋرگتە بۇكىلالەمدىك بوكس سەرياسىنىڭ (WSB) جاڭا ماۋسىمداعى 2 راۋندىن جەرگىلىكتى Russian Boxing Team كومانداسىمەن وتكىزگەن Astana Arlans 3:2 ەسەبىمەن جەڭىسكە جەتتى.
كەزدەسۋ 52 كيلوعا دەيىنگى سالماقتاعى رەسەيلىك ميشا الويان مەن قازاقستاندىق ولجاس ساتتىباەۆتىڭ ۇرىستارىمەن اشىلدى. شايقاستىڭ ءبىرىنشى راۋندى تۋرنير دەبيۋتانتى بولىپ وتىرعان قازاق بوكسشىسىنىڭ باسىمدىلىعىمەن ءوتتى. وسىعان وراي تورەشىلەر دە جەڭىستى 2:1 ەسەبىمەن سونىڭ ەنشىسىنە جازدى. ال الەمنىڭ ەكى دۇركىن چەمپيونى دەگەن اتاعى بار رەسەيلىك بىلعارى قولعاپ شەبەرى قۇر بەدەلمەن ەشتەڭە الا الماسىن بىلگەسىن, 2 راۋندتان باستاپ ىشقىنا العا ۇمتىلدى. وسى ۇمار-جۇمار ايقاستىڭ وزەگىنەن قازىلار القاسى سوڭىندا سوققىلارى جيىرەك ءدال ءتيدى دەگەن پىكىرمەن جەڭىستى الويانعا بەرىپ جىبەردى.
كەلەسى 60 كيلوعا دەيىنگى سالماقتاعى كوماندا كاپيتانى سامات باشەنوۆ ادەپكى ۇرىستا كەتكەن ەسەنى قايتارعانداي بولدى. ول رەسەي چەمپيوناتىنىڭ وتكەن جىلعى كۇمىس جۇلدەگەرى, ۋنيۆەرسيادانىڭ بيىلعى جىلعى جەڭىمپازى ادلان ءابدۋراشيدوۆتى قاپىسىز ۇتتى. شايقاس بارىسىندا سامات وزىنە ەدىرەڭدەپ ۇمتىلعان باسەكەلەسىنىڭ ەكپىنىن مىعىم سوققىلارمەن باسىپ تاستاپ وتىردى. بۇل ونىڭ راۋند سوڭىندا 2:1 ەسەبىمەن العا شىعۋىنا جول اشتى. ال ەكىنشى راۋندتا بوكسشىلاردىڭ كلينچكە ءتۇسىپ قالا بەرۋى جيىلەدى. ول رەسەيلىككە باسىمدىق الىپ بەردى. بۇدان سوڭعى ەكى كەزەڭدە بارىنشا جيناقى كورىنگەن سامات 3:0 دەگەن كورسەتكىشپەن ايقىن جەڭىسكە جەتتى. سوڭعى, بەسىنشى راۋندتىڭ ناتيجەسى ەشتەڭە شەشە المايتىن بولسا دا, قازاقستاندىق وندا دا قارسىلاسىنا دەس بەرمەۋگە تىرىستى. ءسويتىپ, 2:1 ەسەبىمەن ونى دا وزىنە قاراي اۋدارىپ اكەتتى.
كەزدەسۋدەگى بەتبۇرىستى ءساتتى بۇدان كەيىنگى 69 كيلوعا دەيىنگى سالماقتاعى سپورتشىلار جاسادى. شىنى كەرەك, قازاقستاندىق مەيىرىم نۇرسۇلتانوۆ پەن رەسەيلىك الەكساندر يۆانوۆ اراسىنداعى شايقاستىڭ باسىندا ءبىز تاجىريبەسى كوپتەۋ الاڭ يەسىنىڭ يىعى وزىق شىعار دەپ قاۋىپتەنىپ ەدىك. بىراق ءىس جۇزىندە ءبارى باسقاشا بولىپ شىقتى. بۇل كۇنى قازاقستاندىقتار ساپىنداعى ەكىنشى دەبيۋتانت بولىپ وتىرعان مەيىرىم شايقاستىڭ باسىنان ءوزىن سەنىمدى ۇستادى. قولى مەن بويىنىڭ ۇزىندىعىن جاقسى پايدالانا بىلگەن ول قارسىلاسىن قاقپايلاي ءجۇرىپ, ارتىق ۇپايلار الا بەردى. سونىڭ ناتيجەسىندە ءۇشىنشى راۋندتان كەيىن-اق ونىڭ جەڭەتىنىنە ەشكىمنىڭ كۇمانى قالمادى. وسىمەن بىرگە «ارلاندار» ماتچتا ءبىرىنشى رەت العا شىقتى – 2:1.
ال 81 كيلو سالماقتاعى دانابەك سۋجانوۆ ءوزىنىڭ مىڭداعان جانكۇيەرلەرىنىڭ سەنىمىن اقتاي المادى. سەريانىڭ قازاقستاندىقتار ساپىنداعى ءۇشىنشى دەبيۋتانتى دميتري بيۆولمەن وتكىزگەن كەزدەسۋىنىڭ ءبىرىنشى راۋندىندا-اق قولعابىن شەشۋگە ءماجبۇر بولدى. ايتا كەتۋ كەرەك, جەكپە-جەكتى ەكى جاق تا وتە قارقىندى باستادى. راۋندتىڭ سوڭىنا قاراي رەسەيلىك بوكسشى ءبىزدىڭ جىگىتكە ءبىرنەشە اۋىر سوققىنى ءدال بەرىپ ۇلگەردى. سونىڭ ەكەۋى ونىڭ ارقانعا ءىلىنىپ قالۋىنا اپارىپ سوقتىردى. وسىدان كەيىن بوكسشىنىڭ دەنساۋلىعىن تاۋەكەلگە سالماس ءۇشىن رينگتەگى رەفەري ۇرىستى توقتاتتى. تەحنيكالىق نوكاۋت. مۇنىڭ سوڭى كوماندالاردىڭ ارا سالماعى قايتادان تەڭەسۋىنە جەتكىزدى – 2:2.
ءسويتىپ, بارلىق ءتۇيىن ەڭ سوڭعى ۇرىسقا قالىپ قويدى. ال «سوڭعى تۇيەنىڭ جۇگى اۋىر» ەكەنىن جاقسى سەزىنگەن استانالىقتار ساپىنداعى لەگيونەر وعان ءتاستۇيىن بولىپ دايىن شىقتى. ول وزىنەن اتاعى دا, شاتاعى دا كوپ سەرگەي كۋزمينگە قارسى قويعانى جيناقى قيمىل بولدى. سوڭىندا ونىڭ جەڭگەنىنە تورەشىلەر دە شاك كەلتىرە المادى. جەڭىس! بۇل سونىمەن بىرگە, «استانا ارلانستى» كوماندالىق جەڭىسكە قول جەتكىزدىردى.
وسىمەن, «استانا ارلاندارى» قاتارىنان ەكىنشى مارتە جەڭىس تويىن تويلادى. بۇل كۇنى پولشادا Poland Hussars-پەن كەزدەسكەن كۋبانىڭ Cuba Domadores دەگەن ۇجىمى 5:0 ەسەبىمەن ۇتتى. ءدال وسىنداي ەسەپكە مەكسيكانىڭ Mexico Citi Guerreros كلۋبىمەن ءوز الاڭىندا كۇش سىناسقان ازەربايجاننىڭ Baku Fires كومانداسى دا جەتتى. ال اقش-تىڭ USA Knockouts كومانداسى ارگەنتينانىڭ Argentina Condors جاساعىن 3:2 ەتىپ تىزە بۇكتىردى.
ەندى 16 قاراشا كۇنى وينالعان 1 راۋند كەزدەسۋلەرىنىڭ ناتيجەلەرىن ەسكەرتە كەتەيىك. ولار بىلايشا اياقتالدى: «استانا ارلانس» (قازاقستان) – «باكۋ فايەرس» (ازەربايجان) 4:1, «ارگەنتينا كوندورس» (ارگەنتينا) – «يتاليا تاندەر» (يتاليا) 1:4, «راشن بوكسينگ تايم» (رەسەي) – «پولاند حۋسسارس» (پولشا) 5:0, «مەكسيكو سيتي گۋەررەروس» (مەكسيكا) – «كۋبا دومادورەس» (كۋبا) 0:5, «ۋكراين وتامانس» (ۋكراينا) – «يۋسا كنوكوۋتس» (اقش) 4:1, «تايم گەرمانيا» (گەرمانيا) – «الجەريا دەسەرت حوۋكس» (الجير) 5:0.
رۋسلان يگىلىك.
