بالالار كۇلكىسىنەن اسقان تاماشا بار ما؟ ءتىپتى, كۇننىڭ شۇعىلاسىن, كەمپىرقوساقتىڭ جارقىن ءتۇسىن ونىمەن سالىستىرۋعا بولا ما؟ تەك قانا بالالار كۇلكىسىنە بولەنگەن ۇيدە عانا ناعىز باقىت ورنايتىنى انىق. كەز كەلگەن اتا-انا, سونىڭ ىشىندە بالالار اۋرۋىن باستان كەشىرگەن اتا-انالار عانا مۇنى جاقسى تۇسىنەدى.
بالالار كۇلكىسىنەن اسقان تاماشا بار ما؟ ءتىپتى, كۇننىڭ شۇعىلاسىن, كەمپىرقوساقتىڭ جارقىن ءتۇسىن ونىمەن سالىستىرۋعا بولا ما؟ تەك قانا بالالار كۇلكىسىنە بولەنگەن ۇيدە عانا ناعىز باقىت ورنايتىنى انىق. كەز كەلگەن اتا-انا, سونىڭ ىشىندە بالالار اۋرۋىن باستان كەشىرگەن اتا-انالار عانا مۇنى جاقسى تۇسىنەدى.
وسىدان ءبىراز ۋاقىت بۇرىن عانا بالالاردىڭ جۇرەك اۋرۋى, اق قان, سال اۋرۋلارى جەتكىنشەكتەر مەن ولاردىڭ اتا-انالارىنا ايتىلعان تاعدىردىڭ ۇكىمى سەكىلدى ەستىلەتىن. ويتكەنى, ورتالىق كلينيكالاردان ناۋقاستاردىڭ بارىنە ورىن تابىلا بەرمەيتىن, ال شەتەلدەرگە شىعارىپ ەمدەتۋگە جاعداي جوق ەدى. تەك 2008 جىلى ەل پرەزيدەنتى نۇرسۇلتان نازارباەۆتىڭ باستاماسىمەن استانادا العاش رەت ۇلتتىق مەديتسينا حولدينگىنىڭ ءبىرىنشى كلينيكاسى اشىلعان كەزدە عانا مىڭداعان قازاقستاندىق بالالاردىڭ ساۋىعىپ كەتۋىنە ناقتى ءۇمىت پايدا بولدى. «قازاقستان-2050» ستراتەگياسىندا ۇلت دەنساۋلىعىنىڭ ءبىزدىڭ تاماشا بولاشاعىمىزعا نەگىز قالايتىندىعىن مالىمدەگەن پرەزيدەنت نۇرسۇلتان نازارباەۆ 16 جاسقا دەيىنگى بارلىق بالالاردى مەديتسينالىق قىزمەت كورسەتۋدىڭ بارلىق قىرلارىمەن قامتاماسىز ەتۋ قاجەتتىگىن اتاپ كورسەتتى. مىنە, سوندىقتان دا, قازىر زامانعا لايىق جابدىقتالعان ورتالىقتاردا بالالارعا ج ۇلىن ترانسپلانتاتسياسى مەن بۇيرەك اۋىستىرۋ وپەراتسيالارى جاسالۋ ۇستىندە. ءتىپتى, كەشە عانا جارىق دۇنيە ەسىگىن اشقان نارەستەنىڭ جۇرەگىنە وپەراتسيا جاساۋ, دەنە كەمشىلىكتەرىن تۇزەتۋ ءىسى جۇزەگە اسىرىلاتىن بولدى. بالالار ساۋىقتىرۋ تەحنولوگيالارىن كەڭىنەن پايدالانۋ مۇمكىندىكتەرىنە قول جەتكىزدى.
ءبىزدىڭ دارىگەرلەردىڭ شەتەلدىك ارىپتەس ماماندارمەن قاتار تۇرىپ, جۇمىس ىستەۋ جاعدايلارى دا ءجيى كەزدەسەدى. مەملەكەت بۇعان كوپتەگەن قارجى شىعىنداۋدا. ويتكەنى, بولاشاق ۇرپاقتىڭ دەنساۋلىعى بارىنەن دە جوعارى قويىلىپ وتىر. دەگەنمەن, بۇل ايتىلعانداردىڭ ءبارى ناۋقاس بالالار مەن ولاردىڭ اتا-انالارىنىڭ كۋالاندىرۋىنسىز قۇرعاق ءسوز بولىپ قانا قالار ەدى. ەگەر ءسىز حولدينگتىڭ ورتالىقتارىنا بارساڭىز وندا جازىلعان العىستاردان كىتاپ قۇراستىرىپ شىعۋعا بولاتىندىعىنا كوز جەتكىزەسىز. ول العىستاردىڭ ارقايسىسىندا بالدىرعاندار مەن ولاردىڭ وتباسىلارىنىڭ تاريحى مەن تاعدىرى, اۋرۋدى قالاي جەڭىپ شىققاندىعى تۋرالى جايلارعا كۋا بولاسىز. ەلىمىزدىڭ ءار تۇكپىرىنەن, ءتىپتى شەتەلدەردەن استاناعا كەلىپ, ناۋقاستارىنان ساۋىعىپ, ريزاشىلىقتارىن جەتكىزگەن جاندار جازعان جولداردى وقي وتىرىپ, ءبىزدىڭ ەلىمىزدىڭ قول جەتكىزگەن تابىستارىنا ءوزىڭىز دە تاڭعالاتىندىعىڭىز انىق.
ءۇمىت وتىن جاقتى
رەسپۋبليكالىق بالالاردى ساۋىقتىرۋ ورتالىعىندا ءبىز وسىمەن ەكىنشى رەت ەم قابىلداۋ ءۇستىندەمىز. ءبىرىنشى رەت بىلتىرعى جىلى كەلگەن ەدىك. قازىر دەنساۋلىعىمىزدا وڭ وزگەرىستەر بار. وسىنىڭ ءوزى ءبىز ءۇشىن ەرەكشە ماڭىزدى بولىپ تابىلادى. سوندىقتان مۇندا قانشا كەلسەك تە, شارشاماس ەدىك.
ءدال وسىنداي ورتالىقتىڭ بىزدە, قازاقستاندا, قۇرىلۋى «ەرەكشە» بالالاردى تاربيەلەۋ ۇستىندەگى جانە ولاردى ساۋىقتىرۋ ءۇشىن قازىرگى زاماندىق كاسىپتىك كومەكتى قاجەت ەتەتىن ءبىز سەكىلدى قادامدار ءۇشىن ماڭىزى زور وقيعا. ارينە, بىزگە وبلىس ورتالىعىندا دا كومەك كورسەتىلەر ەدى. بىراق مەديتسينالىق كلاستەر قارقىندى دامىپ, جەكەلەگەن اۋرۋلاردىڭ ۇزدىك دارىگەرلەرىن شەتەلدەردەن شاقىرا الۋ مۇمكىندىگى بار استانادا جاعداي مۇلدەم ەرەكشە. مەنىڭ ۇلىم تۇرار 6 جاسقا كەلگەنىمەن ءوز قولىن قينالىسسىز كوتەرىپ كورگەن ەمەس. ساۋساقتارىن دا قينالىپ جۇمادى. ورتالىقتا ساۋىقتىرۋ شارالارىنان وتكەننەن كەيىن وسىنىڭ ءبارى وعان جەڭىل تۇسەتىن بولدى. بالكىم, ءبىزدىڭ بۇل جەتىستىگىمىزدىڭ ءوزى كەيبىرەۋلەر ءۇشىن ماڭىزدى كورىنە قويماس. بىراق قيىندىقتى كوپ باستان كەشىرگەن ءبىز مۇنى بالامىزدىڭ ناعىز ەرلىگى دەپ قابىلدايمىز.
مۇندا جۇمىس ىستەيتىن ماماندار ماعان ءۇمىت شوعىن ۇستاتىپ, ءوز كۇشىمىزگە دەگەن سەنىمدى قالىپتاستىردى. مەن ءوز باستاماسىمەن وسىنداي بيىك دەڭگەيدەگى ساۋىقتىرۋ ورتالىعىن ءبىزدىڭ ەلىمىزدە اشىپ بەرگەن مەملەكەت باسشىسىنا شەكسىز العىسىمدى بىلدىرەمىن. وسىعان دەيىن كوپتەگەن اتا-انالار وسىنداي اۋرۋعا ۇشىراعان بالالارىنىڭ جازىلىپ شىعاتىندىعىنا ءۇمىت ارتا المايتىن. ءتىپتى, ونى ەمدەپ جازاتىنداي مامان ىزدەۋگە دە سەنىمسىزدىكپەن قارايتىن. ويتكەنى, ول كەزدە جاعداي سولاي ەدى. ال ءبىز بولساق, ەلىمىزدەگى قازىرگى وزگەرىستەردەن قۋات الىپ, بالالارىمىزدىڭ الاڭسىز بولاشاعىنا سەنىممەن قاراۋ مۇمكىندىگىنە يە بولدىق. سوندىقتان وسىنداي ورتالىقتاردىڭ ءاربىر قالادا بولعانىن قالار ەدىم.
ايقىن وشاقباەۆا,
تۇرار ومىرزاقتىڭ اناسى.
قىزىلوردا.
قۋانىشىمدى سوزبەن ايتىپ جەتكىزۋ قيىن
ءبىر جارىم جاستاعى مەنىڭ ۇلىمنىڭ ءومىرى رەسپۋبليكالىق بالالاردى ساۋىقتىرۋ ورتالىعى دارىگەرلەرىنىڭ قىزمەتىمەن تىعىز بايلانىستا دەسەم بولادى. مۇندا ونى بىلتىر ەڭبەكتەۋگە ۇيرەتكەن ەدى. ال بيىل ورتالىق ماماندارىنىڭ كومەگىمەن ول ءوزىنىڭ العاشقى قادامىن جاسادى. ەندى تۇساۋ كەسۋ ءداستۇرىن وتكىزۋگە ازىرلىك ۇستىندەمىز. بۇل شارانى دا وسىندا وتكىزەتىنىمىز انىق.
لوگوپەدپەن وتكىزىلگەن دارىستەردەن كەيىن رادمير العاش رەت «انا» دەگەن ءسوزدى ايتا الدى. بالانىڭ وسىنداي جەتىستىكتەرىن كورگەن اتا-انانىڭ قۋانىشىندا شەك بار ما؟ سوندىقتان مەن مۇنداعى ماماندارعا وتە ريزامىن.
مۇندا ەلىمىزدىڭ ءار وڭىرلەرىنەن عانا ەمەس, شەتەلدەردەن دە ادامدار كەلىپ بالالارىن ەمدەتىپ جاتادى. ماسەلەن, سانكت-پەتەربۋرگتان كەلگەن ءبىر ناۋقاسپەن تانىستىم. ونىڭ ايتۋىنشا, بارلىق قاجەتتى ماماندار ءبىر شاڭىراق استىنا جينالىپ, بالالاردى ساۋىقتىرۋ ءۇشىن جان-جاقتى كۇش-جىگەر جۇمسايتىن مۇنداي ورتالىق رەسەيدىڭ ەشبىر جەرىندە جوق. ەسكەرتە كەتەتىن جاعداي, ءاربىر قازاقستاندىق وسىناۋ تاماشا قىزمەتتەر كەشەنىن مۇندا كۆوتا بويىنشا تەگىن الا الادى. ءاربىر ەمدەۋ كۋرسى 24 كۇندى قۇرايدى. مىنە, وسى ۋاقىت ارالىعىندا بالانىڭ ءوزىن-ءوزى جەتىلدىرۋىنە جاقسى مۇمكىندىك قالىپتاسادى.
گۇلدەن تولەگەن,
رادمير ساعىندىقتىڭ اناسى.
تاراز.
عاجايىپ ءسات ورنادى-اۋ اقىرى!
اسا قۇرمەتتى نۇرسۇلتان ءابىش ۇلى!
قازاقستاننىڭ باس قالاسىندا بىرقاتار يننوۆاتسيالىق ورتالىقتاردىڭ باسىن قوسقان مەديتسينا كلاستەرىن قالىپتاستىرعانىڭىز ءۇشىن سىزگە زور العىسىمىزدى بىلدىرۋگە رۇقسات ەتىڭىز. ءبىزدىڭ بالالارىمىزدىڭ ءومىرى ءۇشىن بەرىلگەن وسىناۋ زور كومەككە سىزگە شىن جۇرەگىمىزدەن العىسىمىزدى ارنايمىز.
ءسىزدىڭ باستاماشىلدىعىڭىزبەن قۇرىلعان سەرپىندى جوبا ءبىزدىڭ مەملەكەتىمىزدىڭ تەحنولوگيالىق دامۋىن جاڭا دەڭگەيگە كوتەرۋگە, قازاقستاندىقتاردىڭ ءومىر ساپاسىن جاقسارتۋعا زور مۇمكىندىك بەرىپ وتىر. ءسىزدىڭ وسىناۋ تاماشا ەمحانالار كەشەنىن قۇرۋ جونىندەگى كورەگەن شەشىمىڭىزدىڭ ناتيجەسىندە قازىردىڭ وزىندە مىڭداعان ادامنىڭ ءومىرى ساقتالىپ قالدى. بۇدان ارتىق قانداي قامقورلىق بولۋى مۇمكىن؟
ءبىزدىڭ وتباسىمىزدا ەگىز قىز بەن ۇل ومىرگە كەلگەن كەزدە جۇبايىم ەكەۋمىزدىڭ قۋانىشىمىزدا شەك بولعان جوق. ۇلدىڭ دەنساۋلىعى قالىپتى بولىپ تۋدى دا, ال قىزىمىز ەركەجان, تاعدىردىڭ باسقا سالعانى وسى بولعان شىعار, ناۋقاس بولىپ شىقتى. دارىگەر نارەستەگە «بالالاردىڭ تسەرەبرالدى ءپاراليچى» دەگەن دياگنوز قويعان كەزدە نە بولعانىمىزدى بىلمەي ەسىمىز شىعىپ كەتتى. وسى كەزدەن باستاپ قىزىمىزدىڭ بويىنداعى قورقىنىشتى ناۋقاسپەن كۇرەسىمىز باستالدى. ءبىز كوپتەگەن اۋرۋحانالار مەن ورتالىقتاردا ەم قابىلدادىق. دارىگەرلەردىڭ ايتقانىن مۇلتىكسىز ساقتادىق. ءسويتىپ جۇرگەنىمىزدە 2008 جىلى ءبىزدىڭ ەمدەۋشى دارىگەرىمىز بىلاي دەدى: «سىزدەرگە استاناعا بارۋ كەرەك. وندا جاڭا ساۋىقتىرۋ ورتالىعى اشىلدى. بۇل ورتالىق قازىرگى زاماندىق ەڭ وزىق قۇرال-جابدىقتارمەن جابدىقتالعان. سىزدەرگە ءبىر كومەك بولسا, سول جەردەن بولادى».
باسىندا استاناعا بارۋعا ءداتىم بارمادى. ءۇش بالامدى قايدا تاستاپ كەتپەكپىن؟! بىراق دارىگەر ءوز ايتقانىنان قايتپاي تۇرىپ الدى.
رەسپۋبليكالىق بالالاردى ساۋىقتىرۋ ورتالىعىنا ءبىرىنشى رەت كەلگەن كەزىمىزدە مۇنداعى قىزمەتكەرلەردىڭ ىستىق ىقىلاسى مەن جۇرەكجاردى جارقىن سوزدەرى ءبىزدى قاتتى تولقىتتى. وسى ساتتەن باستاپ قىزىمنىڭ ساۋىعىپ كەتەتىنىنە ۇلكەن ءۇمىتىم پايدا بولدى. بۇل جەردە قىزىمىزدىڭ ناۋقاستىق دياگنوزى تولىق ايقىندالىپ, جەدەل تۇردە وپەراتسيا جاساۋ قاجەت دەگەن شەشىم قابىلداندى. مۇنداي وپەراتسيا ەركەجانعا انالار مەن بالالار ورتالىعىندا جاسالدى. وسىنىڭ ناتيجەسىندە قىزىمىز 6 جاسقا كەلگەندە جۇرە باستادى. مۇنان كەيىن ءبىز وزىمىزگە ۇلكەن ءۇمىت شوعىن سىيلاعان ورتالىققا تاعى دا كەلىپ, «بولاشاق» بولىمشەسىنىڭ دارىگەرلەرىنىڭ باقىلاۋىمەن قايتادان تەكسەرىستەن وتتىك. بۇل جەردە ەلىمىزدىڭ ءار وڭىرىنەن كەلگەن بالالار از ەمەس ەكەن. ولار مۇندا تەك قانا ەم قابىلداپ قويماي, سونىمەن قاتار, شىعارماشىلىق داعدىلاردى قالىپتاستىرا باستايدى. سۋرەت سالىپ, ولەڭ جازادى. وسىنداي ساتتەگى بالالاردىڭ جارقىن كۇلكىسىن كورسەڭىز. ونى كورگەندە جانىڭ شۋاققا بولەنەدى.
وسىناۋ تاماشا بالالار ورتالىعىنىڭ بارلىق قىزمەتكەرلەرىنە ولاردىڭ بىزگە كورسەتكەن قامقورلىعى مەن رياسىز كوڭىلدەرى ءۇشىن العىسىمدى ءبىلدىرەمىن. ۇجىمداعى جوعارى كاسىپقويلىق, ادامعا دەگەن ىستىق ىقىلاس پەن مەيىرىم, ءبىر سوزبەن ايتقاندا, ءبىز سەكىلدى جانى مەن ءتانى قاتار جۇدەگەندەر ءۇشىن جاسالعان قامقورلىقتى عاجايىپ ساتكە بالايمىن. مەنىڭ بۇل پىكىرىممەن العىستارىن اق قاعازعا جازىپ قالدىرعان انالاردىڭ تولىق كەلىسەتىندىگىنە سەنىم مول. جوعارى بىلىكتى ماماندارعا جانە ۇجىمنىڭ بارشا مۇشەلەرىنە ايتىلعان مۇنداي العىس حاتتاردى بالالاردى ساۋىقتىرۋ ورتالىعى, انا مەن بالا ورتالىعى, نەيروحيرۋرگيا ورتالىعى سەكىلدى حولدينگ مەكەمەلەرىنەن كوپتەپ كەزدەستىرۋگە بولادى.
اسا قۇرمەتتى نۇرسۇلتان ءابىش ۇلى! وسىنداي تاماشا كلينيكالاردىڭ ءبىزدىڭ ەلىمىزدە قىزمەت كورسەتىپ جاتقاندىعى ءۇشىن ءبىز وتە قۋانىشتىمىز. ءسىزدىڭ وسى مەكەمەلەردى قالىپتاستىرعان تاريحي ەرلىگىڭىز حالىق جادىندا ماڭگى قالادى دەپ ويلايمىن. قۇرمەتتى نۇرسۇلتان ءابىش ۇلى! سىزگە زور دەنساۋلىق تىلەۋگە رۇقسات ەتىڭىز. ءاربىر ارايلاپ اتقان تاڭ ءسىزدىڭ ۇيىڭىزگە كەلىسىم مەن باقىت اكەلسىن. سىزگە جانە جاقىندارىڭىزعا بارلىق جاقسىلىقتى تىلەيمىن.
گۇلميرا وتەگەنوۆا,
ەركەجان ىستانبەكوۆانىڭ اناسى.
تۇركىستان.
جوعارى ستاندارتتار دەڭگەيىندە
رەسپۋبليكالىق بالالار ساۋىقتىرۋ ورتالىعىنا ءبىز جىل سايىن كەلىپ تۇرۋعا تىرىسامىز. ويتكەنى, ءبىز بالامىزدىڭ دەنساۋلىعى جونىنەن بۇل جەردە جاقسى جەتىستىكتەرگە قول جەتكىزدىك. بەكنۇرعا وسىنداعى ساۋىقتىرۋ شارالارىنان كەيىن «بتسپ جەڭىل ءتۇرى» دەگەن دياگنوز قويىلعان بولاتىن. كورسەتىلگەن كومەكتەردىڭ ناتيجەسىندە بەكنۇر ءوز دەنساۋلىعىن تولىقتاي قالپىنا كەلتىرۋگە قول جەتكىزدى. ەندى ءبىز مۇندا تۇزەتۋ جۇرگىزەتىن ۇستازداردىڭ ءدارىسىن الىپ ءجۇرمىز. ويىن تەراپەۆتىڭ, مۋزىكالىق تەراپەۆتىڭ, دەفەكتولوگ, لوگوپەد سەكىلدى مامانداردىڭ كورسەتكەن قىزمەتىن بەكنۇر بالاعا ءتان قۋانىشپەن قابىلدايدى. ويتكەنى, بۇل كومەكتەردىڭ ءوزى مۋزىكا جانە باسقا دا كوڭىلدەندىرۋ تۇرىندە بەرىلەدى. بۇرىن بالامىز پارتاعا بەس مينۋت قانا وتىرا الاتىن بولسا, ەندى جيىرما مينۋت قينالماي وتىرا الادى.
ورتالىقتاعى جاعداي مەن كوڭىل كۇي شۋاعى وتە تاماشا. پسيحولوگتار, پسيحوتەراپەۆتەر مۇندا انالارمەن دە جۇمىس ىستەپ, بالالارعا قانداي تاربيە بەرۋ قاجەتتىگىن ۇيرەتەدى. مۇنىڭ سىرتىندا ءبىز وسى جەردە باسقا ەلدەردەن كەلگەن ماماندارمەن دە كەڭەسۋ مۇمكىندىگىنە يە بولدىق. ماسەلەن, مەن ليتۆا مەن رەسەيدەن كەلگەن دارىگەرلەرمەن سويلەسىپ, ولاردىڭ دا اقىل-كەڭەستەرىن تىڭدادىم.
وسىنداي كلينيكانى سالىپ بەرگەن پرەزيدەنتىمىزگە ۇلكەن راحمەت. مۇنداي العىستى استاناعا ەلىمىزدىڭ ءاربىر تۇكپىرىنەن كەلىپ, بالالارىن ەمدەتكەن ءاربىر اتا-انانىڭ ايتاتىندىعىنا سەنىمىم زور.
نۇرگۇل,
بەكنۇر زۇبايروۆتىڭ اناسى.
اتىراۋ.
امانگەلدىنىڭ ارمانى ورىندالادى
رەسپۋبليكالىق بالالاردى ساۋىقتىرۋ ورتالىعىمەن مەنىڭ قارىم-قاتىناسىم ەرەكشە: وڭ جاق گەميپارەز اۋرۋىنا شالدىققان مەنىڭ ۇلىم ءۇش جاسىندا ناق وسى ورتالىقتا العاش رەت قادام باستى دا, وسى جەردە وعان تۇساۋ كەسەر ءراسىم جاسالدى. بۇل جەردە ءبىزدىڭ بالالارىمىزعا وتە قىمبات تۇراتىن دارىلەر بەرىلىپ, قازىرگى زامانعى قۇرال-جابدىقتاردا قىزمەتتەر كورسەتىلەدى. بالالار, ءتىپتى, وسى جەردە مەكتەپكە بارۋ مۇمكىندىگىنە دە يە بولدى.
مۇندا تەك بالالاردى عانا ساۋىقتىرمايدى. ولاردىڭ انالارى پسيحوتەراپەۆتەردىڭ, پسيحولوگتاردىڭ كومەگىنە يە بولىپ, جانىنا جاعىمدى قۋات الادى. ويتكەنى, مۇندا بۇكىل ۇجىم بولىپ جەتكىنشەكتىڭ جەتىستىگىنە قۋانىپ, اركىم ءوزىنىڭ تاجىريبەسىمەن بولىسەدى. مەنىڭ ويىمشا ساپالى مەديتسينالىق قىزمەت دەگەنىمىزدىڭ ءوزى وسى.
مەنىڭ ماقساتىم – دەنى ساۋ بالانىڭ اناسى بولۋ. بالامنىڭ دا وزىندىك ارمانى بار: ول كەز كەلگەن بالا باسقارا الاتىن ماشينا قۇراستىرىپ شىققىسى كەلەدى. نۇرسۇلتان نازارباەۆتاي كورەگەن پرەزيدەنتتىڭ ارقاسىندا ونىڭ بۇل ارمانىنا جەتەتىندىگىنە دەگەن سەنىمىم زور.
ءمادينا عانيەۆا,
امانگەلدى ءۋاليحانوۆتىڭ اناسى.
سەمەي.
الدىمىزدان الەم اشىلعانداي
بالالاردىڭ ساۋىقتىرۋ ورتالىعىنىڭ كورسەتكەن قىزمەتىنىڭ ارقاسىندا بتسپ دياگنوزى بويىنشا ناۋقاسقا شالدىققان مەنىڭ قىزىم وليا اقىرى جەتى جاسقا جەتكەندە ءوز اياعىنان تۇردى. ءبىز ورتالىقتاعى العاشقى پاتسيەنتتەردىڭ ءبىرى بولدىق. مۇنان كەيىن دە ءجيى كەلىپ تۇردىق. سوندا ءبىر بايقاعانىم, ورتالىق قىزمەتكەرلەرى ناعىز ءوز ىستەرىنە بەرىلگەن جاندار ەكەن. بۇل كلينيكادا مەكتەپ تە جۇمىس ىستەيدى. سونىڭ ناتيجەسىندە ساباعىمىزدى ۇزبەي-اق ساۋىقتىرۋ كۋرستارىن وتۋگە قولىمىز جەتتى.
مەن بۇل مەديتسينالىق حولدينگتى قالىپتاستىرۋ يدەياسى پرەزيدەنتىمىز نۇرسۇلتان ءابىش ۇلى نازارباەۆتان باستاۋ العانىن جاقسى بىلەمىن. وسى ءۇشىن ەلباسىنا انالىق العىسىمدى ايتامىن.
ونىڭ ۇستىنە ەلىمىزدە سوڭعى جىلدارى مۇگەدەك بالالارعا دەگەن قوعام كوزقاراسى دا وزگەرىپ, بالالار باقشالارى مەن مەكتەپتەردە دەنە تۇزەتۋ توپتارى اشىلۋدا. ادەتتە, وليا ۇيدە دايىندالادى. بىراق سوعان قاراماستان سىنىپتاستارى ونى ءوز ورتالارىنان كورۋگە ءاردايىم قۋانىشتى. بالالاردىڭ وزدەرىنە اسا ءبىر جىلى كوزقاراسپەن قارايتىنىن وليا دا سەزىپ, بۇل جايىندا اڭگىمە قوزعاپ قويادى. وسىنداي جىلى كوزقاراستار قىزىمدى قاناتتاندىرىپ, ءوز اۋرۋىن جەڭۋىنە كۇش-جىگەر بەرەتىندىگىن سەزىنەمىن.
سىزدەردىڭ بارلىقتارىڭىزعا تۇسىنىكتەرىڭىز بەن كومەكتەرىڭىز ءۇشىن ۇلكەن العىسىمدى ايتامىن.
يرينا رومانكوۆا.
شىعىس قازاقستان وبلىسى,
زىريان قالاسى.
_______________________________________________
«ەگەمەن قازاقستان» مەن «كازاحستانسكايا پراۆدا»
گازەتتەرىنىڭ بىرلەسكەن جوباسى.
