جاڭارتىلعان ەسكەرتكىشتەردىڭ اينالاسى اباتتاندىرىلىپ, اعاش كوشەتتەرى وتىرعىزىلدى. گۇلزارلار كەڭەيتىلىپ, مونۋمەنتتىڭ ماڭىنا تۇرعىندار ءبىر اۋىق وتىرىپ, دەمالاتىن ورىندىقتار قويىلدى.
– بيىل سارىكول كەنتىنىڭ ورتالىق الاڭىن اباتتاندىرۋعا كوپ كۇش جۇمسادىق. 2008 جىلى ورناتىلعان تاۋەلسىزدىك ستەللاسى كۇردەلى جوندەۋدەن وتكىزىلدى. جارامسىز كەراموگرانيت توسەنىشتەرى اۋىستىرىلىپ, گۇلزارلاردىڭ سىرتقى ءتۇرى وزگەردى. مۇنىڭ ءبارى جەرگىلىكتى بيۋدجەت پەن اۋىل كاسىپكەرلەرىنىڭ قارجىسىنا جاسالىپ جاتقان دۇنيە, – دەدى اۋىل اكىمى سەرگەي گورشەنين.
2018 جىلى سالىنىپ, بيىل قايتا جاڭارتىلعان داڭق قابىرعاسىندا وسى اۋىلدان وتان سوعىسىنا اتتانعان مايدانگەرلەر مەن ەڭبەك ەرلەرىنىڭ ەسىمدەرى, اۋدان, وبلىس كولەمىنە بەلگىلى اۋىلدىڭ ازاماتتارىنىڭ فوتوسۋرەتتەرى ءىلۋلى تۇر. بۇل ەسكەرتكىش تە اكتەلىپ, سىرلانىپ, جاڭا كەيىپكە ەنگەن.
اۋىلدىڭ ورتالىق الاڭىنا جاڭا كەسپەتاس توسەلىپتى. ەندى مەرەكە كۇندەرى سالتاناتتى ءىس-شارالار وتكىزۋگە ارنالعان ساحنا مەن مىنبەردى جاڭارتۋ جۇمىستارى ءجۇرىپ جاتىر.
قوستاناي وبلىسى
