كەڭەستە قورعانىس ۆەدومستۆوسىنىڭ قارجى ءتارتىبىن ساقتاۋى تۋرالى ايتىلدى. بولىنگەن بيۋدجەت قاراجاتىن 100 پايىز يگەرۋمەن قاتار, وسى جىلدىڭ وتكەن كەزەڭىندە 9 ميللياردتان استام تەڭگە ۇنەمدەلدى. ۇنەمدەۋ مەملەكەتتىك ساتىپ الۋدى جۇرگىزۋ كەزىندە ۇلكەن ايقىندىلىق پەن اشىقتىقتى قامتاماسىز ەتۋ, سونىمەن قاتار زاڭنامانى بۇلجىتپاي ورىنداۋ مەن كونكۋرستىق پروتسەدۋرالاردى جەتىلدىرۋ ەسەبىنەن قول جەتكىزىلگەن بولاتىن. ۇنەمدەۋ ەسەبىنەن الىنعان قاراجات قارۋلى كۇشتەردى دامىتۋدىڭ باسىم باعىتتارىنا ءبولىندى.
قورعانىس مينيسترلىگىنىڭ اسكەري وقۋ ورىندارىن تەكسەرۋ كوميسسيالارىنىڭ قورىتىندىلارى بويىنشا, قارۋلى كۇشتەر تۇرلەرىنىڭ باس قولباسشىلارىنا اسكەري عىلىم جانە ءبىلىم دەپارتامەنتىمەن ءوزارا بىرلەسە وتىرىپ ءبىلىم ۇدەرىسىن جەتىلدىرۋ بويىنشا شارالار قابىلداۋ جونىندە نۇسقاۋلار بەرىلدى. بۇل ءبىرىنشى كەزەكتە پروفەسسورلىق-وقىتۋشى قۇرامدى جاساقتاۋعا جانە ولاردىڭ بىلىكتىلىگىن ارتتىرۋعا, وقۋ ۇدەرىسى كەزىندە جاڭا وقۋ-جاتتىعۋ ترەناجەرلەرىن, قارۋ-جاراق پەن اسكەري تەحنيكا ۇلگىلەرىن قولدانۋعا, كۋرسانتتاردىڭ وقۋ ماتەريالدارىن ساپالى مەڭگەرۋگە ىنتالاندىرۋ ءۇشىن قوسىمشا شارالار جاساۋعا قاتىستى. بولاشاق وفيتسەرلەردى دايارلاۋداعى ۇلگىلى الەۋمەتتىك-تۇرمىستىق جاعدايلار جاساۋ – ماڭىزدى ماسەلە.
كەلەسى جىلى بارلىق كازارمالىق-تۇرعىن ءۇي قورىن تەكسەرۋدى جۇرگىزۋ تۋرالى ماسەلەنى قاراۋ تاپسىرىلدى. قارۋلى كۇشتەردەگى نىساندار كەڭەس كەزەڭىنەن بەرى كۇردەلى جوندەۋدەن وتپەگەن, سوندىقتان جىلدان جىلعا توزىعى جەتىپ, ەسكىرگەن. وسىعان بايلانىستى ولاردىڭ شىنايى جاعدايىن قاراپ, بۇدان ءارى پايدالانۋ احۋالىن باعالاۋ قاجەتتىلىگى تۋىنداپ وتىر.
قورعانىس ءمينيسترى, گەنەرال-لەيتەنانت نۇرلان ەرمەكباەۆ جالپى قارۋلى كۇشتەردە مەملەكەتتىك ءتىلدىڭ قولدانىلۋ اياسى كەڭەيىپ كەلە جاتقانىن اتاپ ءوتتى. كەڭەستەر, ءىس جۇرگىزۋ جانە نورماتيۆتىك قۇقىقتىق اكتىلەردى ازىرلەۋ مەملەكەتتىك تىلدە جۇرگىزىلەدى, ال اسكەري قىزمەتشىلەر اراسىنداعى قارىم-قاتىناس, اسكەري بولىمشەلەردى باسقارۋ ەكى تىلدە جۇزەگە اسىرىلادى.
بۇل رەتتە جەكەلەگەن لاۋازىمدى تۇلعالاردىڭ, ونىڭ ىشىندە باسشىلىقتىڭ مەملەكەتتىك ءتىلدى مەڭگەرۋىن جاقسارتۋ كەرەك ەكەنىنە باسا نازار اۋدارىلدى. نەگىزىنەن, ولار ءوز ءىسىنىڭ شەبەرلەرى, ءبىلىمدى جانە جان-جاقتى ماماندار, الايدا مەملەكەتتىك تىلدە ءوز ويلارىن ەركىن جەتكىزە المايدى. كوماندالىق قۇرام, كومانديرلەر, باس قولباسشىلار ءۇشىن, ءتىپتى ءمينيستردىڭ ورىنباسارلارىنا دەيىن تەرەڭدەتىلگەن جۇيەلى توپتىق ساباقتار مەن جەكە كۋرستار, مەملەكەتتىك ءتىلدى ءبىلۋىن تەكسەرۋدى ۇيىمداستىرۋ بويىنشا نۇسقاۋ بەرىلدى. ول ءۇشىن ءبىلىم الۋشىلارعا مەملەكەتتىك تىلدە سويلەۋدى تاجىريبە جۇزىندە قولدانۋعا بارىنشا باعىتتايتىن وقىتۋشىلاردى ىرىكتەۋگە ەرەكشە كوڭىل بولىنەدى.
اسكەريلەردىڭ كاسىبي دەڭگەيىن ارتتىرۋعا قاجەتتى وقۋ, عىلىمي-تانىمدىق جانە انىقتامالىق وقۋلىقتار كوبىنەسە ورىس نەمەسە اعىلشىن تىلدەرىندە شىعارىلادى. سوندىقتان ەلباسى 2007 جىلدا بەلگىلەگەندەي, ءاربىر اسكەري قىزمەتشى ءۇش ءتىلدى ەركىن مەڭگەرۋگە باعىت الۋعا ءتيىس. «قازىرگى تاڭدا مامان, كوماندير نەمەسە وفيتسەر ءۇشىن ءبىر عانا ءتىلدى مەڭگەرۋ جەتكىلىكسىز», دەپ اتاپ ءوتتى مينيستر.
